Трамп загадаў адрадзіць легендарную турму для самых жорсткіх злачынцаў
Прэзідэнт ЗША Дональд Трамп заявіў, што вядомую турму для асабліва небяспечных злачынцаў на востраве Алькатрас зноў адкрыюць, піша ВВС.
«Мы больш не будзем трываць серыйных злачынцаў, якія сеюць зло, кровапраліцце і хаос на нашых вуліцах», — напісаў кіраўнік Белага дома ў сваёй сацсетцы Truth Social
«Менавіта таму сёння я даручаю бюро турмаў сумесна з Міністэрствам юстыцыі, ФБР і Міністэрствам унутранай бяспекі зноў адкрыць значна пашыраную і перабудаваную турму "Алькатрас" для ўтрымання самых бязлітасных і жорсткіх злачынцаў Амерыкі».
Са слоў Трампа, аднаўленне працы сумна вядомай турмы «стане сімвалам закона, парадку і справядлівасці».
Вядучыя дэмакраты назвалі гэтую прапанову «несур'ёзнай».
Турма строгага рэжыму, таксама вядомая як «Скала», зачынілася ў 1963 годзе і ў цяперашні час паспяхова функцыянуе як турыстычны аб'ект.
Самая суровая турма Амерыкі
Алькатрас першапачаткова быў марскім фортам.
У пачатку XX стагоддзя форт пераабсталявалі ў ваенную турму.
Грамадзянскія асобы пачалі адпраўляцца ў Алькатрас у сярэдзіне 1930-х гадоў. Турму, якая перайшла ад Мінабароны да Мінюста ЗША, мадэрнізавалі, зрабіўшы амаль немагчымымі ўцёкі з яе.
Сярод самых вядомых зняволеных былі сумна вядомыя гангстары Аль Капоне, Мікі Коэн і Джордж «Кулямёт» Кэлі.
Адзінымі, хто змог з яе выбрацца, як мяркуюць, сталі ў 1962 годзе Фрэнк Морыс, Кларэнс Энглін і Джон Энглін. Аднак дакладных звестак пра тое, што стала з імі пасля ўцёкаў, няма. Паводле адной з версій, яны ўсё ж загінулі.
Алькатрас згадваецца ў многіх кнігах і фільмах.
Так, фільм 1962 года «Птушкалоў з Алькатраса» з Бертам Ланкастэрам у галоўнай ролі распавядае пра асуджанага забойцу Раберта Страўда. Адбываючы пажыццёвае зняволенне на востраве-турме, ён захапіўся птушкамі і стаў экспертам-арнітолагам.
У аснову "Птушкалова з Алькатраса" лягла рэальная гісторыя зняволенага Роберта Страўда, ролю якога выканаў Берт Ланкастэр
На востраве таксама здымаўся фільм 1996 года «Скала» (The Rock) з Шонам Конэры і Нікаласам Кейджам у галоўных ролях.
Стужка распавядае пра былога вайсковага і спецыяліста хімічнай зброі ФБР, якія ратуюць закладнікаў з Алькатраса.
Нікалас Кейдж у сцэне з фільма «Скала»
У 1963 годзе турму зачынілі з-за таго, што яе было занадта дорага ўтрымліваць: на сайце Федэральнага бюро турмаў паказана, што Алькатрас абыходзіўся ўтрая даражэй, чым іншыя федэральныя турмы.
Праз 10 гадоў пасля гэтага на востраў пачалі пускаць турыстаў, і былая турма стала папулярным аб'ектам.
Каб ператварыць Алькатрас у дзеючую турму, спатрэбіцца велізарная сума грошай, лічыць прафесар Габрыэль Джэк Чын са школы права пры Каліфарнійскім універсітэце.
Па словах Чына, колькасць зняволеных у федэральнай турэмнай сістэме скарацілася прыкладна на 25% у параўнанні з пікавым паказчыкам.
«У турмах шмат свабодных месцаў, таму незразумела, навошта патрэбна новая», — разважае эксперт.
Алькатрас мае «рэпутацыю суровай турмы», і Трамп спрабуе даць зразумець, што ягоная адміністрацыя будзе жорстка змагацца са злачыннасцю, мяркуе Чын.
Былы спікер Палаты прадстаўнікоў Нэнсі Пэласі, дэмакратка ад Каліфорніі, у чыю акругу ўваходзіць Алькатрас, заявіла, што прапанова Трампа — «несур'ёзная".
А сенатар-дэмакрат ад штата Сан-Францыска Скот Вінер назваў гэтую ідэю «абсалютна вар'яцкай» і «атакай на вяршэнства права».