Хронікі рэпрэсій за 29 верасня

Суткі за аплікацыю на тэлефоне, штраф за малюнак сцяга 30-гадовай даўніны і затрыманне за ролік у Цік-Току — такія навіны сённяшняга дня з палёў рэпрэсій.

***

Аўтары «Новага Часу» Мікола Дзядок і Дзяніс Івашын ужо каля тысячы дзён знаходзяцца за кратамі. Мікола ўтрымліваецца ў палоне рэжыму 1051 дзень, Дзяніс — 931.

***

У судзе Рагачоўскага раёна 6 верасня адбыўся працэс над жыхаром аграгарадка Лучын Рагачоўскага раёна. Яго абвінавацілі ў «несанкцыянаваным пікетаванні» (арт. 24.23 КаАП) бел-чырвона-белым сцягам на плоце каля яго дома, піша «Вясна».

На судзе мужчына растлумачыў, што «калі купіў дом і ўладкоўваў яго, то з мэтай упрыгожвання намаляваў на плоце сцяг, які на той момант быў дзяржаўным». Пазней за гэтыя 30 гадоў ён некалькі разоў падфарбоўваў сцяг, апошні раз — каля 5-6 гадоў таму.

У выніку суд прызнаў мужчыну вінаватым і аштрафаваў яго на 740 рублёў (20 базавых велічынь). 

***

Праўладны ютуб-канал апублікаваў відэа, у якім сцвярджаецца, што сілавікі атрымалі доступ да ўнутранага чата праваабарончага цэнтра «Вясна». Праваабаронцы адмаўляюць гэта.

У роліку паказваюць два чаты: «Агульны канал» з 9 удзельнікамі і «Маніторынг» з 19 удзельнікамі. У чаты скідалі публікацыі праўладных каналаў з «пакаяльнымі відэа» затрыманых. Па кожным затрыманым удзельнікі запаўнялі анкету, куды ўносілі вядомыя звесткі пра чалавека, прычыну і месца затрымання.

У відэа вядучая кажа, што ўдзельнікі чата вызначалі імя і прозвішча затрыманых з дапамогай тэлеграм-бота «Вока Бога», які шукаў старонкі затрыманых у сацсетках па скрыншотах з ролікаў сілавікоў. Каб перашкаджаць гэтаму, сілавікі размяшчаюць вадзяны знак на тварах затрыманых.

Праваабарончы цэнтр «Вясна» паведаміў «Медыязоне», што ведае пра сітуацыю і разбіраецца з дэталямі.

«Аднак можам дакладна сказаць, што ўцечак звестак пра людзей, якія да нас звярталіся, не адбылося. Таксама звяртаем увагу, што на відэа — валанцёрскі чат, а не чат супрацоўнікаў «Вясны» (як гэта сцвярджаецца сілавікамі)», — паведамілі праваабаронцы.

***

У Бабруйску затрымалі мужчыну па імені Міхаіл, цяпер ён знаходзіцца пад вартай. Тэлеканал «Бабруйск 360» зняў з ім «пакаяльнае відэа» і паабяцаў расказаць пра затрыманне «групы экстрэмістаў, якія былі ўдзельнікамі мерапрыемства «Шашлычок». Пра гэта піша «Зеркало».

Мужчыну прымусілі сказаць, што ён у 2020 годзе «трапіў пад уплыў дэструктыўных рэсурсаў, удзельнічаў у акцыях пратэсту, развешваў стужачкі». Пазней ён «даведаўся пра акцыю «Шашлычкі», у якой «вырашыў паўдзельнічаць і пазнаёміцца з астатнімі людзьмі». Ён растлумачыў, што ў акцыі «Шашлычкі» бралі ўдзел «людзі, пратэсна настроеныя».

Сцвярджаецца, што аднойчы ў Міхаіла папрасілі дапамогі для здымкі відэа з імітацыяй ранення. Ён пагадзіўся зрабіць прыладу, як у фільмах пра каскадзёраў. Яна складалася з петарды, дроту для ўзгарання і батарэйкі для актывацыі.

Тэлеканал не агучыў артыкулы, па якіх падазраецца або абвінавачваецца Міхаіл.

***

У судзе Бярэзінскага раёна 11 верасня асудзілі мужчыну паводле арт. 19.11 КаАП («Распаўсюджанне экстрэмісцкіх матэрыялаў»). Паводле матэрыялаў справы, у яго тэлефоне міліцыянты знайшлі аплікацыю «Новости Беларуси — Zerkalo.io». 

На судзе ён прызнаў віну і патлумачыў, што набыў тэлефон за месяц да затрымання з ужо ўсталяванай аплікацыяй, але не выдаліў яе, паведамляюць праваабаронцы.

Суд адзначыў, што забароненую інфармацыйную прадукцыю мужчына захоўваў менавіта для распаўсюджання, што пацвярджаецца ў тым ліку тым, што «ён забяспечыў доступ супрацоўніка міліцыі да экстрэмісцкіх матэрыялаў, тым самым распаўсюдзіў гэту прадукцыю».

Вынікам суда стаў 15-сутачны арышт.

***

Вярхоўны суд прыступіў да разгляду пазову супраць апошняй дэмакратычнай партыі «Справядлівы свет», піша «Салідарнасць».

2 чэрвеня партыя падала заяву на перарэгістрацыю без спісу сяброў: гэта было зроблена з мэтай бяспекі. Вярхоўны суд адхіліў і заяву, і скаргу аб адмове ў рэгістрацыі.

У Беларусі засталося толькі чатыры партыі. Усе яны праўладныя.

***

Сілавікі затрымалі 21-гадовага слесара, які надзеў для роліка ў Цік-Току міліцэйскую форму (артыкул 24.28 КаАП), паведамляе тэлеграм-канал «Милиция Минска».

Затрыманы выклаў у акаўнт два фотаздымкі. На першым ён сядзіць у кашулі, на другім — стаіць у міліцэйскай форме. «Сёння кент, заўтра мент», — пазначана на подпісах да фота, піша «Медыязона».

«Пры гэтым публікацыя суправаджалася песняй, якая змяшчае нецэнзурныя выразы», — расказаў намеснік начальніка ўпраўлення па Мінску ГУУБ МУС Міхаіл Шчэрба. Што менавіта за песня была ў Цік-Току — невядома.

Міліцэйскае відэа апублікавалі і ў Цік-Току затрыманага. У сацыяльных сетках акаўнты хлопца падпісаны Кірылам Мураўёвым.

***

Экс-кіраўнік «Аховы птушак Бацькаўшчыны» Віктар Фянчук — на свабодзе. Ён адбываў тэрмін у магілёўскай калоніі №15. Паводле інфармацыі «Еўрарадыё», палітвязень цалкам адбыў тэрмін і выйшаў на волю.

Віктар — прафесійны арнітолаг, каардынатар праграм Франкфурцкай заалагічнай супольнасці і арганізацыі «Ахова птушак Бацькаўшчыны». Узначальваў апошнюю з 2007 па 2014 год, затым быў яе супрацоўнікам. Яго называюць «адвакатам дзікай прыроды».

Палітвязня прысудзілі да 2,5 гадоў калоніі паводле ч.1 арт. 342 Крымінальнага кодэкса («Актыўны ўдзел у дзеяннях, якія груба парушаюць грамадскі парадак»).

Паводле матэрыялаў справы, «ён блакіраваў рух транспарту на праезнай частцы і выкрыкваў розныя лозунгі. У ходзе расследавання выяўлена яшчэ пяць аналагічных эпізодаў, учыненых ім».

***

У «Спіс экстрэмістаў» дадалі яшчэ 34 прозвішчы — цяпер у ім 3358 чалавек.

29 верасня МУС зрабіла традыцыйны пятнічны апдэйт «Пераліку грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Сярод іншых, у спіс дадалі 17-гадовага фігуранта справы СБНШ Алега Дабрыднёва, слесара Алега Кардаша, асуджанага за самвыдат «Веснікі» Андрэя Фаміна.

***

Пятую частку сродкаў, сабраных падчас Марафону салідарнасці з палітычнымі вязнямі Беларусі, а гэта больш за €500 тысяч, размеркавалі паміж профільнымі арганізацыямі. Пра гэта «Белсату» паведаміла прадстаўніца Аб’яднанага пераходнага кабінета па сацыяльнай палітыцы Вольга Гарбунова.

На гэты момант сямі арганізацыям пераведзены €104 000 з 574 617, сабраных падчас Марафону салідарнасці.

Грошы размеркавалі наступным чынам:

• Праваабарончая ініцыятыва дапамогі палітзняволеным «Dissidentby» — €13 500;
• Дабрачынны фонд «Краіна для жыцця» — €13 000;
• Дабрачынная арганізацыя «Littouwin Lions Club» — €13 500;
• Фонд дапамогі беларусам у Літве «Razam» — €13 500;
• Беларуская рада культуры — €9 500;
• Ініцыятыва «BY_help» — €27 500;
• Анархічны чорны крыж – Беларусь — €13 500.

***

Як паведамляе ініцыятыва прадстаўніцы па сацыяльнай палітыцы АПК Вольгі Гарбуновай@klopat_by, на сённяшні дзень няма аніякіх звестак пра самых вядомых палітзняволеных: Марыю Калеснікаву — 227 дзён, Максіма Знака — 232 дні, Мікалая Статкевіча — 233 дні, Ігара Лосіка — 222 дні, Сяргея Ціханоўскага — 204 дні, Віктара Бабарыку — 155 дзён, Уладзіміра Гундара — 55 дзён.

***

Паводле звестак праваабаронцаў «Вясны», на дадзены момант у беларускіх турмах утрымліваюцца 1491 палітычны зняволены. Ініцыятыва «Dissidentby» вызнае палітвязнямі 1726 чалавек. Сярод іх — 193 жанчыны і 8 непаўнагадовых. 18 палітвязняў адпраўлены на прымусовае лячэнне.