Прэзідэнту прапануюць размаўляць па-беларуску

Таварыства беларускай мовы распрацавала праект закона аб дзяржаўнай падтрымцы беларускай мовы. Рада арганізацыі 30 студзеня ўхваліла яго ў першым варыянце. Створана рабочая група па дапрацоўцы дакумента на чале з філолагам Лявонам Баршчэўскім.  



Таварыства беларускай мовы распрацавала праект закона аб дзяржаўнай падтрымцы беларускай мовы. Рада арганізацыі 30 студзеня ўхваліла яго ў першым варыянце. Створана рабочая група па дапрацоўцы дакумента на чале з філолагам Лявонам Баршчэўскім.

Праект будзе вынесены для зацвярджэння на з’ездзе арганізацыі, а пасля накіраваны ў Савет міністраў. “Яго асноўныя палажэнні — каб беларуская мова займела сапраўднае сваё месца, а не тое, якое ёй далі зараз. Гарантам беларускай мовы павінен быць урад. Таксама трэба стварыць дэпартамент або міністэрства па прапагандзе беларускай мовы, — заявіў кіраўнік ТБМ Алег Трусаў.

Гэта ведамства, па задуме ініцыятараў, павінна кантраляваць выкананне Закона аб мовах усімі юрыдычнымі асобамі. Прычым незалежна ад формы ўласнасці і сферы дзейнасці. Дзяржаўным чыноўнікам уключна з прэм’ер-міністрам і прэзідэнтам, як прадугледжана, неабходна дасканала валодаць беларускай мовай. І на ёй жа ажыццяўляць дзяржаўную дзейнасць. “Прэзідэнт Беларусі падчас афіцыйных, публічных, культурніцкіх і іншых мерапрыемстваў асабістым прыкладам падтрымлівае і прапагандуе беларускую мову, — зазначана ў адным з палажэнняў. І арганізуе дзейнасць усёй уладнай вертыкалі па-беларуску.

Міжнародны дзень роднай мовы 21 лютага сябры ТБМ і яго прыхільнікі адзначаць IV агульнанацыянальнай дыктоўкай. Яна прысвечана юбілею Максіма Багдановіча і пройдзе як у Беларусі, так і за яе межамі. Для дыктоўкі абраны верш паэта “Я хацеў бы спаткацца з Вамі на вуліцы… і празаічны тэкст “Хто мы такія?