Рост у два разы. У Магілёве яшчэ адна першакласніца пачала вучыцца па-беларуску

У беларускамоўным першым класе магілёўскай школы №1 папаўненне. Да першакласніка Валянціна Асіпчыка далучылася Дар’я Койда.

Цяпер Валянцін не будзе вучыцца адзін, як Ялінка Салаўёва з 8 класа ў той жа першай школе Магілёва. Усяго ў Магілёве цяпер па-беларуску вучацца шасцёра школьнікаў.

Спачатку бацькі Дар’ю Койду аддалі ў клас з рускай мовай навучання, а праз чатыры дні вырашылі, што дачцэ лепей вучыцца па-беларуску. Валянцін і Дар’я сваёй невялікай кампаніяй задаволеныя і не адчуваюць дыскамфорту.

Мы хочам для дзіцяці найлепшага. Няхай вучыцца па-беларуску

Маці першакласніцы Марына кажа, што на рашэнне аддаць дачку вучыцца па-беларуску паўплываў аўтарытэт настаўніцы Наталлі Аржанавай, у якой Дар’я рыхтавалася да вучобы.

«Над пытаннем, ці пераводзіцца, асабліва не разважалі, калі даведаліся, хто ўзяў беларускі клас, — казала яна. — Вырашылі, няхай дачка вучыцца на роднай мове, і мы з ёю таксама будзем вучыць нашу мову. На наш сорам, мы яе разумеем, але гаварыць не можам».

Марына спадзяецца, што вучняў у беларускім класе стане болей. Ёсць бацькі, запэўнівала яна, гатовыя аддаць сваіх дзяцей вучыцца па-беларуску, але яны пакуль у роздумах.

«Вядома ж, у клас не прыйдзе 25 чалавек, але спадзеў на тое, што набярэцца да дзесяці вучняў, ёсць, — кажа Марына Аляксандраўна. — Тое, што дачка вучыцца ў малакамплектным класе, мяне не бянтэжыць. Гэта, наадварот, вялікі плюс. Будзе індывідуальнае навучанне, і дачка лепей засвоіць урокі. У класе з дваццаццю пяццю вучнямі ўвагі на кожнага па паўтары хвіліны, а ў дзяцей жа свае здольнасці да навучання, таму індывідуальны падыход паспрыяе паспяховасці. Бацькі жадаюць сваім дзецям найлепшага, і мы лічым, што беларускае навучанне будзе развіваць Дар’ю».

Дачцэ не пагражае ізаляцыя

Маці перакананая, што вучоба ў класе з малой колькасцю вучняў не будзе пагражаць дачцэ сацыяльнай ізаляцыяй, што турбуе шмат якіх бацькоў, што апынуліся перад выбарам, ці аддаваць дзяцей у такія класы.

«Днямі бабуля ў Дар’і выпытвала, ці добра ёй у малым класе. На гэта дачка адказала, што з ёй вучыцца адзін хлопчык і больш ёй нікога не трэба», — прыгадала Марына Аляксандраўна і запэўніла, што стасункаў з іншымі дзецьмі ў Дар’і хапае.

«У „прадлёнцы“ і на перапынках яна сябруе з іншымі дзяўчаткамі, і праблемаў няма. Дарʼя — таварыскае дзіця. Што да ўрокаў, дык яны ж не гульня. На іх трэба вучыцца. Таму мяне не турбуе пытанне, што дачка праз вучобу ў малакамплектным класе будзе ізаляваная ад свайго сацыяльнага асяроддзя».

У беларускім класе здаровая канкурэнцыя

Пра тое, што беларускі клас папоўніўся дзяўчынкай, бацькі Валянціна Асіпчыка, які вучыцца па-беларуску пайшоў з першага верасня, даведаліся ад сына.

«Гэтая навіна Валянціна ўзрадавала. Хоць мы лічым, што ён даволі самастойны для свайго веку і адзінота ў класе яго не турбавала. Аднак для навучальнага працэсу наяўнасць маленькага калектыву добра. Настаўніца Наталля Аляксандраўна лічыць, што яшчэ лепей было б, каб вучняў стала чацвёра. Мы ж ёй жартам кажам:

„Глядзіце, каб не набралася дваццаць чатыры“. Жарты жартамі, але ўжо пачалі цікавіцца клясам», — адзначыў тата Валянціна Ігар Георгіевіч.

Па-беларуску ў Магілёве, акрамя першакласнікаў Валянціна Асіпчыка ды Дар’і Койды, вучацца ў 8-й класе школы № 1 Яліна Салаўёва, у другім класе школы № 34 Таццяна Турандзіна, Эвэліна Самойленка ды Улада Грыцанава.

 Для ТБМ з’яўленне беларускага класа стала неспадзяванкай

 Тым часам для актывістаў мясцовай суполкі ТБМ, якія займаюцца пошукам ахвотнікаў вучыцца па-беларуску, з’яўленне сёлета беларускага класа стала нечаканасцю.

«Наўрад ці ў з’яўленні беларускага класа ёсць наша заслуга, — пракаментаваў сітуацыю кіраўнік суполкі Алег Дзьячкоў. — Гэта прыемная неспадзяванка. Зразумела, пасябруем з бацькамі дзяцей гэтага класа і будзем рабіць усё, што ў нашых сілах, каб у ёй стала больш вучняў».

ТБМаўцы неўзабаве збіраюцца выступіць перад бацькамі вучняў другіх класаў 34-й школы, у якой па-беларуску вучацца тры дзяўчынкі. Актывісты спадзяюцца, што некаторыя бацькі ўсё ж наважацца перавесці сваіх дзяцей з рускамоўных класаў у беларускі.

 Чыноўнікі запэўнівалі: сёлета беларускага класу не будзе

 Паводле чыноўнікаў, стварэнне новых класаў з беларускай мовай навучання ў Магілёве маруднае, бо бацькі не хочуць аддаваць дзяцей вучыцца па-беларуску. Рупліўцы ж беларушчыны трымаюцца пазіцыі, што чыноўнікі і адміністрацыі школаў не ўдзяляюць належнай увагі развіццю ў горадзе беларускага школьніцтва.

На адной з апошніх дыскусіяў на тэму беларускамоўнага навучання прагучалі запэўніванні, што да наступнага навучальнага году на базе 45-й школы будзе сфармаваны паўнавартасны клас з беларускай мовай навучання.

www.svaboda.org