Хронікі рэпрэсій, 6 лістапада. Мінскаму бізнэсмену і чальцам ягонай сям'і пагражае па 12 гадоў зняволення
За «фінансаванне экстрэмісцкага фармавання» пачалі судзіць палітзняволенага фатографа. Распавядаем галоўнае, што стала вядома пра беларускіх палітвязняў сёння.
Паводле інфармацыі праваабаронцаў ПЦ «Вясна».
Мінскаму бізнэсмену Саўрыцкаму і ягонай сям'і пагражае па 12 гадоў за «распальванне варожасці»
Генадзю Саўрыцкаму 61 год. Ён родам з Мінска. Ягоны бізнэс — гэта ААТ «Анастан», буйная кампанія, якая займаецца вытворчасцю пенапласту, піша «Наша Ніва». Ягонай жонцы Ірыне 58 гадоў. Яна працавала спецыялісткай па продажах, а пасля менеджарам у «Анастане».
У сям'і дзве дачкі. Адна з іх, Віялета, у адной справе з бацькамі. Ёй 23 гады, яна скончыла школу ў Мінску, пасля паступіла ў Варшаўскую акадэмію мастацтваў. Дзяўчына захапляецца фатаграфіяй і любіць падарожжы.
Суд над сям'ёй пачнецца 13 лістапада ў Мінскім гарадскім судзе. Іх абвінавачваюць у «распальванні варажнечы» (ч. 3 арт. 130 КК). Судзіць сям'ю Саўрыцкіх будзе Міхаіл Макарэвіч. Акалічнасці справы невядомыя, як і сутнасць абвінавачання.
З'явілася інфармацыя аб прычыне смерці палітвязня Дзмітрыя Шлетгаўэра
Знаёмы сям'і Шлетгаўэра распавёў выданню «Зеркало», якую прычыну медыкі ўказалі ў пасведчанні аб смерці.
Па словах знаёмага сям'і, які зараз жыве за мяжой, у пасведчанні аб смерці палітвязня ўказаная прычына – «механічная асфіксія». Вельмі часта такі запіс робяць пры самагубствах.
Сям'я лічыць, што Дзмітрый не збіраўся забіваць сябе.
Глядзіце таксама
У Лепелі супрацоўніка «Белтэлекама» судзілі за «экстрэмізм» на родным прадпрыемстве
Прынамсі, так вынікае з раскладу суда Лепельскага раёна, піша тэлеграм-канал @vitebsk_info.
Электрамеханіка лінейных збудаванняў сувязі і абаненцкіх прылад Юрыя Паршко абвінавачвалі па двух адміністрацыйных артыкулах — «распаўсюдзе экстрэмісцкіх матэрыялаў» і «несанкцыянаваным пікетаванні».Судовы працэс узначальваў суддзя Міхаіл Юрчанка.
За «фінансаванне экстрэмісцкага фармавання» пачалі судзіць палітзняволенага фатографа
Арцёму Зянькову з Мінска 40 гадоў. Вядома, што ён займаецца фатаграфіяй і мае фірму, якая дае ў арэнду фотаабсталяванне. У мужчыны ёсць жонка і непаўналетняе дзіця, піша «Наша Ніва».
Зянькова пачалі судзіць сёння, 6 лістапада, у Мінскім гарадскім судзе. Яго абвінавачваюць у «фінансаванні дзейнасці экстрэмісцкага фарміравання» (арт. 361-2 КК). Звычайна па такіх артыкулах судзяць за данаты. Іншыя падрабязнасці справы невядомыя.
Судовы працэс узначальвае суддзя Жанна Брысіна.
У Лідзе спыніў працу вядомы ў горадзе рэстаран «Vashi Guli» — яго ўладальніка двойчы затрымлівалі за «экстрэмізм»
Пра закрыццё ўстановы з радасцю паведамляюць праўладныя тэлеграм-каналы.
Гэтым летам уладальніка ўстановы як мінімум двойчы затрымлівалі за «распаўсюд экстрэмісцкіх матэрыялаў». Праўладныя тэлеграм-каналы пішуць, што закрыццё рэстарану звязанае з гэтым фактам.
У «экстрэмісцкі» спіс дадалі лагатып Telegram-каналу «Šufliadka» — літару «Š» з беларускага лацінскага алфавіту Мінінфарм назваў «польскай»
Сёння Міністэрства інфармацыі абнавіла Рэспубліканскі спіс экстрэмісцкіх матэрыялаў. Сярод іншых, у яго дадалі Telegram-канал «Šufliadka» — адпаведнае рашэнне прынятае судом Ленінскага раёну Гродна 4 лістапада. Таксама «экстрэмісцкім» прызнаны лагатып каналу — «графічная выява белага колеру на чорным фоне ў выглядзе шуфлядкі, верхняя вечка якой намаляваная ў форме, падобнай з літарай "Š" з польскага алфавіту.
Праваабаронцы адзначаюць, што ў польскім алфавіце няма літары «Š» — яна ёсць у шэрагу славянскіх моў, у тым ліку ў лацінскім варыянце беларускага алфавіту. Да нядаўняга часу, лацінскі варыянт транслітэрацыі з літарай «Š» сустракаўся ў грамадскіх месцах па ўсёй Беларусі.