Мінэнерга: Рэзалюцыя Еўрапарламента па БелАЭС носіць выключна палітызаваны характар
У сваім тэлеграм-канале ведамства апублікавала адказ на прынятую ўчора Еўрапарламентам рэзалюцыю, у якой Беларуская АЭС падверглася крытычным заўвагам.
Фота: Известия
«Не маючы пераканаўчых аргументаў, нават не дачакаўшыся папярэдняй справаздачы еўрапейскіх экспертаў ENSREG, якія на днях наведалі станцыю ў рамках партнёрскага агляду і працы якіх Еўракамісія надае так шмат увагі ў апошні час, Еўрапарламент, насуперак уласным прынцыпам «аб'ектыўнасці і непрадузятасці», прыняў адкрыта палітызаванае рашэнне», — пракаментавала рэзалюцыю Мінэнерга.
У рэзалюцыі, у прыватнасці, згадваецца, што БелАЭС пачала выпрацоўваць электраэнергію 3 лістапада 2020 года, нягледзячы на шматлікія праблемы бяспекі і без доказаў ступені выканання рэкамендацый экспертнага агляду ЕС 2018 года і Міжнароднага агенцтва па атамнай энергіі. Гэты агляд выявіў шматлікія недахопы, але да гэтага часу выканана толькі абмежаваная колькасць яго рэкамендацый.
Еўрапарламент выказвае заклапочанасць з нагоды размяшчэння Астравецкай атамнай электрастанцыі ў 50 км ад Вільні і ў непасрэднай блізкасці ад іншых краін ЕС. Таксама парламентарыі выказалі шкадаванне, што праект рэалізуецца, нягледзячы на пратэсты ў Беларусі.
Апроч таго Еўрапарламент заклапочаны, што праект БелАЭС «рэалізуецца як геапалітычны праект Беларусі і Расіі і што яго будаўніцтва і будучая эксплуатацыя з'яўляюцца крыніцай магчымай пагрозы Еўрапейскаму саюзу і яго дзяржавам-членам у дачыненні бяспекі, здароўя і аховы навакольнага асяроддзя».
Эксперты звярнулі ўвагу на адсутнасць празрыстасці і афіцыйнай інфармацыі аб паўтаральных аварыйных прыпынках рэактара і спыненні абсталявання на этапе ўводу станцыі ў эксплуатацыю ў 2020 годзе.