Святлана Ціханоўская: Мы не павінны дапусціць, каб Беларусь стала суцяшальным прызам для Пуціна

Святлана Ціханоўская выступіла ў падкамітэце па Еўропе Камітэта па замежных справах Палаты прадстаўнікоў Кангрэса ЗША. Яна заклікала падтрымаць дэмакратычныя памкненні беларусаў і падкрэсліла, што без дэмакратычнай Беларусі цяжка разлічваць на бяспеку ў рэгіёне.

Ціханоўская адзначыла, што Лукашэнка звярнуўся да Расіі, каб заставацца ва ўладзе, і дазволіў Маскве ператварыць Беларусь у інструмент для канфрантацыі з Захадам.

«Гэта ўцягнула нашу краіну ў агрэсію Расіі супраць Украіны, працягваецца падтрымка вайны зброяй, інфраструктурай, навучаннем, прадастаўленнем паветранай прасторы і зямлі. Ёсць доказы, што дыктатар удзельнічаў у выкраданні ўкраінскіх дзяцей з акупаваных тэрыторый. Лукашэнка стаў пагрозай міру і бяспецы, але ён таксама прынёс смяротную бяду ў наш уласны дом. Мы выразна бачым паглынанне Беларусі Расіяй. Свет назірае, як Пуцін бярэ пад кантроль беларускую эканоміку, нацыянальную бяспеку, міжнародную палітыку і інфармацыйную прастору. Працягваецца расійская атака на беларускую культуру, мову і нацыянальную ідэнтычнасць. Пашырыўшы сваю пастаянную вайсковую прысутнасць у Беларусі, Расія размяшчае ядзерную зброю на нашай зямлі», — распавяла Ціханоўская.

Лідарка беларускіх дэмакратычных сіл падкрэсліла, што беларусы па-ранейшаму адданыя ідэі незалежнай, дэмакратычнай, еўрапейскай Беларусі, падтрымліваюць Украіну ў вайне і сфарміравалі альтэрнатыўныя інстытуты ўлады — Аб'яднаны пераходны кабінет і Каардынацыйную раду.

«Пераход да дэмакратыі ў Беларусі — наш абавязак і адказнасць, але нам патрэбна дапамога з боку ЗША, якія паабяцалі сваю прыхільнасць незалежнай, суверэннай, дэмакратычнай Беларусі. Цяпер настаў час прымяніць гэтую палітыку ў поўнай меры», — заявіла Ціханоўская.

Ціханоўская вітала пачатак стратэгічнага дыялогу з Беларуссю і заклікала ЗША прыняць план дзеянняў для аднаўлення дэмакратыі ў Беларусі. Яна падкрэсліла, што Беларусь не можа стаць разменнай манетай у перамовах аб спыненні вайны ва Украіне і суцяшальным прызам для Пуціна.

«Прызначэнне спецыяльнага пасланніка ЗША павінна дапамагчы пабудаваць кааліцыю для незалежнай дэмакратычнай Беларусі. Замаху Крамля на суверэнітэт і нацыянальную ідэнтычнасць Беларусі трэба супрацьстаяць. Гэта павінна ўключаць у сябе непрызнанне пагадненняў, падпісаных з Расіяй пасля выбараў 2020 года і ўвядзенне новых санкцый супраць Расіі за яе незаконныя спробы падпарадкаваць сабе Беларусь. Мы не павінны дапусціць, каб Беларусь стала суцяшальным прызам для Пуціна. Беларускі народ не павінен стаць разменнай манетай у перамовах аб спыненні вайны. Наадварот, вывад Беларусі з вайны і аднаўленне дэмакратыі цяпер стане самым моцным ударам па Расіі і дапаможа Украіне перамагчы і аднавіць сваю тэрытарыяльную цэласнасць», — мяркуе Ціханоўская.

Ціханоўская заявіла, што, стаўшы свабоднай, Беларусь зробіць вырашальны геапалітычны выбар, выйдзе з палітычных і ваенных пагадненняў з Расіяй і будзе імкнуцца ў Еўрасаюз.

Ціханоўская закранула праблему рэпрэсій, палітвязняў і іх сем'яў, беларусаў у іміграцыі. Яна заклікала патрабаваць вызвалення палітвязняў і палегчыць легалізацыю для беларусаў, якія з'ехалі з краіны. «Я заклікаю Кангрэс ЗША падтрымаць статус часовай абароны для беларусаў у ЗША», — сказала палітык. Яна таксама заклікала ЗША падтрымаць праект новага беларускага пашпарта.

Ціханоўская лічыць, што санкцыі ў дачыненні да беларускага рэжыму павінны быць узмоцнены.

«Я заклікаю ЗША ўзмацніць ціск на рэжым. Санкцыі не срэбная куля, а інструмент, які аслабляе здольнасць рэжыму праводзіць рэпрэсіі і аказваць дапамогу Расіі на вайне. ЗША лідзіруюць у аказанні дапамогі Украіне, і вельмі важна ўзмацняць санкцыі супраць ваенна-прамысловага комплексу, які падтрымлівае расійскую вайну. Міжнародныя механізмы прыцягнення да адказнасці, якіх асцерагаецца Лукашэнка, усё яшчэ застаюцца нявыкарыстанымі», — заявіла Ціханоўская.

Яна таксама заклікала падтрымліваць беларускія дэмакратычныя сілы і адзначыла, што расійская падтрымка беларускага рэжыму вылічаецца мільярдамі.

Ціханоўская прапанавала распрацаваць план аднаўлення эканомікі Беларусі і заклікала Кангрэс ЗША прыняць новы Акт аб дэмакратыі, суверэнітэце і правах чалавека ў Беларусі.

Паводле Reform.by