Самая моцная птушка краіны загнездавалася ў Беларусі пасля доўгага перапынку

Упершыню за 9 гадоў у Беларусі паспяхова загнездаваўся арол-маркут – адна з самых буйных птушак Беларусі, паведамляе грамадская арганізацыя «Ахова птушак Бацькаўшчыны» (АПБ).


Апошні раз паспяховае гнездаванне гэтага “чырванакніжнага” арла па даных арнітолагаў адбылося ў 2011 годзе.
Гняздо з двума птушанятамі падчас экспедыцыі ў Віцебскую вобласць знайшлі арнітолагі Дзяніс Кіцель і Юрый Янкевіч. Дакладнае месца гнездавання трымаецца пад сакрэтам, каб не турбаваць маркутаў: у Беларусі вядома толькі адно гняздо! Каля гнязда ўсталяваныя фотапасткі, таму, калі хтосьці будзе непакоіць птушак, пра гэта стане вядома.

Апошняе паспяховае гнездаванне маркутаў на гэтым месцы было ў 2010 годзе.
— Апошнія 5 гадоў я наведваў балоты, дзе маркуты калісьці гнездаваліся, — кажа сябра Цэнтральнага савета АПБ Дзяніс Кіцель. — І птушак бачылі, і на гнёздах былі актыўнасці, але беспаспяховыя. І вось нарэшце ў гэтым годзе пашчасціла.


— У арлоў-маркутаў выжывае звычайна толькі адно птушаня, таму навіна ўдвая прыемнейшая, — дзеліцца ўражаннямі старшыня Брэсцкага аддзялення АПБ Юрый Янкевіч. – Відаць, арлам сёлета хапіла корму, каб пракарміць малых. Да вылету з гнязда ім яшчэ прынамсі два тыдні.
На той жа тэрыторыі, што і цяпер, паспяховы вывадак з двух птушанят быў адзначаны ў 1985 і 2005 гадах.


Тут з 1976 года маркуты выкарыстоўвалі два натуральныя гнязды і тры штучныя, пабудаваныя вядомым арнітолагам Уладзімірам Іваноўскім, ганаровым сябрам АПБ. За сваю шматгадовую дзейнасць па вывучэнні драпежных птушак, якім ён актыўна дапамагаў і дапамагае загнездавацца, робячы штучныя гнёзды, ён атрымаў званне Абаронцы дзікай прыроды BirdLife International.