Віцябляніну, які бараніў падчас шэсця жанчыну, прысудзілі два з паловай гады калоніі

У судзе Кастрычніцкага раёна Віцебска 3 снежня агучылі прысуд у дачыненні 33-гадовага індывідуальнага прадпрымальніка Аляксандра Кірыленкі. Яго вінавацілі ва ўчыненні гвалту да супрацоўніка МУС (арт. 364 КК) падчас вулічнага шэсця 6 верасня. Суддзя Іна Грабоўская прызнала мужчыну вінаватым і пастанавіла пакараць пазбаўленнем волі на два з паловай гады, піша vitebskspring.org.

Інцыдэнт, які інкрымінавалі Аляксандру Кірыленку, адбыўся 6 верасня падчас вулічнага шэсця на вуліцы Праўды ў Віцебску. Кірыленка хацеў перадухіліць гвалт у дачыненні пажылой жанчыны з боку міліцыянта і адштурхнуў яго. Пацярпелы – супрацоўнік Першамайскага РАУС Віцебску старшы прапаршчык Юрый Валейчанка, сцвярджаў на судзе, што праз атрыманае ўздзеянне "згубіў прасторавую арыентацыю" і "перажыў фізічныя пакуты". Аляксандр Кірыленка быў жорстка затрыманы на месцы сутычкі.
Як высветлілася, пацярпелы міліцыянт Юрый Валейчанка прасіў суд аб маральнай кампенсацыі за перанесеныя пакуты – 1500 рублёў. Суд задаволіў патрабаванне. Сям'я абвінавачанага выплаціла гэтую суму Валейчанку яшчэ да абвяшчэння прысуду. Пацярпелы, у сваю чаргу, напісаў сваякам распіску, што не мае больш прэтэнзій і што не настойвае на тым, каб у дачыненні абвінавачанага суд прымяняў пакаранне ў выглядзе пазбаўлення волі.


Але суд вырашыў па-свойму.
Аляксандр Кірыленка прызнаны вінаватым «ва ўчыненні гвалту да супрацоўніка органаў унутраных спраў з мэтай перашкоджання яго законнай дзейнасці і прымусу да змены характару гэтай дзейнасці».
Суддзя Іна Грабоўская пастанавіла пакараць мужчыну пазбаўленнем волі на тэрмін 2 гады і 6 месяцаў з адбываннем пакарання ў калоніі агульнага рэжыму.
Днём раней пракурорка Крысціна Мацвеева прасіла пакараць Аляксандра Кірыленку трыма гадамі зняволення.
Як мяркуе віцебскі праваабаронца Павел Левінаў, суд павінен быў апраўдаць мужчыну, у горшым выпадку — прызначыць пакаранне, звязанае з абмежаваннем волі, але ні ў якім выпадку — не з яе пазбаўленнем.