Кожны пяты. Чаму беларусы масава хаваюць свае псіхічныя расстройствы

Па дадзеных СААЗ, кожны пяты чалавек у свеце пакутуе тым ці іншым псіхічным расстройствам альбо адчувае эмацыянальнае перанапружанне. Гэта актуальна і для Беларусі. У нашай краіне штогод да лекараў-псіхіятраў звяртаюцца больш за 300 тыс чалавек, аднак многія хаваюць свае праблемы ад родных і не звяртаюцца па дапамогу, што пагаршае іх стан.

Трывожнай тэндэнцыяй падзялілася Беларускае Таварыства Чырвонага Крыжа напярэдадні Сусветнага дня псіхічнага здароўя, які адзначаецца 10 кастрычніка.
Беларусь паўтарае сусветныя тэндэнцыі. Шалёны рытм жыцця, пастаянныя перагрузкі і стрэсавая праца робяць людзей уразлівымі да псіхічных і паводніцкіх расстройстваў. Па дадзеных Сусветнай арганізацыі аховы здароўя, імі пакутуе кожны чацвёрты-пяты чалавек. А кожны другі рызыкуе захварэць на працягу жыцця.
Асноўная небяспека — у тым, што ўсім бачная толькі «вяршыня айсберга». Афіцыйная статыстыка ахоплівае тых, хто знаходзіцца пад дыспансэрным наглядам. У Беларусі гэта тычыцца крыху больш за 1% насельніцтва. Звыш за палову з іх — каля 60 тысяч чалавек — маюць інваліднасць.
«Праблема псіхічнага здароўя для Беларусі вельмі актуальная. Асабліва яе прыхаваная форма, калі людзі не звяртаюцца па дапамогу да ўрачоў або псіхолагаў. Многія асцерагаюцца «нязручнага» дыягназу, праблем на працы і сацыяльных цэтлікаў, — адзначаюць у Беларускім Таварыстве Чырвонага Крыжа. — На самай справе ніхто не застрахаваны ад праблем з псіхікай. Але калі ад іх не ўцякаць, то ўсё можна паправіць. Напрыклад, можна бясплатна звярнуцца ў «Адкрыты дом» у Мінску і атрымаць псіхалагічную дапамогу і падтрымку, як самім пацыентам, так і іх блізкім сваякам.
Але дапамога патрабуецца не толькі тым, хто сутыкнуўся з псіхічнымі расстройствамі. Мяняцца павінна і само грамадства: перастаць баяцца тых, хто здаецца дзіўным.
«Час мяняць стаўленне грамадства, каб да псіхічных захворванняў ставіліся гэтак жа, як і да любых іншых. Каб працадаўцы ў Беларусі не асцерагаліся браць іх у штат, а бацькі не асцерагаліся пакінуць дзіця з равеснікам, паводзіны якога могуць здавацца дзіўнымі. Забабоны і стэрэатыпы замінаюць такім людзям стаць часткай грамадства і жыць паўнавартасна», — падзяліліся асцярогамі прадстаўнікі Чырвонага Крыжа.
Каб выправіць становішча, Чырвоны Крыж запусціў у Беларусі флэшмоб #всемыстранные. Для ўдзелу трэба размясціць у любой сацсетцы пост з апісаннем свайго дзівацтва з хештэгам #всемыстранные. Спецыялісты збяруць разам усе запісы, а самыя цікавыя — апублікуюць. Адкрыцця павінны падвесці грамадства да ісціны: няма ідэальных людзей, але ёсць непрыманне тых, хто не ўпісваецца ва стэрэатыпы.
У Мінску псіхалагічную дапамогу можна бясплатна атрымаць у цэнтры Чырвонага Крыжа "Адкрыты дом". Ён адкрыты па будных днях з 10 да 19 гадзін па вуліцы Чырвонай, 3. Тут нікога не называюць пацыентамі — толькі гасцямі, ды і гісторый хваробы ніхто не заводзіць. З наведвальнікамі працуюць супрацоўнікі цэнтра, якіх кансультуюць спецыялісты РНПЦ псіхічнага здароўя і Гарадскога клінічнага псіхіятрычнага дыспансэра.
Сусветны дзень псіхічнага здароўя адзначаюць 10 кастрычніка. Робяць гэта па ініцыятыве Сусветнай федэрацыі псіхічнага здароўя з 1992 года. Паводле розных даследаваннях, кожны 7 чалавек на Захадзе хварэе на шызафрэнію, альбо схільны да дэпрэсіі або алкагалізму.
Паводле прэс-рэлізу