«Кошт школьных абедаў можна зніжаць на 30%». Бацькі па капейках расклалі кошт харчавання сына
Вучань 6 класа мінскай школы фатаграфаваў у школе абеды, прыносіў дадому, а маці гатавала тыя ж стравы, але з крамных прадуктаў.
Затым параўноўвала, колькі выдаткавала грошай сям'я, а колькі — камбінат
школьнага харчавання. Пасля гэтага бацька школьніка звярнуўся з заявай у
камбінат з просьбай паменшыць плату за харчаванне.
— Мы з жонкай прыйшлі да высновы, што кошт харчавання ў школе крыху дарагаваты і яго можна смела зніжаць на 30%. Наша сям'я таксама ходзіць па крамах, робіць пакупкі. Зараз на акцыях рэальна можна купіць прадукты па добрых коштах, — распавядае Віктар, бацька вучня 6 класа адной са школ у Фрунзенскім раёне Мінска.
На думку бацькоў хлопчыка, кошт школьнага абеду, які цяпер у дзень абыходзіцца ў 2 рублі 70 капеек, моцна завышаны. Пытанне эканоміі ў сям'і паўстала толькі ў гэтым годзе, калі малодшая дачка пайшла ў дзіцячы сад.
— У мінулым годзе было лягчэй, зараз цяжка. Праца стала менш аплачваецца, пачаў разбірацца, дзе можна зэканоміць, — тлумачыць мінчанін Віктар. — Для нас нават 5 зэканомленых рублёў маюць значэнне. Напрыклад, цяпер у школе папрасілі здаць такую ж суму на дабрачыннасць, але ў нас такіх лішніх грошай няма.
Бацькі папрасілі сына сфатаграфаваць абеды ў школе. Затым Таццяна дастала шалі, ўзважыла прадукты, прыгатавала сапраўды такі ж абед, на вока вызначылі: супадае ён па грамах з тым, што захаваны ў сына на тэлефоне ці не. Калі карцінкі візуальна былі аднолькавымі, жанчына прынялася лічыць. Кожную пазіцыю расклала па капейках.
Напрыклад, у школе за порцыю макаронаў з мясам і гарбату з лімонам трэба заплаціць 2,7 рублёў, а па падліках Таццяны — 1,2 рублі. Вось як яна распісала кошт: макароны (200 гр.) — 0,2 рублі, мяса (100 гр.) — 0,7 рублёў, цытрына (25 гр.) — 0,125 рубля, астатняе — 0,2 рубля. Другі комплекс, каша прасяная з курыным шашлыком, Таццяне абыйшоўся ў 2 рублі, а макароны з катлетай і кісель у 1 рубель 40 капеек.
— Я не прэтэндую на ісціну, магчыма, дзесці ў разліках ёсць недакладнасці, але калі муж папрасіў у камбіната школьнага харчавання даць поўнае меню, распісанае па грамах, яму нічога не адказалі, — каментуе Таццяна. — Кошт маіх абедаў разлічаны, зыходзячы з прадуктаў, набытых у крамах. Камбінату ж прадукты пастаўляюць оптам, па больш нізкім кошце. Нават, калі яны ў канчатковы кошт закладваюць падвоз, працу супрацоўнікаў, усё роўна ёсць магчымасць зрабіць абед таннейшым. Напрыклад, у дзіцячым садзе нашай дачкі пяціразовае харчаванне ў дзень абыходзіцца ў 3,23 капейкі, пры тым, што ў меню прысутнічае 80 грам ялавічыны. Дык чаму ў школьнікаў яно такое дарагое? Дзецям не даюць сезоннай гародніны, 2 з 3 абедаў, якія сфатаграфаваў сын, складаюцца з макаронаў.
Віктар афіцыйна звярнуўся да Камбіната школьнага харчавання Фрунзенскага раёна Мінска.
— Арыенціровачны кошт у 2,7 рублёў для комплексаў 5-11 класаў даведзены да УП «КШП Фрунзенскага раёна» Галоўным упраўленнем спажывецкага рынку Мінгарвыканкама. У дадзены момант сумесна з Галоўным упраўленнем спажывецкага рынку Мінгарвыканкама распрацавана меню з улікам натуральных норм і дзейных санітарных норм і правілаў на суму ў 2,5 рубля, — сказана ў адказе Камбіната школьнага харчавання Фрунзенскага раёна.
Нядаўна ў школе Віктару перадалі дамову аб заключэнні паслуг з КШП, у дакуменце пазначаны кошт абеду ў 2,5 рубля. Аднак ёсць нюанс — кошт харчавання могуць падняць у любы час. Мужчына унёс рознагалоссі ў пратакол і перадаў адміністрацыі школы.
— Кошт абеду складаецца з пакупнога кошту тавару, гэта значыць, па якім камбінат школьнага харчавання купіў у вытворцы, затым да гэтага кошту дадаецца гандлёвая надбаўка, нацэнка грамадскага харчавання і падатак на дададзены кошт. Вось з гэтага складаецца 2,5 рублі, — каментуюць спецыялісты Галоўнага ўпраўлення спажывецкага рынку Мінгарвыканкама. — Прычым гандлёвая надбаўка і нацэнка ў нас прапісаныя заканадаўча. І памер гэтай гандлёвай нацэнкі і надбаўкі усталяваны з выдаткаў, якія фактычна склаліся па прадпрыемстве, каб мы маглі пакрыць выдаткі па транспартоўцы, па захоўванні прадукцыі, па выплаце заработнай платы тым жа кухарам, кухонным рабочым, а таксама амартызацыі абсталявання.
Ва ўпраўленні адзначылі, што меню для школьнікаў складаецца па патрабаванню санстанцыі і яно «даволі разнастайнае».
Паводле tut.by