«Няма тыдня, каб каго-небудзь не схапілі ў нас». На памежжы з Украінай сілавікі ладзяць «зачысткі»

Беларуская міліцыя ў тэлеграм-каналах рапартуе пра «зачыстку» райцэнтраў, блізкіх да мяжы з Украінай. «Адпрацоўка» — гэта значыць, жорсткія затрыманьні з прымяненьнем гвалту — прайшла ў Янаве, Драгічыне, Мазыры, Нароўлі і Хойніках.

За што затрымлівалі людзей? Што цяпер робіцца на памежжы з Украінай? Пра гэта — у матэрыяле «Св*боды».

«Затрымліваць людзей прыяжджалі зь Менску, нейкі цэнтар «Э»

На мінулым тыдні чарговая хваля затрыманьняў пракацілася па Мазыры. На «пакаяльных відэа» затрыманыя жыхары райцэнтру кажуць, што былі падпісаныя на «дэструктыўныя тэлеграм-каналы».

«Тады затрымалі чатырох чалавек — трох маладых хлопцаў і дзяўчыну. Хапаюць у асноўным тых, хто якім-небудзь чынам «засьвяціўся» ў 2020 годзе. Усіх бралі за нібыта падпіскі на тэлеграм-каналы. Прычым праводзілі ператрусы без панятых, разьбівалі тэхніку. У аднаго затрыманага разьбілі на ператрусе тэлевізар і пляншэт. У іншага затрыманага — ён нядаўна прыехаў з Польшчы — забралі дакумэнты, пашпарт і правы кіроўцы. Так і не аддалі», — расказаў жыхар Мазыра, знаёмы з затрыманымі.

Ён кажа, што для затрыманых была «стандартная працэдура» — запіс на відэа з «пакаяньнем», хуткі суд і «суткі» ў ізалятары.

«Але ў нас у Мазыры затрыманьні не спыняюцца. Штотыдзень некага затрымліваюць. Кіраўніцтва ж сілавікоў казала, што «прыйдзем да ўсіх». Вось яны і атакуюць», — дадаў жыхар райцэнтру.

У Мазыры некалькі мясцовых былі затрыманыя за фатаграфаваньне расейскай вайсковай тэхнікі. Нядаўна аднаму зь іх, 18-гадоваму хлопцу, вынесьлі прысуд — два гады калёніі за «садзейнічаньне экстрэмісцкай дзейнасьці». Па такіх жа артыкулах цяпер у зьняволеньні жыхары Мазыра Ганна Пышняк і Павал Наздра.​

«На «суткі» не садзілі, проста палохалі і здымалі на камэру»

Пад так званую «зачыстку» трапілі жыхары Хойнікаў і Нароўлі. На «пакаянных відэа» ўсе яны кажуць пра падпіску на тэлеграм-каналы.

«Іх не судзілі, ня кідалі на «суткі». Проста палохалі. Аднаго чалавека ўзялі проста ля хаты, запісалі зь ім «пакаяннае відэа» і адпусьцілі. Гэта былі акты застрашваньня. Хапалі як тых, хто ўдзельнічаў у падзеях 2020 году, так і звычайных людзей, якія былі падпісаныя на тэлеграм-каналы. Адзін затрыманы адмовіўся здымацца на камэру з «пакаяньнем». Яго проста адпусьцілі», — расказаў жыхар Хойнікаў.

Трапілі пад затрыманьні і жыхары Нароўлі.

«Тых, каго схапілі, — іх толькі сёньня будуць судзіць. Вядома, што бралі за падпіскі на тэлеграм-каналы. Спадзяёмся, што абыдзецца для іх гэта ўсё «суткамі», — расказаў жыхар Нароўлі.

Затрыманы актывіст Мікалай Віткоўскі. Ён з 2020 году неаднаразова трапляў на «суткі» — за ўдзел у акцыях пратэсту, за бел-чырвона-белы сьцяг. Цяпер на «пакаянным відэа» Мікалай кажа, што быў падпісаны на «дэструктыўныя» тэлеграм-каналы. 26 ліпеня яго і іншых затрыманых будуць судзіць.

У сярэдзіне ліпеня ГУБАЗіК прыйшоў да жыхароў Янава і Драгічына. Як паведамлялі праваабаронцы, у двух гэтых райцэнтрах затрымалі 28 чалавек. У іх прайшлі ператрусы, людзі атрымалі штрафы і «суткі». Затрыманьні суправаджаліся зьдзекам і гвалтам. Міліцыянты стралялі ў сабаку адной з затрыманых.

Зьвяртае ўвагу, што затрыманьні адбываюцца ў раёнах, блізкіх да мяжы з Украінай.

Закуп мяшкоў для трупаў, праверка шпіталяў на памежжы

Гомельскае выданьне «Фл*гшток» паведаміла, што Міністэрства абароны закупляе тысячу мяшкоў для трупаў. Праўладныя тэлеграм-каналы зьняпраўдзілі гэтую інфармацыю, але не прадставілі ніякіх фактаў, якія б сьведчылі, што пададзеныя копіі дакумэнтаў — падробка.

У чэрвені выданьне публікавала копіі дакумэнтаў (сапраўднасьць якіх не ўдалося пацьвердзіць) пра праверку шпіталяў Гомельскай вобласьці для магчымага прыёму параненых. Міністэрства абароны запытвалася ў шпіталяў пра колькасьць месцаў, наяўнасьць рэанімабіляў і машын хуткай дапамогі.

Украінцы мінуюць мяжу, беларусы ўзмацняюць

1084 кілямэтры — даўжыня беларуска-ўкраінскай мяжы. Зь беларускага боку тут Гомельская і Брэсцкая вобласьці, з украінскага — Валынская, Ровенская, Кіеўская і Чарнігаўская. Украінскі бок заяўляў і паказваў, што памежжа зь Беларусьсю цяпер замінавана «ад варожага суседа» .

Беларускія ўлады заяўляюць пра ўзмацненьне на паўднёвай мяжы. Апроч памежнікаў, на мяжы цяпер прысутнічаць вайскоўцы з розных падразьдзяленьняў. У Гомельскай вобласьці праходзяць вучэньні — то з ваенкаматамі, то з тэрытарыяльнай абаронай.

На мяжы з Украінай яшчэ з 2014 году актыўна ўзводзяцца інжынэрныя збудаваньні.

У 2019 годзе газэта «Драгічынскі весьнік» паведамляла пра гэта наступнае: «У найбліжэйшай будучыні ахоўныя інжынэрныя збудаваньні працягнуцца па ўсім 40-кілямэтровым участку, які нястомна ахоўваюць вайскоўцы пагранзаставы «Сварынь».

«На пэўным аддаленьні ад дзяржаўнай мяжы чысьціцца 25-мэтровая паласа, выдаляюцца і выкарчоўваюцца дрэвы і іншая расьліннасьць, засыпаюцца зямлёй забалочаныя ўчасткі. У далейшым плянуецца зрабіць Драгічынскі ўчастак дзяржаўнай мяжы цалкам закрытым, як, напрыклад, Кобрынскі. Падобныя работы цяпер вядуцца і ў Іванаўскім раёне», — інфармавала раённая газэта.