Ген, які выклікае цяжкую форму каронавіруса, ёсць у 60% насельніцтва Паўднёвай Азіі

Навукоўцы адкрылі, што ген LZTFL1, які ўдвая павялічвае рызыку лёгачнай недастатковасці і смерці ад Covid-19, маюць 60% жыхароў Паўднёвай Азіі, паведамляе ВВС са спасылкай на вынікі даследаванняў навукоўцаў з Оксфардскага ўніверсітэта.

«Ген рызыкі не ўплывае на ўсе папуляцыі аднолькава», — сказаў прафесар Джэймс Дэвіс з каманды «Nature Genetics». 15 працэнтаў насельніцтва Еўропы, 2% – Афрыкі і Карыбаў і 1,8% жыхароў Усходняй Азіі падвяргаюцца рызыцы найбольш сур'ёзных наступстваў заражэння SARS-CoV-2 у выніку прысутнасці гена LZTFL1, адзначаюць эксперты.
Даследчыкі адзначылі, што «ген высокай рызыкі парушае ключавы механізм аховы, які клеткі, што высцілаюць лёгкія, выкарыстоўваюць для абароны ад каронавіруса». Клеткі лёгкіх, якія кантактуюць з SARS-Cov-2, павінны трансфармавацца ў менш «прыязныя» да віруса, чаго не адбываецца ў носьбітаў гена LZTFL1. Клеткі на паверхні лёгкіх арганізма, які змагаецца з інфекцыяй, павінны быць пакрытыя як мага меншай колькасцю бялка ACE-2, каб вірус мог да іх далучыцца. Ген рызыкі перашкаджае дэспецыялізацыі лёгачных клетак на паверхні органа, аблягчаючы вірусу задачу пранікнуць у лёгачную тканку, тлумачаць даследчыкі.
«Мы не можам змяніць нашу генетыку, але вынікі даследавання паказваюць, што вакцынацыя асабліва патрэбная людзям з генам больш высокай рызыкі», — дадаў прафесар Дэвіс.
polskieradio.pl