Падобна, што справа Генадзя Мажэйкі развальваецца
У Мінскім гарадзкім судзе працягваецца працэс на журналістам Генадзем Мажэйкам. Працэс вядзе суддзя Таццяна Фалькоўская, якая нядаўна прысудзіла 8 гадоў калоніі экс-журналістцы БТ Ксеніі Луцкіной. Публікуем матэрыял «Св*боды» аб судовым працэсе, з якога бачна, як крымінальная справа літаральна развальваецца.
Выглядае, што палітзняволенага журналіста «Камсамолкі», схопленага за бяскрыўдны матэрыял пра «справу Зельцэра», трэба апраўдваць. Праблема толькі ў тым, што ў лукашэнкаўскай Беларусі апраўдальных прасудаў па «палітычных» справах не бывае.
Разгледзелі 9 тамоў справы, прыступілі да разгляду рэчавых
доказаў
На папярэднім паседжаньні суд разглядзеў тры апошнія тамы справы — пісьмовыя матэрыялы. А ўсяго ў справе дзевяць тамоў. Таксама пачаўся разгляд рэчавых доказаў: шматлікіх флэшак, цьвёрдых дыскаў, ноўтбука, фатаздымкаў. Аднак пракурорка зазначыла, што нічога зь пералічанага ня мае дачыненьня да справы. Таму ўсе гэтыя рэчы будуць вернутыя Мажэйку.
Бацька Генадзя Мажэйкі прынёс у суд цэлую тэчку са
шматлікімі граматамі, дыплёмамі, якімі Генадзь быў узнагароджаны за 12 гадоў
працы ў «Камсамолцы». Там ёсьць грамата ДАІ і мэдаль МУС «Абавязак, парадак,
справядлівасьць».
У кастрычніку 2021 году падчас ператрусу ў кватэры Генадзя ў
ліку іншых рэчавых доказаў забралі працоўны дыктафон журналіста. Знайшлі там
аўдыёзапіс сустрэчы з дэпутатам Палаты прадстаўнікоў Валерам Варанецкім у
Лошыцы, якая адбылася летам 2020 году.
Паводле вэрсіі сьледзтва, Мажэйка на гэтай сустрэчы агітаваў
супраць дзейнай улады і падтрымліваў «апазыцыйна настроеных» удзельнікаў,
«парушаючы агульначалавечую мараль».
«З аўтаматам бегаць... Хіба можа нармальны чалавек з
аўтаматам бегаць? Гэта вар’ят», — зачытаў пракурор словы з матэрыялаў справы,
якія, паводле судовай фанаскапічнай экспэртызы аўдыязапісу, прамовіў журналіст.
Сам Генадзь Мажэйка яшчэ ў першы дзень суду пацьвердзіў, што
прысутнічаў у 2020 годзе на сустрэчы дэпутата Варанецкага з выбарнікамі, але
моўчкі сядзеў з ноўтбукам і занатоўваў — рабіў рэпартаж. А словы, якія
прыпісваліся яму, сказаў іншы чалавек, які сядзеў побач.
«Зразумела, што Гена нічога не выкрыкваў на сустрэчы з
дэпутатам, ён працаваў там як журналіст»
Адвакат Генадзя Мажэйкі знайшоў відэазапіс той сустрэчы, які далучылі да матэрыялаў справы і 14 сьнежня будуць разглядаць у судзе. Таксама абаронца журналіста настаяў, каб у суд выклікалі адмыслоўцаў, якія рабілі экспэртызу.
Сябар Мажэйкі, які ходзіць на ўсе судовыя паседжаньні, кажа,
што адвакат высьветліў, хто сядзеў побач з Генадзем і выкрыкваў тыя словы.
«Гэта сівы дзядок, які нарадзіўся ў 1930-х гадах. І вельмі добра, што адвакат дамогся, каб далучылі і разгледзелі відэазапіс. Мы спадзяёмся, што гэта шанец. Бо зразумела, што Гена нічога не выкрыкваў на сустрэчы з дэпутатам, ён працаваў там як журналіст. Усё залежыць ад таго, як павядуць сябе экспэрты. Яны ж разглядалі аўдыёзапіс сустрэчы, які быў знойдзены ў дыктафоне Генадзя. А тут знайшоўся відэазапіс, мы вельмі на яго спадзяёмся», — кажа сябар Генадзя Мажэйкі.
Экспэртаў, якія праводзілі судовую фонаскапічную экспэртызу, выклікалі ў суд на 14 сьнежня. Суд павінен вызначыць, каму належыць голас на аўдыёзапісе, знойдзеным у дыктафоне журналіста.
Перасьлед Генадзя Мажэйкі
Журналіста Генадзя Мажэйку абвінавачваюць паводле ч.1 арт. 368 (абраза Лукашэнкі) за згаданую рэпліку, нібыта прамоўленую ім на сустрэчы з дэпутатам. А таксама паводле ч. 1 арт. 130 (распальваньне расавай, нацыянальнай, рэлігійнай або іншай сацыяльнай варожасьці). Тут маецца на ўвазе публікацыя на сайце kp.by кароткай размовы з былой аднаклясьніцай Андрэя Зельцара, які загінуў у перастрэлцы з супрацоўнікамі КДБ. У апублікаваным на kp.by артыкуле аднаклясьніца станоўча характарызавала Зельцара. Публікацыя «правісела» на сайце некалькі хвілін. На наступны дзень сайт беларускага выданьня «КП» быў заблякаваны, неўзабаве перастала выходзіць і папяровая вэрсія газэты.