Біл Гейтс распавёў, чаму 2021 год будзе лепшы за 2020-ы

Бтл Гейтс нагадаў, што ў гэтым годзе з-за каронавіруса памерлі больш за 1,6 мільёна чалавек, а сусветная эканоміка панесла шкоду, якая вымяраецца трыльёнамі долараў.

Мільярдэр і сузаснавальнік Microsoft Біл Гейтс назваў 2020 год разбуральным, але пры гэтым выказаў упэўненасць, што 2021-ы будзе лепшым, паведамляе korrespondent.net.

Гейтс лічыць, што ў чалавецтва ёсць як мінімум 12 падстаў для радасці ў будучым годзе.

Пра гэта ён напісаў у сваім блогу.

Так, на думку Гейтса, радуе хуткасць, з якой фармацэўтычныя кампаніі стварылі і тэстуюць вакцыну ад каронавіруса. У наступным жа годзе вакцынавацца зможа значная частка насельніцтва Зямлі.

Акрамя таго, пазітыўным момантам ён лічыць, што многія людзі змірыліся з маскамі і неабходнасцю сацыяльнага дыстанцыявання, што, у сваю чаргу, будзе зніжаць хуткасць распаўсюджвання інфекцыі.

Таксама Біл Гейтс спадзяецца, што перамагчы каронавірус здолеюць ва ўсім свеце. Назіранне за тым, як краіны змагаюцца з пандэміяй, усяляе ў прадпрымальніка аптымізм.

Заснавальнік Microsoft лічыць, што паспяховых праектаў па стварэнні вакцын будзе становіцца ў свеце ўсё больш.

«З такой колькасцю кампаній, якія выкарыстоўваюць розныя падыходы, існуе значна больш шанцаў, што некаторыя з вакцын акажуцца бяспечнымі і эфектыўнымі. Іх ужо дзве, і, магчыма, стане яшчэ больш», — напісаў ён.

Пазітыўным, на думку Гейтса, ёсць і тое, што фармацэўтычныя кампаніі пачалі падзяляць паміж сабой фінансавыя рызыкі, ідуць адзін аднаму насустрач — дзеляцца вытворчымі рэсурсамі і тэхналогіямі.

«Для поўнай перамогі над вірусам неабходна вырабіць ад 5 да 10 мільярдаў доз вакцыны. Але гэта не самая галоўная праблема. Асноўная перашкода тут — лагістыка. Аднак чалавецтва зможа вырашыць і гэтае пытанне», — лічыць ён.

Таксама, Гейтс спадзяецца, што ўсё больш людзей перастануць скептычна ставіцца да прышчэпак і распаўсюджваць канспіралагічныя тэорыі аб вакцынах.

«Грамадскія дзеячы, навукоўцы і сямейныя лекары павінны ўзяць на сябе важную місію — распавядаць людзям пра карысць новай вакцыны», — піша Гейтс.

Пазітыўным момантам, лічыць мільярдэр, ёсць і тое, што лекары распрацавалі і іншыя спосабы барацьбы з вірусам — у прыватнасці, выкарыстанне антыцелаў.

«Тэхналогіі тэставання на каронавірус з кожным днём толькі развіваюцца. Зусім хутка людзі масава змогуць атрымаць доступ да экспрэс-тэстаў, якія можна будзе праводзіць самастойна», — лічыць заснавальнік Microsoft.

Таксама ён звяртае ўвагу на тое, што, фактычна, захворванне і смяротнасць у Афрыцы на поўдзень ад Сахары ніжэйшая, чым у ЗША і Еўропе. Першапачаткова Гейтс меркаваў, што бедныя краіны не дадуць рады пандэміі. Цяпер прадпрымальнік кажа, што быў рады памыліцца.

Увесь свет згуртаваўся, каб перамагчы пандэмію. Вядома, такая буйная трагедыя — не лепшая падстава для супрацоўніцтва. Аднак факт застаецца фактам — людзі паказалі сябе з найлепшага боку і атрымалі досвед, які дапаможа кааперавацца і ў іншых цяжкіх сітуацыях, — робіць выснову Біл Гейтс.