Хронікі рэпрэсій у Беларусі за 22 лістапада

З дапамогай праваабаронцаў і незалежных СМІ сабралі звесткі пра палітычныя рэпрэсіі ў Беларусі за 22 лістапада.

imgl7736_logo.jpg

Палітзняволенага Антона Якавука асудзілі на год калоніі за адно слова ў адрас Лукашэнкі

18 лістапада вынесены прысуд 29-гадоваму палітзняволенаму Антону Якавуку. Яго прызналі вінаватым паводле арт. 368 Крымінальнага кодэкса за тое, што ён выклаў у сторыз у Інстаграм відэа з Лукашэнкам з каментаром з аднаго «зняважальнага» слова.

Суддзя Марына Скалковіч агучыла прысуд: год пазбаўлення волі ў калоніі агульнага рэжыма. Жанчына вядомая палітычна матываванымі прысудамі.

Новыя экстрэмісты. «Беларускі Тэлеграм» прызналі «экстрэмісцкімі матэрыяламі», а гродзенскае выданне — «экстрэмісцкім фармаваннем»

 Выданне Hr*dna.life — прызналі «экстрэмісцкім фармаваннем». Рашэнне было прынята КДБ Беларусі яшчэ 11 лістапада.

«Група грамадзян з ліку стваральнікаў, удзельнікаў і адміністратараў інтэрнэт-рэсурсу Hrodna.life, Telegram-каналаў «Гродна like!», Hrodna One Love, а таксама YouTube-канала Hrodna One Love ажыццяўляе экстрэмісцкую дзейнасць», — адзначаецца ў «Пераліку арганізацый, фарміраванняў, індывідуальных прадпрымальнікаў, якія маюць дачыненне да экстрэмісцкай дзейнасці».

Па заяве пракуратуры Цэнтральнага раёна Мінска Telegram-канал «Беларускі Тэлеграм» прызнаны экстрэмісцкімі матэрыяламі. 

Пікетаваў аб'явай пра продаж на Куфары

Мінчука адправілі за краты за «пікетаванне аб'явай пра продаж календара з Пагоняй» на «Куфары»

У пачатку лістапада ў Мінску затрымалі хлопца па скарзе «неабыякавай грамадзянкі». Нібыта ён «з мэтай публічнага выказвання сваіх грамадска-палітычных інтарэсаў правёў пікетаванне, шляхам размяшчэння аб'явы пра продаж календара з выявай Пагоні і лозунгамі: «Жыве Беларусь!», «Жыве вечна!», «Не разбіць!», «Не спыніць!», «Не стрымаць!»«. Міліцыянты расцанілі гэта як «несанкцыянаванае пікетаванне» і склалі пратакол паводле арт. 24.23 КаАП.

Хлопец на судзе паведаміў, што аб'яву размясціў у пачатку кастрычніка і не думаў, што гэта з'яўляецца правапарушэннем. Мэты пікетаваць такім чынам у яго не было. На судзе зачыталі і тлумачэнні сведкі, па словах якой, яна зайшла на сайт «Kufar» і пабачыла аб'яву з Пагоняй і лозунгамі. Суд Ленінскага раёна Мінска асудзіў хлопца да 15 сутак адміністрацыйнага арышту.


Затрыманы лідар прадпрымальнікаў Анатоль Шумчанка.

Ён не вярнуўся з допыту ў Баранавічах, куда ездзіў 21 лістапада.

 

Былога палітвязня Іллю Міронава арыштавалі на 5 сутак

19 лістапада Ілля паведаміў, што пакуль ён быў у Мінску, да яго прыходзілі сілавікі. Тады ён пісаў, што прычына візіту міліцыянтаў стане вядомая ў панядзелак.

Учора, у панядзелак, яго і затрымалі па адміністрацыйнай справе наўпрост у РАУС. Іллю асудзілі за «распаўсюд экстрэмісцкіх матэрыялаў» (19.11 КаАП) — знайшлі падпіску на «экстрэмісцкі» канал.

Нагадаем, 24 кастрычніка Іллю асудзілі да 1,5 года калоніі па «справе Зельцэра». За кратамі яго ўтрымлівалі больш за год. 

19-гадоваму палітвязню Іллю Верамееву пакінулі прысуд без зменаў. Хутка яго этапуюць у калонію

24 лютага Ілля Верамееў з Гомеля пачаў перапіску ў Telegram з сястрой Янай каля пятай раніцы. Прычына — уварванне расійскіх войскаў ва Украіну і абстрэл горада Мікалаеў, у якім жыла на той момант яго сястра. Ілля вельмі хваляваўся за яе. Праз тры дні хлопца затрымалі — пасля яго заклікаў у мясцовым чаце аказваць супраціў і пачаць дзейнічаць супраць вайны: на месцы збору з гамельчукамі яго чакалі сілавікі.

Іллю асудзілі да 6,5 гадоў калоніі.

«Ён успрыняў гэта ўсё спакойна. Ён вельмі верыць у беларусаў і Украіну, што ўсё будзе добра»

22 лістапада апеляцыйную скаргу палітвязня пакінулі без задавальнення, а прысуд без зменаў. Хутка яго этапуюць у калонію.

У Брэсце адбыліся масавыя затрыманні

Беларускія СМІ, прызнаныя экстрэмісцкімі, паведамілі, што ў Брэсце ў апошнія дні адбыліся масавыя затрыманні. Гэта здарылася 16-18 лістапада.

Затрымлівалі тых, каго раней ужо судзілі па адміністрацыйных артыкулах. Паводле «Б*лсата», у ІЧУ Брэста цяпер знаходзіцца шмат дальнабойшчыкаў.

Абвінавачанне запрасіла тэрміны аграмадныя тэрміны па «справе АГСБ» — Ад 14 да 20 гадоў калоніі

Мінскі абласны суд сёння, 22 лістапада, працягнуў разгляд «справы Атрадаў грамадзянскай самаабароны Беларусі».  Пяці фігурантам інкрымінуюцца тры эпізоды – спроба падрыву вузла сувязі Вайскова-марскога флоту Расіі ў Вілейцы, замах на прапагандыста Рыгора Азаронка і спроба знішчыць лесанарыхтоўчую тэхніку ў лясгасах.

Сёння пракурор запрасіў для пяці фігурантаў тэрміны — ад 14 да 20 гадоў калоніі:

Наталлі Мацвеевай – 14 гадоў калоніі і штраф 400 базавых,

Вадзіму Гулевічу – 18 гадоў калоніі і штраф 600 базавых,

Кірылу Ашурку – 15 гадоў калоніі і штраф 400 базавых,

Аляксею Глотаву – 20 гадоў калоніі і штраф 700 базавых,

Дзмітрыю Сасноўскаму – 20 гадоў калоніі і штраф 700 базавых.


Палітвязень Мікалай Статкевіч у калоніі захварэў на прастуду. Меркавана, ён зноў у ШІЗА

У лісце да жонкі ад 10 лістапада палітвязень напісаў, што яго ў чарговы раз выклікалі на камісію за «парушэнні». Меркавана, яго зноў адправяць у штрафны ізалятар.

«...падчапіў нейкі вірус — тэмпература, галаўны боль, невялікі кашаль. Але ж пройдзе. У астатнім усё, як звычайна. Заўтра выклікаюць на камісію. Так што зноў будзе перапынак у маіх лістах. «

Нагадаем, Статкевіч знаходзіцца за кратамі амаль 2,5 гады. 14 снежня 2021 Мікалаю быў вынесены прысуд: 14 гадоў зняволення ў калоніі асаблівага рэжыму. У канцы чэрвеня быў этапаваны з гомельскага СІЗА-3 у глыбоцкую калонію № 13. З таго часу яго рэгулярна змяшчаюць у ШІЗА. 

Марыю Калеснікаву змясцілі ў ШІЗА

Нядаўна Марыя Калеснікава, асуджаная да 11 гадоў калоніі, атрымала тры спагнанні ад адміністрацыі гомельскай жаночай калоніі: за знаходжанне ў працоўны час не ў тым месцы і за няветлівы зварот з яе боку.

Сёння да яе не пусцілі адваката, бо нібыта ад яе не было заявы. Калі і на які тэрмін Марыю змясцілі ў штрафны ізалятар — невядома.