Галоўныя падзеі ў Беларусі за тыдзень: версія «Бі-бі-сі»
Затрыманні, шпіёнскія скандалы і магчымыя дэпартацыі — такімі былі навіны гэтага тыдня ў Беларусі.
Ілюстрацыйная выява «НЧ»
Польскія спецслужбы затрымалі грамадзянку Беларусі па падазрэнні ў шпіянажы; сілавікі арыштавалі ўдзельнікаў рок-гурта «Nizkiz»; суд у Літве адмовіў беларускай актывістцы Вользе Карач у палітычным прытулку. «Бі-бі-сі» расказвае пра галоўныя падзеі тыдня ў Беларусі.
Беларуску, якая жыве ў Польшчы, абвінавацілі ў працы на КДБ
9 студзеня Агенцтва ўнутранай бяспекі Польшчы (ABW) паведаміла пра затрыманне грамадзяніна Беларусі, які нібыта цягам некалькіх месяцаў перадаваў КДБ інфармацыю пра беларускую дыяспару, якая пражывае ў Польшчы.
У заяве не ўдакладнялася, пра каго менавіта ідзе гаворка.
Падазраванаму прад'яўлена абвінавачанне па артыкуле аб шпіянажы, які прадугледжвае пакаранне ў дыяпазоне ад 5 да 30 гадоў пазбаўлення волі.
Выданне «Зеркало» выказала здагадку, што гаворка ідзе пра актывістку Дар'ю Астапенка з горада Баранавічы. Гэтую ж інфармацыю пацвердзілі журналісты з Reform.by.
Глядзіце таксама
«Яшчэ да 2020 года дзяўчына кантактавала з рознымі апазіцыйнымі палітычнымі арганізацыямі і партыямі ў Беларусі, цікавілася іх дзейнасцю і хацела ў ёй удзельнічаць, прапаноўвала сваю дапамогу», — піша выданне са спасылкай на крыніцы.
Паводле інфармацыі «Зеркала», у 2023 годзе Астапенка пераехала ў Польшчу, дзе «спрабавала наладжваць кантакты з актывістамі дыяспары, пранікнуць у вядучыя беларускія арганізацыі ў Польшчы, прапаноўваючы ім сваю валанцёрскую дапамогу».
Паводле інфармацыі выданняў «Зеркало» і Reform.by, аднойчы Дар'я нібыта была нецвярозая і прагаварылася, што працуе на КДБ. Яе затрымалі на наступны дзень.
У Беларусі затрымалі ўдзельнікаў групы «Nizkiz»
У Магілёве затрымалі траіх з чацвярых удзельнікаў беларускага рок-гурта «Nizkiz». Пра гэта стала вядома з дзяржаўных СМІ.
Песня «Правілы» гурта «Nizkiz» стала адным з сімвалаў пратэсту ў 2020 годзе. Паводле звестак «Еўрарадыё», сярод затрыманых — вакаліст Аляксандр Ільін, басіст Сяргей Кульша і бубнач Дзмітрый Халяўкін.
Глядзіце таксама
Пазней праваабарончы цэнтр «Вясна» паведаміў, што 10 студзеня суд разгледзеў яшчэ адно адміністрацыйнае абвінавачанне ў дачыненні да Аляксандра Ільіна — «распаўсюд інфармацыйнай прадукцыі, якая змяшчае заклікі да экстрэмісцкай дзейнасці».
Рашэнне суду пакуль невядомае.
Мінабароны Беларусі будуе вайсковы гарадок ля мяжы з Украінай
Міністэрства абароны Беларусі пачало будаўніцтва вайсковага гарадка ў Гомельскай вобласці — прыкладна за 40 кіламетраў ад мяжы з Украінай. Пра гэта паведамляе «Радыё Свабода».
Журналісты спасылаюцца на дзяржаўную інвестыцыйную праграму на 2023 год, указ аб зацвярджэнні якой апублікаваны на Нацыянальным прававым інтэрнэт-партале.
Паводле інфармацыі «Радыё Свабода», будаўніцтва ідзе на тэрыторыі былога піянерскага лагера «Чайка», які знаходзіцца паміж Гомелем і Рэчыцай.
На тэрыторыі былога лагера стаіць будаўнічая тэхніка, рабочыя пракладваюць камунікацыі. Згодна з пашпартам праекта, заказчыкам будаўніцтва з'яўляецца Упраўленне капітальнага будаўніцтва Узброеных сіл Беларусі.
Літва адмовіла ў прытулку актывістцы Вользе Карач
Галоўны адміністрацыйны суд Літвы адмовіў беларускай актывістцы і кіраўніцы арганізацыі «Наш дом» Вользе Карач у прадастаўленні прытулку ў гэтай краіне.
Паводле слоў самой Карач, літоўскія ўлады падазраюць, што яна магла супрацоўнічаць з расійскімі спецслужбамі. Пра гэта актывістка расказала ў каментары «Зеркалу», назваўшы гэтыя падазрэнні абсурднымі.
Глядзіце таксама
У жніўні мінулага года Дэпартамент міграцыі Літвы прыняў пастанову не даваць Карач прытулак — на думку ўладаў, яе пражыванне ў Літве ўяўляе пагрозу нацыянальнай бяспецы, піша выданне LRT.
У Вольгі Карач ёсць від на жыхарства ў Літве, які дзейнічае да жніўня 2024 года. Яна заявіла, што мае намер абскардзіць рашэнне суда ў ЕСПЧ.
«Вясна»: больш за 200 чалавек былі затрыманыя па вяртанні ў Беларусь у 2023 годзе
Прынамсі 207 чалавек былі затрыманы пасля вяртання ў Беларусь у 2023 годзе за «апазіцыйную дзейнасць», піша ў сваёй справаздачы праваабарончы цэнтр «Вясна».
Паводле звестак праваабаронцаў, затрыманні закранулі грамадзян не толькі Беларусі, але і Украіны, Літвы і Расіі.
Прычынай для пераследу, сярод іншага, маглі стаць фотаздымкі з пратэстаў 2020 года, каментары ў сацсетках і фота з бел-чырвона-белай сімволікай.
Часцей за ўсё затрымлівалі тых, хто вяртаецца з Літвы, «але праверкі і затрыманні праводзяць на ўсіх прапускных пунктах, якія працуюць, у тым ліку і на мяжы з Расіяй», піша «Вясна».
Прынамсі 18 затрыманых прысудзілі паводле крымінальных артыкулаў, астатніх — да «сутак».