Яны пра нас: Свабодная Украіна побач з знішчанай Беларуссю існаваць не зможа
Праз вайну ў суседняй Украіне замежная прэса па-ранейшаму надае Беларусі шмат увагі.
Ілюстрацыйнае фота. Акцыя беларусак у Нью-Ёрку 2 красавіка
«У інфармацыйным плане батальён імя Кастуся Каліноўскага выконвае прыкладна тую ж функцыю, што "героі АТА" ці "Нябесная сотня" ва Украіне. "Героі-добраахвотнікі" павінны стаць часткай нацыянальнага міфа "новай Беларусі", якой яе бачыць апазіцыя. Кансалідацыя нацыі на супрацьстаянні з Расіяй — той шлях, якім доўга ішла Украіна і які разглядаецца ў якасці эталона беларускімі "змагарамі", нягледзячы на ўсе выдаткі, ахвяры і разбурэнні. Стаўкі беларускай апазіцыі ва ўкраінскай гульні высокія. Разлік робіцца на тое, што ваенная аперацыя пойдзе па нявыгадным для Масквы сцэнары і прывядзе да паслаблення Расіі, што, у сваю чаргу, будзе азначаць і дэстабілізацыю ўлады А. Лукашэнкі. Для цяперашніх варшаўскіх і віленскіх сядзельцаў гэта новы шанец на рэванш пасля паразы 2020 года». Фонд политической культуры (Расія)
«Беларускія ўлады не пакідаюць спробаў уплываць на беларусаў, якія пакінулі краіну, і прыдумляюць усё новыя меры ціску. Мусіць, самай сур'ёзнай мерай супраць палітычных эмігрантаў можа стаць пазбаўленне грамадзянства — з такой ініцыятывай у кастрычніку мінулага года таксама выступіў ГУБАЗіК. Некаторыя праўладныя тэлеграм-каналы нават пісалі, што спісы на пазбаўленне грамадзянства ўжо гатовы, аднак на дадзены момант ніякіх заканадаўчых актаў пра гэта прынята не было». DW (Германія)
«З пачаткам спецаперацыі РФ ва Украіне беларуская эканоміка пачала адчуваць прыкметны санкцыйны ціск. ЗША і Еўрасаюз увялі абмежаванні, звязаныя перш за ўсё з фінансавым і абаронным сектарамі, а таксама са сферай высокіх тэхналогій. Акрамя таго, Сусветны банк заявіў аб спыненні фінансавання ўсіх сваіх праграм у Беларусі. А Еўрапейскі банк рэканструкцыі і развіцця бестэрмінова прыпыніў доступ рэспублікі да сваіх фінансаў. Пры гэтым адбываецца паступовае ўпаўзанне, усмоктванне Беларусі ў расійскую эканоміку». Независимая газета (Расія)
«Беларускі лідар выдатна разумее, што ягоныя войскі могуць не выконваць загады ваяваць ва Украіне. Ён таксама прызнае, што страта падтрымкі вайскоўцаў можа яшчэ больш падарваць яго і без таго слабае становішча на ўнутраным фронце. Калі беларускія вайскоўцы будуць забітыя ва Украіне ці выступяць супраць рэжыму, агульнанацыянальны пратэсны рух, які ўпершыню ўспыхнуў у жніўні 2020 года, можа адрадзіцца. Тым не менш, калі цяжкае становішча Пуціна працягне пагаршацца, і ён будзе настойваць на вайсковай падтрымцы з боку Беларусі, у Лукашэнкі ў канчатковым выніку не застанецца іншага выбару, акрамя як падпарадкавацца». Новое время (Украіна)
«Стужкі ў сацыяльных сетках зараз напоўненыя каментарамі наконт выказвання Уладзіміра Зяленскага аб тым, што беларусам давядзецца самім разбірацца са сваёй бядой. Але гэта не так. Ніхто не павінен заставацца сам на сам з бядой. Зразумела, што Уладзімір Зяленскі хоць з чортам лысым зараз гатовы размаўляць, каб украінцы перасталі паміраць. Але калі раптам Лукашэнка зноў будзе адчуваць сябе гаспадаром, беларусы ўсяго свету павінны не каяцца і пасыпаць галаву попелам, а ўзнімаць шум. Свабодная Украіна побач з знішчанай Беларуссю існаваць, на жаль, не зможа». Левый берег (Украіна)
«На фоне пагаршэння адносін з кіеўскім рэжымам у Беларусі працягваюць варажыць, ці возьмуць беларускія войскі ўдзел у ваеннай спецаперацыі, якая праводзіцца Расіяй. Па версіі афіцыйнага Мінска, асноўнай задачай Беларусі зараз з'яўляецца ўтрыманне заходніх рубяжоў на выпадак магчымых правакацый з боку Польшчы і Літвы. Удзельнічаць у баявых дзеяннях Беларусь не мае намеру, і высылка ўкраінскіх дыпламатаў наўрад з'яўляецца сігналам падрыхтоўкі ваеннай аперацыі беларускіх войскаў. Зрэшты, гэта не выключае таго, што Лукашэнка можа мець і «план Б» пры непрадказальным развіцці падзей на мяжы з Украінай».Взгляд (Расія)