Намеснік старшыні ПА АБСЕ: Прэзідэнцкія выбары могуць стварыць новыя ўмовы і магчымасці для Беларусі

Прэзідэнцкія выбары могуць стварыць новыя ўмовы для краіны ў розных сферах. Пра гэта заявіў намеснік старшыні Парламенцкай асамблеі (ПА) АБСЕ Кент Харстэд падчас сустрэчы з кіраўніцтвам Цэнтрвыбаркама Беларусі 2 ліпеня ў Мінску.



Па словах сакратара ЦВК Мікалая Лазавіка, Харстэд гарантаваў "непрадузятасць назірання" місіі ПА АБСЕ, якая будзе толькі назіраць за выбарчым працэсам, не ўмешваючыся ў яго.

Лазавік таксама паведаміў, што падчас сустрэчы не абмяркоўвалася тэма магчымага прызнання або непрызнання вынікаў прэзідэнцкіх выбараў. "Прызнанне-непрызнанне — гаварыць рана. Адзінае, што ён сказаў, што ўрокі 2010 года, як яны думаюць, будуць улічаныя, і маючыя адбыцца выбары — гэта ненапісаны раздзел. Тут ёсць поле для дзейнасці, каб выбары былі арганізаваны такім чынам, каб у назіральнікаў не было сур'ёзных прэтэнзій", — сказаў сакратар ЦВК.

Акрамя таго, па яго словах, Харстэд заявіў: ПА АБСЕ зацікаўлена ў тым, каб выбары прайшлі "ў станоўчым рэчышчы". "Ён праінфармаваў, што ў 2010 годзе ён удзельнічаў у назіранні за выбарамі ў Беларусі, ведае, як праходзіў выбарчы працэс і падзеі пасля выбараў. Ён таксама адзначыў, што важна не толькі ўдасканальваць заканадаўства, але і практыку яго рэалізацыі", — распавёў Лазавік.

У час сустрэчы старшыня Цэнтральнай камісіі па выбарах і правядзенні рэспубліканскіх рэферэндумаў Лідзія Ярмошына распавяла аб маючай адбыцца выбарчай кампаніі, сістэме выбарчых камісій, а таксама пра тое, чым цяперашняя выбарчая кампанія будзе адрознівацца ад папярэдніх, паведаміў Лазавік.

Афіцыйны візіт Кента Харстеда ў Беларусь праходзіць з 30 чэрвеня па 2 ліпеня напярэдадні 24-й сесіі ПА АБСЕ, якая пройдзе на наступным тыдні ў Хельсінкі. Намеснік старшыні ПА АБСЕ ўжо правёў сустрэчы з намеснікам міністра замежных спраў Беларусі Аленай Купчыной, старшынёй Палаты прадстаўнікоў Уладзімірам Андрэйчанкам і яго намеснікам Віктарам Гумінскім. На сёння таксама запланавана сустрэча Харстэда з прадстаўнікамі апазіцыі.

Сяргей Каралевіч, БелаПАН