Хронікі рэпрэсій 13 снежня: Заблакаваны «Патрэон», новая крыміналка супраць Святланы Ціханоўскай
У Беларусі заблакавалі «Патрэон». Праблемы з доступам да платформы, дзе можна данаціць на розныя ініцыятывы, сталі заўважныя сёння. Што яшчэ здарылася сёння?
Пры заходзе на сайт «Патрэон» у карыстальнікаў унутры Беларусі з'яўлялася плашка пра тое, што доступ да рэсурсу абмежаваны Міністэрствам інфармацыі. Платформу «Патрэон» для збору данатаў выкарыстоўваюць абсалютна розныя людзі і ініцыятывы.
Супраць Ціханоўскай, Сахашчыка і Азарава распачалі новую крымінальную справу. Гэтым разам — за стварэнне «экстрэмісцкага фармавання» «Паспалітае рушэнне».
Як паведамляе МУС, гэтая ініцыятыва «праводзіць работу па арганізацыі замахаў на тэрытарыяльную цэласнасць, суверэнітэт, асновы канстытуцыйнага ладу і грамадскую бяспеку Рэспублікі Беларусь».
У ведамстве кажуць, што «пасля падрыхтоўкі ўдзельнікі фармавання павінны вярнуцца ў Беларусь, каб сфармаваць ужо навучаную «пятую калону» для вядзення дыверсійнай, тэрарыстычнай і агентурнай працы».
Паведамляецца, што следчымі распачаты крымінальныя справы за стварэнне экстрэмісцкага фармавання або ўдзел у ім у дачыненні да Сахашчыка, Ціханоўскай, Азарава і іншых асоб — усяго па крымінальнай справе правяраецца больш за 200 чалавек.
Праваабаронца Наста Лойка не выйшла на волю пасля чарговых 15 сутак адміністрацыйнага арышту. Дзе яе ўтрымліваюць цяпер, не вядома.
Наста Лойка была затрымана 28 кастрычніка і пазней тройчы асуджаная да адміністрацыйнага арышту. На адным з судоў праваабаронца распавядала пра катаванні — супрацоўнік ГУБАЗіК ударыў яе электрашокерам, а адзін з супрацоўнікаў ЦІП вывеў яе ва ўнутраны двор і пакінуў без вопраткі на 8 гадзін.
Супраць былой гомельскай журналісткі распачалі крымінальную справу. Ларысу Шчыракову затрымалі 6 снежня. Цяпер стала вядома, што крымінальная справа распачатая за дыскрэдытацыю Рэспублікі Беларусь — артыкул 369-1 Крымінальнага кодэксу. Санкцыі артыкула — да чатырох гадоў пазбаўлення волі.
Між тым 16-гадовы сын Шчыраковай Святаслаў усё яшчэ знаходзіцца ў прытулку. Родным журналісткі сына не аддалі, матывуючы гэта тым, што падлетка могуць перадаць толькі «законнаму прадстаўніку» — бацьку. Ён жыве ў Расіі і мае намер прыехаць у Гомель.
Ад 5,5 да 10 гадоў калоніі прысудзілі чатыром палітзняволеных салігарчанам.
У Мінскім абласным судзе агучылі прысуд чатыром палітзняволеным жыхарам Салігоршчыны. Суддзя Алена Міснік прызначыла па «пратэсных артыкулах» мужу і жонцы Аляксандру і Таццяне Бірулям па 6 гадоў калоніі, трэнеру Алегу Гаўрылаву — 10 гадоў калоніі, Сяргею Пасюку — 5,5 года калоніі.
Генадзя Смірнова змясцілі ў ПКТ. Палітвязня змясцілі ў памяшканне камернага тыпу як злоснага парушальніка ўстаноўленага парадку. Перад гэтым яго неаднаразова змяшчалі ў ШІЗА. Паводле крыніцаў праваабаронцаў, «Генадзь моцна схуднеў, высах, адны жылы тырчаць».
Нагадаем, у судзе Ляхавіцкага раёна 27 кастрычніка 2021 года вынеслі прысуд бацьку і сыну Генадзю і Вячаславу Смірновым, якіх абвінавацілі ў абразе Лукашэнкі (ч. 1 арт. 368 Крымінальнага кодэкса), а Генадзя — яшчэ і ў супраціве супрацоўніку органаў унутраных спраў (ч. 2 арт. 363 Крымінальнага кодекса). У выніку Генадзя асудзілі да 2,5 гадоў калоніі, а Вячаслава — да 2 гадоў «хіміі».
Суполка ва «Укантакце» «Добрый Жлобин» прызнаная «экстрэмісцкімі матэрыяламі». Адпаведнае рашэнне прынятае судом Жлобінскага раёну яшчэ 27 верасня, але толькі сёння яно з'явілася ў «Рэспубліканскім спісе экстрэмісцкіх матэрыялаў». На суполку падпісана больш за 25 тысяч чалавек.
У Баранавічах затрыманы Анатоль Пугач, які днямі прыехаў у Беларусь лячыцца з анкалагічным захворваннем.
28-гадовы Анатоль Пугач толькі днямі вярнуўся з Польшчы ў Беларусь на медычнае абследванне: у яго знайшлі анкалагічнае захворванне. Мужчыну затрымалі сёння, 13 снежня, раніцай. Вядома, што з яго тэлефону пасля гэтага сядзелі сілавікі.
За абразу Лукашэнкі і знявагу дзяржсімвалаў пакаралі жыхара Баранавіч.
Суд Баранавічскага раёна і горада Баранавічы пад старшынством суддзі Іны Паўлоўскай разгледзеў крымінальную справу 50-гадовага Віталя Корсака. Яго абвінавацілі ў абразе Лукашэнкі (арт. 368 КК) і знявазе дзяржаўных сімвалаў (арт. 370 КК). Нібыта Корсак у студзені 2022 года ў сацыяльнай сетцы «Аднакласнікі» на сваёй персанальнай старонцы ў адкрытым доступе размясціў фотавыяву Лукашэнкі з абразамі, а таксама апублікаваў выяву нацысцкай сімволікі ў колерах дзяржсцяга.
Суд пастанавіў “па сукупнасці злачынстваў” прызначыць канчатковае пакаранне ў выглядзе пазбаўлення волі на тэрмін два гады з адбываннем у папраўчай калоніі ва ўмовах строгага рэжыму.