У тым ліку Карпянкоў. «Адзіная кніга рэгістрацыі злачынстваў» разглядае 294 заявы супраць беларускіх сілавікоў

Ініцыятыва Святланы Ціханоўскай «Адзіная кніга рэгістрацыі злачынстваў» апублікавала першыя дэталі расследавання крымінальных справаў у рамках універсальнай юрысдыкцыі супраць беларускіх сілавікоў, распавядае «Свабода».

997dc556_63f2_4650_89dd_07b4f092a87e_w1023_r1_s.jpg

Заяву пабітага мінскага прадпрымальніка Максіма Харошына прыняла да разгляду Генеральная пракуратура Літвы і завяла крымінальную справу па факце гвалту. Харошына затрымалі ў двары дому ў Мінску, пабілі, павезлі ў РУУС і білі таксама там. Сілавікі давялі прадпрымальніка да стану, калі давялося выклікаць «хуткую дапамогу», паведамляе Адзіная кніга рэгістрацыі злачынстваў (АКРЗ) у адмысловым прэс-рэлізе.

У выпадку вызначэння вінаватых асобаў іх вышук абвесціць Інтэрпол, у сувязі з чым іх могуць затрымаць практычна ў кожнай краіне.

У заяве Максіма Харошына гаворыцца, што незаконныя дзеянні супраць яго ўчынілі 13 кастрычніка: на вуліцы Ульянаўскай у Мінску спынілі машыну, у якой прадпрымальнік ехаў з жонкай, пад пагрозай пісталета павалілі на зямлю ў лужыну крыві, надзелі кайданкі і правялі незаконны ператрус у аўтамабілі. Пазней, ужо ў Першамайскім РУУС, Харошына «прымушалі падпісваць сфабрыкаваныя пратаколы аб удзеле ў несанкцыянаваным масавым мерапрыемстве». Пасля адмовы прадпрымальніка яго зноў білі.

Паводле версіі Харошына, якая вынікае з напісанага ў заяве, білі, пакуль ён не пачаў траціць прытомнасць. Сярод доказаў следства мае:

А) відэазапіс з мабільнага тэлефона, дзе зафіксаваны момант загрузкі Харошына ў мікрааўтобус, бачныя ўдзельнікі затрымання і іхны транспарт;

Б) вынікі першаснага агляду хірургам і загадчыкам аддзялення, у тым ліку анамнез пацыента;

В) вынікі агляду лекарам Максіма Харошына;

Г) фатаграфіі слядоў пабіцця на нагах, ягадзіцах і твары;

Д) відэазапіс, які фіксуе стан адзення Харошына пасля затрымання. Адзенне са слядамі крыві.

На падставе сабраных матэрыялаў апазнаныя падазраваныя сілавікі і вызначаны склад іх злачынстваў.

У выніку разгляду справы Адзіная кніга рэгістрацыі злачынстваў вызначыла, што Максіма Харошына затрымаў начальнік ГУБАЗіК палкоўнік Мікалай Карпянкоў, які дзейнічаў разам з падначаленымі з перавышэннем паўнамоцтваў. Гвалт у Першамайскім РУУС адбыўся пры патуранні начальніка РУУС Андрэя Бакача.

У дзеяннях Мікалая Карпянкова збіральнікі доказаў бачаць прыкметы злачынстваў, прадугледжаных артыкуламі КК:

арт. 128 «Злачынства супраць бяспекі чалавецтва»;

ч. 2 арт. 182 «Выкраданне чалавека»;

ч. 3 арт. 426 «Перавышэнне ўлады або службовых паўнамоцтваў».

У дзеяннях Андрэя Бакача:

арт. 128 «Злачынства супраць бяспекі чалавецтва»;

ч. 3 арт. 425 «Бяздзейнасць службовай асобы».

Звесткі па заяве Максіма Харошына і матэрыялы праверак іншых злачынстваў пасля апрацавання юрыстамі АКРЗ уносяцца ў санкцыйныя спісы і перадаюцца ў суд універсальнай юрысдыкцыі ў Літве.

У гэты момант разглядаюцца 294 заявы. Дэталі злачынстваў і імёны падазраваных юрысты абяцаюць апублікаваць 20 снежня.