Джо Байдэн: Выбары, аб'яўленыя сепаратыстамі, прама супярэчаць мінскім пагадненням

Вашынгтон выступае супраць правядзення 18 кастрычніка 2015 года мясцовых выбараў на тэрыторыях, кантралюемых так званай Данецкай народнай рэспублікай". 



Аб гэтым заявіў віцэ-прэзідэнт ЗША Джо Байдэн у тэлефоннай размове з прэм'ер-міністрам Украіны Арсеніем Яцанюком, паведамляе агенцтва УНИАН.
Белы дом асудзіў планы сепаратыстаў па правядзенні выбараў 18 кастрычніка, бо такія выбары "прама супярэчаць мінскім пагадненням і ўкраінскім законам", заявіў Байдэн.
Разам з тым ён вітае працяг працэсу канстытуцыйных рэформ ва Украіне як спосабу дэцэнтралізацыі ўлады ў адпаведнасці з мінскімі пагадненнямі. 
Напярэдадні аналагічную заяву зрабіў прэзідэнт Украіны. "Спроба правесці 18 кастрычніка 2015 года незаконныя, не ў адпаведнасці з мінскімі дамоўленасцямі, не ў адпаведнасці з украінскім заканадаўствам і крытэрыямі АБСЕ фейкавыя выбары будзе азначаць жорсткую атаку Расійскай Федэрацыі на мінскія дамоўленасці, якія былі дасягнуты 12 лютага гэтага года", — заявіў Пётр Парашэнка 2 ліпеня ў Львове пасля сустрэчы са сваім польскім калегам Браніславам Камароўскім.
Парашэнка падкрэсліў, што ён не каментуе заявы баевікоў аб правядзенні мясцовых выбараў на захопленых імі тэрыторыях Данецкай і Луганскай абласцей. Аднак падтрымка гэтых выбараў Расіяй будзе мець разбуральныя наступствы для працэсу дээскалацыі канфлікту на Данбасе, заявіў украінскі лідар. 
Між тым, як паведамлялася раней, на 7 ліпеня ў Мінску запланавана чарговае пасяджэнне трохбаковай кантактнай групы па ўрэгуляванні ўкраінскага крызісу ў фармаце Украіна — АБСЕ — Расія. 
Паводле інфармацыі прадстаўніка Украіны ў рабочай падгрупе па бяспецы Яўгена Марчука, 7 ліпеня ў Мінску плануюць сабрацца спачатку ўсе рабочыя падгрупы кантактнай групы (па бяспецы, па палітычных пытаннях, па эканоміцы і па гуманітарных пытаннях), а затым пройдзе сустрэча кантактнай групы.
Марчук адзначыў, што анансаванае раней украінскім бокам пасяджэнне рабочай падгрупы па бяспецы 2 ліпеня не адбудзецца, бо "расійскі бок паведаміў, што яна пакуль не гатова".
БелаПАН