Ва Украіне сёння 80-я гадавіна Галадамору

Cёння ва Украіне 80-я гадавіна Галадамору 1932-1933 гадоў.



Па дадзеных Грамадскага камітэта па ўвекавечанні памяці ахвяр Галадамору, у Кіеве адбудуцца памятныя мерапрыемствы, якія пачнуцца з жалобнага шэсця ад м. Арсенальная да Нацыянальнага мемарыяла ахвярам Галадамору. Усіх кіяўлян і гасцей сталіцы Грамадскі камітэт запрашае сабрацца, каб разам ушанаваць памяць загінулых ад гвалтоўнай галоднай смерці.
Пачнецца шэсце ў 14.00 каля ст. м. Арсенальная і завершыцца ў Нацыянальным мемарыяле ахвярам Галадамору (Кіеў, вул. Лаўрская, 3).
Напярэдадні ў абласных цэнтрах Украіны праходзілі акцыі «Паслання памяці», падчас якіх украінцы на вялікім палатне пісалі свае звароты да нашчадкаў, якія праз 20 гадоў збяруцца, каб ушанаваць памяць загінулых у сотую гадавіну Галадамору ва Украіне. Перад пачаткам шэсця моладзь збярэ гэтыя часткі палотнаў, прывезеных з розных рэгіёнаў, у вялікі банэр, які будуць несці ў галаве калоны. Пазней такія пасланні ўвойдуць у новы том Нацыянальнай кнігі памяці .
У 15.00 каля Нацыянальнага мемарыяла ахвярам Галадамору пачнецца паніхіда, якую адправяць Патрыярх Кіеўскі і ўсёй Русі-Украіны Філарэт, іерархі УГКЦ, УАПЦ, УПЦ, РКЦ. Да ўдзелу запрошаны прадстаўнікі ўсіх цэркваў і рэлігійных арганізацый ва Украіне, дыпламатычныя прадстаўнікі, грамадскасць.
У 16.00 пасля Агульнанацыянальнай хвіліны маўчання пачнецца акцыя «Запалі свечку памяці». Каля Нацыянальнага мемарыяла ахвярам Галадамору ў гэтую суботу будзе запалена больш за 10 тысяч свечак.
Грамадскі камітэт па ўшанаванні памяці ахвяр Галадамору таксама заклікае ўсіх украінцаў у 16:00 запаліць свечкі памяці ў сваіх вокнах.
Жалобныя мерапрыемствы таксама пройдуць на Цэнтральных плошчах ўсіх абласных цэнтраў Украіны: агульнанацыянальная хвіліна маўчання і акцыя «Запалі свечку памяці» . Памянуць ахвяраў Галадамору 23 лістапада і ў многіх краінах свету.
Даведка УНІАН: 
Штогод у апошнюю суботу лістапада ва Украіне праходзяць мерапрыемствы памяці ахвяр Галадамору і палітычных рэпрэсій.
Галадамор 1932-1933 гадоў — масавы, наўмысна арганізаваны савецкай уладай голад, які прывёў да шматмільённых чалавечых ахвяр у сельскай мясцовасці на тэрыторыі Украінскай ССР (землі сучаснай Украіны, за выключэннем сямі заходніх абласцей, Крыма і Паўднёвай Бесарабіі, якія тады не ўваходзілі ў УССР) і Кубані, пераважная большасць насельніцтва якой складалі ўкраінцы. Голад наступіў у выніку спланаванай канфіскацыі ўраджаю збожжавых і ўсіх астатніх прадуктаў харчавання ў сялян прадстаўнікамі савецкай улады, што прывяло да забойства сялян голадам у мільённых маштабах, пры гэтым савецкая ўлада мела значныя запасы збожжа ў рэзервах і ажыццяўляла яго экспарт за мяжу.
Прычыны гэтага масавага злачынства ніколі ў СССР не расследаваліся і ніхто з тых, хто меў дачыненне да злачынства, не панёс пакарання. На працягу дзесяцігоддзяў масавае забойства людзей штучным голадам не толькі наўмысна замоўчвалася савецкай уладай, пра яго наогул забаранялася дзесьці згадваць.
У 2003 годзе Украінскі парламент назваў, а ў 2006 годзе — афіцыйна прызнаў Галадамор генацыдам украінскага народа. 24 краіны афіцыйна прызналі Галадамор генацыдам украінскага народа.
13 студзеня 2010 Апеляцыйны суд Кіева прызнаў кіраўнікоў бальшавіцкага таталітарнага рэжыму вінаватымі ў генацыдзе ва Украіне ў 1932-33 гадах.
Крымінальную справу ўзбудзіла і расследавала СБУ па факце ажыццяўлення Галадамору — генацыду ў Украіне ў 1932-1933 гадах.
Рашэннем суда былі пацверджаны высновы следчых Службы бяспекі Украіны аб арганізацыі ў 1932-1933 гадах на тэрыторыі УССР кіраўніцтвам бальшавіцкага таталітарнага рэжыму — генеральным сакратаром Цэнтральнага камітэта Усесаюзнай камуністычнай партыі бальшавікоў (ЦК ВКП (б)) Іосіфам Сталіным (Джугашвілі), членам ЦК ВКП (б), старшынёй Савета народных камісараў (СССР) Вячаславам Молатавым (Скрабін), сакратарамі ЦК ВКП (б) Лазарам Кагановічам і Паўлам Постышавым, членам ЦК ВКП (б), генеральным сакратаром ЦК камуністычнай партыі бальшавікоў Украіны (ВКП (б) Станіславам Касіорам, членам ЦК ВКП (б), старшынёй Савета народных камісараў УССР Уласам Чубаром і членам ЦК ВКП (б), другім сакратаром ЦК ВКП (б) Мендэлем Хатаевічам — генацыду ўкраінскай нацыянальнай групы, гэта значыць штучнага стварэння жыццёвых умоў, разлічаных на яе частковае фізічнае знішчэнне.
Згодна з заключэннем судовай навукова-дэмаграфічнай экспертызы, праведзенай у ходзе дасудовага следства Інстытутам дэмаграфіі і сацыяльных даследаванняў ім . М.В. Птухі Нацыянальнай акадэміі навук Украіны, у выніку здзейсненага генацыду ў Украіне загінулі 3 млн. 941 тыс. . чалавек.
Суд канстатаваў, што І.Сталін (Джугашвілі), Молатаў (Скрабін), Л. Кагановіч, П.Постышаў, С.Касіор, Чубарь і М.Хатаевіч  здзейснілі злачынства генацыду, прадугледжанае ч. 1 арт. 442 Крымінальнага кодэкса Украіны (генацыд) , і закрыў крымінальную справу ў сувязі з іх смерцю.
unian.net