Судзьдзя Шмыт некалькі гадоў быў у кантакце зь беларускімі і расейскімі службамі, якія дзейнічаюць на тэрыторыі Польшчы
Агенцтва ўнутранай бясьпекі Польшчы зьбіралася арыштаваць Томаша Шмыта за шпіянаж.
Томаш Шмыт
Агенцтву ўнутранай бясьпекі Польшы ўжо некалькі месяцаў было вядома аб сувязях судзьдзі Томаша Шмыта зь беларускімі службам, піша Onet.pl з спасылкай на крыніцы, як у польскіх службах, так і ва ўрадзе. Польскае выданьне цытуе «Радыё Свабода».
Шмытам нават мусіла займацца польская контрвыведка, а дзеяньні польскіх службаў былі накіраваныя на тое, каб арыштаваць яго за шпіянаж. Аднак у канцы апэрацыі нешта пайшло ня так, піша выданьне.
Глядзіце таксама
Па неафіцыйнай інфармацыі Onet, судзьдём Томашам Шмытам некалькі месяцаў пільна цікавілася Агенцтва ўнутранай бяспекі. Больш за тое, яго справай займалася польская контрвыведка, якая зьбірала доказы, накіраваныя на арышт судзьдзі па абвінавачаньні ў вядзеньні шпіёнскай дзейнасьці на карысьць замежнай дзяржавы.
Гэтую інфармацыю выданьню пацьвердзілі дзьве незалежныя крыніцы, як у польскіх службах, так і ва ўрадзе. Па дадзеных інфарматараў, судзьдзя Шміт як мінімум некалькі гадоў быў у кантакце зь беларускімі службамі, а таксама з расейскімі службамі, якія дзейнічаюць на тэрыторыі Польшчы.
6 траўня Томаш Шмыт, судзьдзя 2-га аддзяленьня ваяводзкага адміністрацыйнага суду Варшавы, выступіў у прэс-цэнтры беларускага дзяржаўнага агенцтва БелТА. На брыфінгу ён падпісаў заяву аб адстаўцы, заявіў, што папрасіў абароны ў беларускіх уладаў, і выказаўся ў падтрымку палітыкі афіцыйнага Менску. Свае дзеяньні ён патлумачыў нязгодай з палітыкай і дзеяньнямі ўладаў Польшчы.
Цяпер польскія спэцслужбы разьбіраюцца, якой уразьлівай інфармацыяй зь беларускімі спэцслужбамі можа падзяліцца зьбеглы судзьдзя.
Глядзіце таксама
Польскае выданьне Gazeta Wyborcza высьветліла, што судзьдзя Томаш Шмыт часта на службе вызначаў, каму даваць доступ да сакрэтных матэрыялаў. У Варшаўскім ваяводзкім адміністрацыйным судзе ён займаўся справамі, датычнымі дзяржаўных таямніц. На 4 чэрвеня ён быў прызначаны ў склад камісіі адносна наданьня доступу да сакрэтнай інфармацыі, у тым ліку да таямніц NATO, Эўразьвязу і Эўрапейскай касьмічнай агенцыі (ЭКА).
Вядома, што судзьдзя Шмыт уцёк у Беларусь праз Турэччыну.
Выданьне піша, што Шмыта шанавалі ў часы ўраду ПіС, генэральны пракурор Польшчы Зьбігнеў Зёбра прызначыў яго на працу ў Дзяржаўны судовы рэестар (па-польску KRS, які ў час рэформаў ПіС атрымаў у прэсе назву neo-KRS). Аднак Эўрапейскі суд правоў чалавека і Трыбунал правасудзьдзя ЭЗ у сваіх выраках пасьля разгляду польскай справы адзначылі, што судзьдзі прызначаліся ў KRS памылкова. У сакавіку Таварыства польскіх судзьдзяў Iustitia, грунтуючыся на гэтых рашэньнях, пастанавіла, што працэдуру неабходна паўтарыць.