Ад 14 да 20 гадоў. Якія тэрміны запрасілі па «справе Атрадаў грамадзянскай самаабароны Беларусі»
Мінскі абласны суд 22 лістапада працягнуў разгляд «справы Атрадаў грамадзянскай самаабароны Беларусі», па якой праходзяць адразу пяць чалавек — Дзмітрый Сасноўскі, Аляксей Глотаў, Наталля Мацвеева, Вадзім Гулевіч, Кірыл Ашурак. Пра тое, як прайшло пасяджэнне і якія тэрміны запрасіла абвінавачанне для вязняў, распавялі праваабаронцы.
Агулам абвінавачваных судзяць па дзесяці артыкулах Крымінальнага кодэкса, у тым ліку за тэрарызм. Ім інкрымінуюцца тры эпізоды: спроба падрыву вузла сувязі Ваенна-марскога флоту Расіі ў Вілейцы, замах на прапагандыста Азаронка і спроба знішчыць лесанарыхтоўчую тэхніку ў лясгасах.
Справу разглядае сумнавядомы суддзя Сяргей Епіхаў.
На мінулым працэсе мусілі адбыцца спрэчкі бакоў, але раптоўна ў закрытым рэжыме дапыталі інжынера вайсковай часткі ў Вілейцы і абвясцілі перапынак, каб пракурор падрыхтаваў новае абвінавачванне Дзмітрыю Сасноўскаму — адзінаму фігуранту, які не прызнаў віну. У выніку яму перакваліфікавалі «падрыхтоўку да акта тэрарызму» на «акт тэрарызму». Сёння пракурор запрасіў для пяці фігурантаў тэрміны — ад 14 да 20 гадоў калоніі.
На судзе 22 лістапада Дзмітрый выказаў сваю пазіцыю адносна новага абвінавачвання, заявіўшы, што «гэта была правакацыя праваахоўных
органаў». Сасноўскі не прызнаў віну ў акце тэрарызму ў
дачыненні да прапагандыста Азаронка.
«Маё сумленне чыстае, я нічога не здзяйсняў, на ролю
тэрарыста я дакладна не падыходжу», — заявіў Дзмітрый.
Пракурор больш за гадзіну зачытваў новае абвінавачанне. Падсудны віну, як і раней, не прызнаў і папрасіў выклікаць у суд Азаронка.
На судзе таксама была агучана інфармацыя, што пасля заяў Сасноўскага аб тым, што ў дачыненні да яго супрацоўнікамі КДБ ужываўся гвалт, была праведзена пракурорская праверка.
Ва ўзбуджэнні крымінальнай справы ў дачыненні да
аператыўнікаў, якія яго затрымлівалі, было адмоўлена, паведаміў пракурор. Ён
папрасіў суд далучыць да матэрыялаў справы дакумент аб адмове.
Якія тэрміны запрасілі фігурантам?
Пракурор палічыў даказанай віну ўсіх пяці абвінавачваных фігурантаў і запрасіў вялікія тэрміны зняволення па наступных артыкулах Крымінальнага кодэкса Рэспублікі Беларусь:
Наталлі Мацвеевай — 14 гадоў калоніі ва ўмовах агульнага
рэжыму і штраф у памеры 400 базавых велічынь (12 800 рублёў) паводле ч. 2 арт.
290-4 («Удзел у дзейнасці тэрарыстычнай арганізацыі»), ч. 1 арт. 13 і ч. 2 арт.
289 («Падрыхтоўка да акта тэрарызму»), ч. 2 арт. 295-3 («Незаконныя дзеянні ў
дачыненні да прадметаў, дзеянне якіх заснавана на выкарыстанні гаручых рэчываў»);
Вадзіму Гулевічу — 18 гадоў калоніі ва ўмовах узмоцненага рэжыму і штраф у памеры 600 базавых велічынь (19 200 рублёў) паводле ч. 2 арт. 290-4 («Удзел у дзейнасці тэрарыстычнай арганізацыі»), ч. 2 арт. 289 («Акт тэрарызму»), ч. 1 арт. 290-2 («Садзейнічанне тэрарыстычнай дзейнасці»), ч. 1 арт. 13 і арт. 290-3 («Падрыхтоўка да праходжання навучання ці іншая падрыхтоўка для ўдзелу ў тэрарыстычнай дзейнасці»), ч. 4 арт. 295 («Незаконныя дзеянні ў дачыненні да агнястрэльнай зброі, боепрыпасаў і выбуховых рэчываў»);
Кірылу Ашурку — 15 гадоў калоніі ва ўмовах узмоцненага рэжыму і штраф у памеры 400 базавых велічынь (12 800 рублёў) паводле ч. 2 арт. 290-4 («Удзел у дзейнасці тэрарыстычнай арганізацыі»), ч. 6 арт. 16 і ч. 2 арт. 289 («Памагаты ў акце тэрарызму»);
Аляксею Глотаву — 20 гадоў калоніі ва ўмовах узмоцненага рэжыму і штраф у памеры 700 базавых велічынь (22 400 рублёў) паводле ч. 2 арт. 290-4 («Удзел у дзейнасці тэрарыстычнай арганізацыі»), ч. 2 арт. 289 («Акт тэрарызму»), ч. 1 арт. 13 і ч. 1 арт. 359 («Падрыхтоўка да ўдзелу ў акце тэрарызму ў адносінах да дзяржаўнага або грамадскага дзеяча»), ч. 1 арт. 14, ч. 2 арт. 295 і ч. 4 арт. 295 («Незаконныя дзеянні ў дачыненні да агнястрэльнай зброі, боепрыпасаў і выбуховых рэчываў»);
Дзмітрыю Сасноўскаму — 20 гадоў калоніі ва ўмовах узмоцненага рэжыму і штраф у памеры 700 базавых велічынь (22 400 рублёў) паводле ч. 1 арт. 361-1 («Стварэнне экстрэмісцкага фарміравання або ўдзел у ім»), ч. 2 арт. 290-4 («Удзел у дзейнасці тэрарыстычнай арганізацыі»), ч. 1 арт. 359 («Акт тэрарызму ў адносінах да дзяржаўнага або грамадскага дзеяча» [перакваліфікаваны на судовым працэсе з падрыхтоўкі]), ч. 6 арт. 16, ч. 1 арт. 13 і ч. 2 арт. 295, ч. 1 арт. 14 і ч. 4 арт. 295 («Незаконныя дзеянні ў дачыненні да агнястрэльнай зброі, боепрыпасаў і выбуховых рэчываў»), ч. 3 арт. 361 («Заклікі да санкцый»), ч. 1 арт. 130 («Распальванне іншай сацыяльнай варожасці»).
Пракурор прасіў суд улічыць у якасці змякчальнай акалічнасці прызнанне віны Мацвеевай, а таксама выкананне ёй умоў дасудовага пагаднення са следствам.
У верасні 2021 года Дзмітрый Сасноўскі, Аляксей Глотаў,
Наталля Мацвеева, Вадзім Гулевіч, Кірыл Ашурак унесены ў пералік фізічных
асоб, якія «маюць дачыненне да тэрарыстычнай дзейнасці».
У справе 15 тамоў. Следства праводзіў КДБ. Усе фігуранты ўтрымліваюцца ў СІЗА КДБ.