«Прывязаць да станка? Выдаць усім па мятле?» Чаму ўладам варта адчапіцца ад «дармаедаў»

У Гарадзенскай вобласці пачалі «максімальна аператыўна» складаць «базу дармаедаў».



darmaediakcia__1_of_1__26_logo_1_1_1.jpg


На пашыранай нарадзе старшыня Гарадзенскага абласнога выканаўчага камітэта Уладзімір Каранік даў загад "максімальна аператыўна скласці базу даных тых, хто не працаўладкаваны”, паведамляе сайт аблвыканкаму. "Тым, хто хоча працаваць, — дапамагчы. Тых, хто заняты ў ценявым бізнесе, — вывесці на празрыстую эканамічную дзейнасць. Да ўзаемадзеяння з пітушчымі і тымі, якія вядуць асацыяльны лад жыцця, падключаць псіхолагаў і наркалагічную службу”, — паставіў задачу Каранік, піша Радыё Рацыя. 
Між тым, у каментары "Салідарнасці" праваабаронца і юрыст Леанід Судаленка, вядомы змагар з "дармаедскім" дэкрэтам, распавёў пра тое, чаму чарговая ініцыятыва ўладаў можа пацярпець крах.
На ягоную думку, дэкрэт аб садзейнічанні занятасці так і не запрацаваў — як у старой рэдакцыі, так і ў новай.
— Чаму? Я глыбока перакананы, што пакуль у беларусаў ёсць магчымасць выехаць на заробкі хоць у Расію, хоць у Польшчу ці Літву, пакуль у нас не ператварылі краіну ў Паўночную Карэю, зачыніўшы межы, ніхто тут за ежу працаваць не будзе.
Праваабаронца звяртае ўвагу на той факт, што ў рэгіёнах за шчасце вакансія, якая абяцае 500 рублёў заробку. І гэта пры тым, што ўлады не год і не два абяцалі ўсім па 500 долараў.
— За такімі вакансіямі людзі нават у абласных цэнтрах у чаргу становяцца. Так што, замест гэтай балбатні, лепш бы кіраўніцтва краіны занялося б стварэннем канкурэнтаздольных працоўных месцаў, шукала б нейкія новыя вытворчасці, — эксперт перакананы, што ў краіне трэба ствараць умовы, пры якіх беларусам не прыйшлося б шукаць працу за мяжой.
— Былі б тут такія ўмовы, і тыя паўмільёна работнікаў, якіх залічылі ў дармаеды, самі вярнуліся б сюды працаваць і плаціць падаткі. Але нічога гэтага няма.
Праваабаронца называе другую прычыну, якая зводзіць на нішто намаганні ўладаў па барацьбе з тымі, хто "боўтаюцца і хістаюцца":
— Канстытуцыя дае нам права на працаўладкаванне, але не прымушае нас працаваць. Калі нам кажуць, што Канстытуцыя ў гэтым выпадку не галоўная, часам не да законаў, то давайце тады адмяняць і нашы абавязкі, прапісаныя ў Асноўным законе. Тэрміновую службу ў арміі, выплату падаткаў.
Ці можа новы наступ на беспрацоўных справакаваць масавыя пратэсты, як гэта было ў 2017-м? Эксперт лічыць, што многае будзе залежаць ад таго, што менавіта будуць рабіць улады.
— Спісы гэтых людзей даўно складзеныя. Але што з імі цяпер рабіць? Прывязаць да станка, выдаць усім па мятле? Прымусовыя працы? Але як прымусіць чалавека працаваць прымусова, калі на гэта няма рашэння суда? Вось вярнуўся з Мінска з нарады кіраўнік Гомельшчыны? І як ён будзе выконваць ўказанне прымусіць людзей працаваць?
Леанід Судаленка нагадаў, што ў 20-я гады мінулага стагоддзя бальшавікі ўводзілі абавязковую працоўную павіннасць:
— І чым усё скончылася? У нас хтосьці называе сябе гісторыкам, але так жа і ўрокі гісторыі трэба ўлічваць, каб не паўтараць старых памылак.
Калі ўлады ўсё ж пачнуць пераследваць беспрацоўных, гэта толькі павялічыць адток эканамічных мігрантаў, лічыць праваабаронца. У першую чаргу гэта тычыцца маладога пакалення, як больш мабільнага.
Эксперт звярнуў увагу на праблему звальненняў сярод удзельнікаў пратэстаў. Цяпер ён заняты справай працаўніка светлагорскага цэлюлознага камбіната:
— Чалавек адбыў 15 сутак, а яго звольнілі за прагул. І колькі такіх людзей? Чаму не заняцца гэтай праблемай, а не думаць над тым, як кагосьці прымусіць працаваць?