Экс-прэзідэнт Расіі: На Кубе і ў Венесуэле не будзе расійскіх баз, яны хочуць аднавіць адносіны з ЗША

Памятаеце, прапагандысты пасля аб'яўлення крамлёўскага ўльтыматуму Захаду ў якасці адной з пагроз рэкламавалі размяшчэнне расійскіх ваенных баз на Кубе і ў Венесуэле? Як высветлілася, у гэтых лацінаамерыканскіх дзяржаў існуюць сур'ёзныя геапалітычныя разыходжанні, як з уладамі РФ, так і беларускімі, распавядае «Салідарнасць».

Аляксандр Лукашэнка і Уладзімір Пуцін сёння галоўныя прапаведнікі антыамерыканізму. І, натуральна, у супрацьстаянні з ЗША яны разлічваюць на дзяржавы, якія таксама знаходзяцца ў канфлікце з Вашынгтонам, адзначае выданне.

Нядаўна, віншуючы прэзідэнта Мігеля Марыё Дыяс-Канеля Бермудэса з Днём вызвалення Кубы, Аляксандр Лукашэнка адзначыў, што паміж Мінскам і Гаванай склаліся асаблівыя адносіны «заснаваныя на агульнасці каштоўнасных прынцыпаў». І паабяцаў аказваць выспе ўсялякую падтрымку на міжнароднай арэне.

Прыкладна ў тым жа духу Лукашэнка выказваецца, калі гаворка ідзе пра беларуска-венесуэльскія сувязі. Аднак, як высвятляецца, лацінаамерыканскія дзяржавы зусім не гараць жаданнем ісці на абвастрэнне з ЗША.

Сведчаннем таму можа служыць інтэрв'ю намесніка старшыні Савета бяспекі РФ Дзмітрыя Мядзведзева расійскім медыя. Ён заявіў, што і гаворкі быць не можа пра размяшчэнне расійскіх вайсковых баз на Кубе і ў Венесуэле.

Але самае цікавае ў гэтай гісторыі — гэта адказ на пытанне «чаму?».

Паводле слоў Мядзведзева, Венесуэла і Куба хочуць выйсці з ізаляцыі і аднавіць нармальныя адносіны з Амерыкай.

Нават Венесуэла і Куба...

І толькі кіраўнік Беларусі пастаянна выступае з нападкамі на ЗША, падсумоўвае «Салідарнасць».