Студэнцкія пратэсты ў Венесуэле: двое загінулых, дзясяткі параненых
Па меншай меры два чалавекі загінулі падчас шматтысячнай студэнцкай дэманстрацыі ў венесуэльскай сталіцы Каракасе.
Згодна з афіцыйнай інфармацыяй, у перастрэлцы былі забітыя прыхільнік урада і адзін або некалькі студэнтаў. Усяго ў ходзе акцый пратэсту, якія ахапілі Венесуэлу, па меншай меры 23 чалавекі былі
параненыя.
Прэзідэнт Нікалас Мадура выступіў па нацыянальным тэлебачанні і заклікаў да спакою. «Не трэба губляць галаву і паддавацца на правакацыі», - заявіў Мадура, які падвяргаецца ўсё большай крытыцы з-за росту гвалту і бесперапынных
эканамічных праблем.
Студэнты пратэставалі супраць арышту іх таварышаў у пачатку тыдня, у так званы Дзень моладзі, калі Венесуэла адзначала 200-годдзе бітвы, падчас якой студэнты адстаялі горад Вікторыя ад іспанскіх
войскаў.
Барацьба без гвалту
У студэнцкім маршы, які прайшоў у сераду ў Каракасе, узялі ўдзел і лідары венесуэльскай апазіцыі.
Але - як і ў ходзе шматлікіх іншых акцый апазіцыі - адначасова на вуліцы выйшлі і прыхільнікі ўрада.
Кіраўнік Нацыянальнай асамблеі Дыасдада Кабелья абвінаваціў у правакаванні гвалту правых актывістаў. «Наш таварыш стаў ахвярай фашыстаў», - заявіў ён у тэлезвароце.
Аднак адзін з вядучых дэпутатаў ад апазіцыі Марыя Карына Мачада распавяла, што гвалт успыхнуў, калі групу студэнтаў атачылі ўдзельнікі праўладнай акцыі. Лідар венесуэльскай апазіцыі Энрыке
Капрылес таксама заклікаў устрымацца ад актаў гвалту.
Незадаволенасць кампусаў
Студэнцкія пратэсты працягваюцца ў Венесуэле ўжо тыдзень. Да серады самыя масавыя акцыі прайшлі ў гарадах Мерыда і Тачыра. Іх удзельнікі скардзіліся на недастатковыя меры бяспекі ва
ўніверсітэцкіх кампусах, а таксама пратэставалі супраць эканамічнага крызісу, выкліканага, як яны лічаць, палітыкай урада.
Некаторыя ўдзельнікі гэтых акцый былі затрыманыя сіламі бяспекі, што дало штуршок новым пратэстам.
Венесуэльскія ўлады нядаўна абвясцілі аб дадатковых мерах па барацьбе з валютным крызісам і эканамічным бязладдзем. У лістападзе прэзідэнт Мадура атрымаў на год асаблівыя паўнамоцтвы для
барацьбы з эканамічным крызісам.
Ён абвясціў «эканамічны наступ» і, у прыватнасці, увёў 30-адсоткавую мяжу на прыбытак для прыватных кампаній.
Нягледзячы на тое, што Венесуэла з'яўляецца буйным экспарцёрам нафты, у краіне ўзнік дэфіцыт асноўных тавараў - такіх як цукар, раслінны алей і туалетная папера.