Офіс Ціханоўскай плануе абмеркаваць у сейме Літвы становішча беларусаў
Офіс Святланы Ціханоўскай «будзе замагацца, каб беларусы адчувалі сябе нармальна ў любой еўрапейскай краіне», так дарадца дэмакратычнай лідаркі па канстытуцыйнай рэформе і міжпарламенцкім супрацоўніцтве Анатоль Лябедзька пракаментаваў ініцыятыву шэрагу літоўскіх парламентарыяў абмежаваць выдачу беларусам часовага віда на жыхарства (ВНЖ). Пра гэта піша «Люстэрка» са спасылкай на «Позірк».
На думку палітыка, перад прэзідэнцкімі выбарамі і выбарамі ў сейм Літвы, а таксама ў Еўрапарламент, запланаванымі на 2024 год, ідзе «змаганне за кожны голас», ёсць месца «папулізму, жаданню спадабацца выбаршчыку, арыентацыі на грамадскія трэкі, трэнды».
У той жа час, паводле слоў Лябедзькі, у Офісе Ціханоўскай не збіраюцца «сядзець і чакаць, калі будуць прыняты нейкія канчатковыя рашэнні».
Паводле яго слоў, 14 снежня ў сейме Літвы з ініцыятывы Офіса пройдуць слуханні і дыскусія ў фармаце пашыраннага пасяджэння Камітэта па міжнародных пытаннях і групы дэпутатаў «За дэмакратычную Беларусь». Гэта штогадовае мерапрыемства, адзначыў палітык, але сёлета яго тэму будзе вызначаць «сітуацыя з выбарамі і адпаведнымі заканадаўчымі ініцыятывамі», таму Офіс Ціханоўскай хоча «засяродзіцца на абмеркаванні становішча беларусаў у прававым полі Літвы».
Лябедзька падкрэсліў, што на слуханні могуць быць запрошаны кіраўнікі і члены іншых камітэтаў сейма, у тым ліку Камітэта па нацыянальнай бяспецы і абароне, які ачольвае Лаўрынас Кашчунас — адзін з ініцыятараў паправак з абмежаваннямі для беларусаў. З высокай верагоднасцю ў сустрэчы возьмуць удзел Ціханоўская, прадстаўнікі яе Офіса, лідары ці члены беларускіх палітычных партый, паведаміў суразмоўца.
Паводле слоў Лябедзькі, прыхільнікамі больш строгіх падыходаў да беларусаў з’яўляюцца сілавыя структуры і меншая частка дэпутатаў сейма. Супраць гэтага выступаюць прэм’ер-міністр, спікер і значная частка дэпутатаў парламента.
Глядзіце таксама
4 снежня ў сейме Літвы былі зарэгістраваны папраўкі, якія прадугледжваюць абмежаванне выдачы беларусам часовага ВНЖ. Адпаведныя змены ў закон аб абмежавальных мерах прапанавалі ўнесці Кашчунас і яго калега Аўдронюс Ажубаліс, а таксама намеснік старшыні парламента Паўлюс Саўдаргас.
Папраўкі прадугледжваюць, што «знешнія пастаўшчыкі паслуг за мяжой» спыняць прыём заяў на атрыманне дазволу на часовае пражыванне беларускіх грамадзян у Літве. Выключэнне прапануецца зрабіць для беларусаў, якія маюць намер працаваць па высокакваліфікаваных прафесіях.
Плануецца, што абмежаванні будуць распаўсюджвацца толькі на першыя дазволы на часовае пражыванне, а дзеючыя работнікі, якія ўжо атрымалі дазвол на часовае пражыванне ў Літве, змогуць мяняць яго без абмежаванняў.
Ініцыятары прапануюць не распаўсюджваць абмежаванні на
грамадзян, якія «маюць візу Літвы ці іншай дзяржавы шэнгенскай зоны», а таксама
на людзей, якія «ратуюцца ад пераследу і рэпрэсій з боку рэжымаў» і атрымалі
візу пры пасрэдніцтве Міністэрства замежных спраў.