У Шклоўскім раёне католікі пачалі пошукі старажытнага абраза

 Католікі прыходу ў вёсцы Фашчаўка Шклоўскага раёна Магілёўскай вобласці пачалі пошукі абраза Найсвяцейшай Багародзіцы Фашчаўскай. 



Як паведаміў БелаПАН адзін з удзельнікаў пошуку Леанід Платоненка, старажытны абраз, першае згадванне пра які датуецца 1702 годам, быў згублены ў 1930-х гадах. 

"Выява Найсвяцейшай Панны Марыі знаходзілася ў галоўным алтары касцёла ў Фашчаўцы да ліквідацыі прыходу савецкай уладай. 9 чэрвеня 1937 года быў арыштаваны прыхадскі святар ксёндз Пётр Януковіч і яшчэ некалькі актыўных вернікаў. Паводле сведчанняў мясцовых жыхароў, 13 чэрвеня 1937 года, падчас апошняга традыцыйнага паломніцтва ў Магілёў на свята святога Антонія, у якім удзельнічала большасць вернікаў, невядомыя прадстаўнікі ўлады знялі выяву Багародзіцы з галоўнага алтара. З гэтага часу сляды цудатворнага абраза губляюцца", — сказаў Платоненка, адзначыўшы, што ў канцы 1967 года быў разбураны і сам касцёл.

 
Ён таксама паведаміў, што ў 1883 годзе была выкананая копія фашчаўскай выявы для прыхадской царквы ў сяле Пустынь, якая ў той час знаходзілася ў Віцебскай губерні, а зараз на тэрыторыі Латвіі. "Цяпер пошукам гэтай копіі абраза сумесна з намі займаюцца прадстаўнікі каталіцкага духавенства Латвіі", — сказаў вернік. 

Леанід Платоненка адзначыў, што пошукі абраза ідуць вельмі складана. "У музейныя фонды якія толькі не звярталіся — мінскія, магілёўскія, ніякага выніку гэта не дало. Ніхто нічога не ведае. А ў сувязі з тым, што ў праваахоўных органаў вельмі малы тэрмін захоўвання дакументаў пра ўсе здарэнні, то наогул магчыма, што матэрыялы па канфіскаваных рэліквіях і абразах Фашчаўскага касцёла ў іх не захаваліся", — сказаў актывіст. 

Ён адзначае важнасць святыні для адраджэння прыходу ў Фашчаўцы, які афіцыйна зарэгістраваны і абслугоўваецца ксяндзом, што прыязджае са Шклова. Паводле яго слоў, сёння ў вёсцы будуецца невялікая капліца — перарабляецца былы калгасны будынак. У маі, магчыма, адбудзецца яе адкрыццё. "Можа быць, да таго часу з'явіцца копія абраза, якую цяпер піша мінская мастачка Вольга Куваева", — гаворыць Платоненка. Ён адзначыў, што вернікі просяць дапамогі ў грамадскасці і спецыялістаў, якія маюць якую-небудзь інфармацыю пра зніклы ў 1930-х гадах абраз Найсвяцейшай Панны Марыі Фашчаўскай. Уладзімір Лапцэвіч, БелаПАН