«Беларускія спартсмены не павінны быць бенефіцыярамі разбурэння Украіны»
У той час як у фехтаванні і боксе прадстаўнікі дзяржаў-агрэсараў будуць выступаць разам з іншымі спартсменамі, міжнародныя федэрацыі хакея і лёгкай атлетыкі працягнулі забарону на ўдзел Расіі і Беларусі ў сваіх турнірах. Беларускія чыноўнікі пачалі абурацца!
Беларускія хакеісты адхіленыя ад міжнародных спаборніцтваў. Ілюстрацыйнае фота: hockey.by
На фоне размоў пра тое, што МАК можа дапусціць да кваліфікацыі Алімпіяды-2024 беларускіх і расійскіх спартсменаў пад нейтральным сцягам (да прыкладу, кіраўнік Фонду спартыўнай салідарнасці Аляксандр Апейкін лічыць, што гэта сапраўды адбудзецца), адразу дзве міжнародныя федэрацыі працягнулі адхіленне атлетаў з краін-агрэсараў. Хакеісты ад міжнародных стартаў адхіленыя да канца сезона-2023/2024, а лёгкаатлеты не выступяць на спаборніцтвах пад эгідай Міжнароднай асацыяцыі лёгкаатлетычных федэрацый (World Athletics) у «найбліжэйшай будучыні» — менавіта пра такія тэрміны заявіў прэзідэнт арганізацыі Себасцьян Коў. Еўрапейская лёгкаатлетычная асацыяцыя ж на пазачарговым пасяджэнні двухтыднёвай даўнасці паставіла куды больш канкрэтныя часавыя рамкі: беларусы і расіяне не выступяць на стартах пад іх эгідай да заканчэння вайны ва Украіне.
Рашэнне працягнуць бан Коў патлумачыў разбурэннямі і смерцямі (у тым ліку ўкраінскіх спартсменаў), што адбыліся за папярэдні год па віне рэжымаў Пуціна і Лукашэнкі, піша «Тр*буна».
— Сумленнасць нашых буйных міжнародных спаборніцтваў ужо значна падарваная дзеяннямі ўрадаў Расіі і Беларусі, пазбаўленнямі ўкраінскіх спартсменаў і разбурэннем спартыўных сістэм ва Украіне. Расійскія і беларускія спартсмены, многія з якіх маюць вайсковую прыналежнасць, не павінны быць бенефіцыярамі гэтых дзеянняў, — сказаў Коў.
Але, што парадаксальна, функцыянер паралельна разглядае магчымасць вяртання атлетаў дзвюх забаненых краін. Ён заявіў, што цягам некалькіх тыдняў World Athletics сфармулюе ўмовы, пры якіх адхіленне Расіі і Беларусі можа быць скасаванае. Для гэтага нават будзе створана рабочая група — мабыць, «бліжэйшая будучыня» ў разуменні Коў можа наступіць зусім ужо хутка.
Больш за тое, World Athletics аднавіла сяброўства Расійскай Федэрацыі ў арганізацыі: яго Усерасійская федэрацыя лёгкай атлетыкі была пазбаўленая яшчэ ў лістападзе 2015 года на фоне шматлікіх допінгавых парушэнняў.
З хакеем пытанне закрылі да наступнага года: у сезоне-2023/24 зборныя і клубы з Беларусі і Расіі не выступяць на міжнародных стартах. Такім чынам, нацыянальныя каманды прапусцяць і ЧС-2023 у Фінляндыі-Латвіі, і ЧС-2024 у Чэхіі. Кіраўнік ІІХФ Люк Тардзіф адзначыў, што ціск на арганізацыю быў з абодвух бакоў, але гэта ніяк не паўплывала на выніковае рашэнне аб працягу бана. Галоўнай прычынай функцыянер назваў немагчымасць гарантавання бяспекі.
Аператыўна з гэтай нагоды з заявай выступіла Федэрацыя хакея Швецыі, якая падтрымала працяг санкцый.
— Гэта добрае і важнае рашэнне, што Расія і Беларусь не будуць дапушчаныя да ўдзелу ў міжнародных чэмпіянатах у наступным сезоне. Гэта рашэнне, якое мы ў шведскім хакеі падтрымліваем і лічым цалкам неабходным у бягучай сітуацыі, — гаворыцца ў заяве.
Намеснік камісара НХЛ Біл Дэйлі адзначыў, што рашэнне ІІХФ можа паўплываць на правядзенне Кубка свету ў 2025-м, куды ліга магла адпусціць у свае зборныя ўсіх наймацнейшых хакеістаў планеты.
Спартыўныя чыноўнікі ў Расіі і Беларусі ўбачылі ў пералічаных дзеяннях палітызаванае рашэнне «калектыўнага Захаду», які ўплывае на рашэнні арганізацыі, а галоўны трэнер ніжагародскага «Тарпеда» Ігар Ларыёнаў нават выступіў з прапановай ФХР выйсці са складу ІІХФ.
Былы кіраўнік беларускай Федэрацыі хакея Дзмітрый Баскаў, забанены ІІХФ на пяць гадоў, заявіў, што арганізацыя не выканала свае ж дамоўленасці аб тым, што лёс дыскваліфікаваных краін вырашыцца шляхам галасавання ўсіх федэрацый у траўні гэтага года — там, на думку лукашэнкаўскага сенатара, многія падтрымлівалі ідэю вяртання каманд. Не абышлося і без звыклай для яго згадкі маладых хакеістаў, якім разбураюць лёсы.
— Пасля заявы чыноўнікаў ІІХФ пра тое, што рашэнне аб вяртанні нашых каманд будзе прымацца агульным галасаваннем усіх федэрацый у траўні, ім жа тэрмінова спатрэбілася ўжо цяпер, напляваўшы на меркаванне федэрацый, прыняць спешнае рашэнне аб працягненні нашага адхілення яшчэ на адзін сезон. Вельмі дрэнна, калі лёсам спартсменаў (а пад адхіленне трапляе і наша юніёрская зборная — гэта 16-17-гадовыя хлопцы) кіруе купка баязлівых чыноўнікаў, якія пабаяліся даць магчымасць усім федэрацыям выказацца і зрабіць свой выбар, — сказаў Баскаў.
Меркавання пра тое, што большасць федэрацый падтрымала б вяртанне Беларусі і Расіі, прытрымліваецца і генеральны сакратар ФХБ Андрэй Башко.
— Такое рашэнне прыняў Савет [ІІХФ]. Савет — гэта крыху больш за дзесяць чалавек, і пераважна ён складаецца з прадстаўнікоў Балканаў і Скандынавіі (у Савеце ІІХФ няма прадстаўнікоў балканскіх краін. — Заўв. рэд.). Гэтае рашэнне павінен быў прымаць Кангрэс — гэта больш за 80 краін, якія павінны былі галасаваць. Я ўпэўнены, што калі б галасаваў Кангрэс, то рашэнне было б зусім процілеглым, — сказаў Башко.
А былы дырэктар аршанскага «Лакаматыва і падпісант ліста за сумленныя выбары Яўген Мазура лічыць, што гэтым працягненнем бана новае кіраўніцтва ІІХФ не хоча псаваць сабе рэпутацыю і дапускаць краін-агрэсараў да міжнародных спаборніцтваў, дадаючы легітымнасці іх дзеянням. У той час, як у іншых відах спорту, дзе спартсмены з Беларусі і Расіі ўжо дапушчаныя да стартаў (фехтаванне і бокс), існуе моцнае лобі расійцаў.
Варта адзначыць, што пасля заявы аб працягу адхілення Люк Тардзіф адзначыў, што вясной наступнага года Каардынацыйны камітэт ІІХФ вернецца да пытання вяртання каманд не толькі да чэмпіянату свету, але і да кваліфікацыйнага турніру Алімпіяды, які пачнецца летам наступнага года.