Сёння пачынаецца суд над фрылансерам Андрэем Кузнечыкам. Яму пагражае да сямі гадоў калоніі

Сёння пачынаецца чарговы суд над журналістамі. У Магілёўскім абласным судзе адбудзеца закрыты працэс над фрылансерам Андрэем Кузнечыкам. Яго абвінавачваюць у «стварэнні экстрэмісцкага фармавання» (арт. 361-1 КК), яму пагражае да 7 гадоў пазбаўлення волі.

Затрымалі Андрэя Кузнечыка 25 лістапада 2021 году, калі ён выйшаў увечары з кватэры пакатацца на ровары. Вярнуўся дадому ў суправаджэнні чатырох сілавікоў. У кватэры зладзілі ператрус, забралі аргтэхніку, запатрабавалі пароль ад тэлеграм-каналу Радыё Свабода.

Дзеці Андрэя і Алесі — васьмігадовая Яніна і двухгадовы Мацьвей — былі сведкамі затрымання таты.

Тройчы Кузнечыку давалі па 10 сутак. 23 снежня 2021 года стала вядома, што на Кузнечыка завялі крымінальную справу і перавялі яго ў СІЗА № 1 на Валадарскага.

За некалькі дзён да затрыманьня Андрэй расказаў свайму сябру, чаму ён застаўся ў Беларусі, нягледзячы на небяспеку. Гэтыя 5 тлумачэнняў ён папрасіў апублікаваць, калі затрыманьне ўсё ж адбудзецца.

«Я з 13 гадоў жыву беларушчынай, паступіў на філфак дзеля яе, жыў і працаваў з арыентацыяй на яе, цяпер мне за 40, але справа не ў тым, што позна пачынаць з нуля, справа ў тым, што я не хачу збочваць са сцежкі працы на карысьць беларушчыны.

У цяперашніх умовах мне здаецца меншай пакутай адбыць у вязніцы прыдуманы тэрмін, чым развітацца з радзімай на няпэўны (аж да скону) час (хоць тут я магу фатальна памыляцца ў тым, наколькі далёка могуць зайсці рэпрэсіі).

Я лічу, што дзеці, узгадаваўшыся ў небеларускім асяроддзі, стануць носьбітамі каштоўнасцяў гэтага асяроддзя, а Беларусь — адзінае месца на Зямлі, дзе гэтае асяроддзе мы маем, можам ствараць і разлічваць на яго.

Я бачу, што суседнія краіны ствараюць свой гістарычны міф на падмурку, часам адрозным і нават супярэчным беларускаму.

Я бачу, што перад суседнімі з Беларуссю краінамі стаяць выклікі, якія могуць запатрабаваць не меншай ахвярнасці, чым цяперашняя сітуацыя патрабуе ад беларусаў сёння».

Андрэю Кузнечыку 43 гады, родам ён з Віцебска, вучыўся ў Ліцэі БДУ, потым скончыў філалягічны факультэт БДУ і аспірантуру. Працаваў стыльрэдактарам у «Комсомольской правде» в Беларуси», у «Нашай Ніве», фрылансерам на Радыё Свабода.

Андрэй Кузнечык — заўзяты раварыст, аматар-валанцёр OpenStreetMap. З 2007 году вёў свой пазіытыўны беларускамоўны блог, у якім прапагандаваў язду на ровары. У ім ён публікаваў сэрыю допісаў «Кароткі праваднік па мінскіх роварных стаянках» і «Кароткі праваднік па мінскіх веладарожках», даваў парады, прапаноўваў пісаць звароты мясцовым уладам наконт уладкавання роварнага руху. Андрэй стварыў падрабязную карту безбар’ерных роварных маршрутаў, а таксама сам пракладаў маршруты ў Google Maps.

У турме Андрэй пачаў складаць дзіцячыя вершы. Жонка Алеся дасылае яму чыстыя паштоўкі з забаўнымі малюнкамі, а на іх Андрэй у адказ піша Яніне і Мацвею павучальныя вершыкі.

25 траўня 2022 года стала вядома, што Андрэя Кузнечыка абвінавацілі ў «стварэнні экстрэмісцкага фармавання» (частка 1 артыкула 361-1 КК). Яму пагражае да 7 год пазбаўлення волі.