Баевікі "ДНР" абвясцілі "нацыяналізацыю" грошай і маёмасці

Для "напаўнення бюджэту ДНР" баевікі патрабуюць паведамляць ім пра "безгаспадарныя" кватэры, валюту і каштоўнасці.



"Улады" самаабвешчанай рэспублікі разаслалі дырэктарам данецкіх ЖЭКаў і аб'яднанняў уладальнікаў шматкватэрных дамоў лісты, у якіх патрабуюць паведамляць пра "безгаспадарчую маёмасць" — кватэры, валютныя каштоўнасці і зберажэнні, якія павінны "перайсці ва ўласнасць ДНР", — паведамляе "Остров".

Паводле інфармацыі журналістаў, у Данецку пасля атрымання падобных лістоў нарастае ціхая паніка сярод уладальнікаў жылля.

"Установы, арганізацыі або асобы, якім стане вядома пра ўласнасць (у тым ліку валютныя каштоўнасці і грашовыя сродкі), які не мае ўласніка або ўласнік якога не вядомы, абавязаны паведаміць пра гэта ў органы даходаў і збораў, альбо ў органы паліцыі або органы мясцовага самакіравання неадкладна, — гаворыцца ў лісце з "рэспубліканскай падатковай інспекцыі т.зв. "ДНР". — ... З мэтай забеспячэння напаўнення бюджэту, у выпадках паступлення Вам інфармацыі аб безгаспадарчай маёмасцi просім інфармаваць інспекцыю ва ўстаноўленыя заканадаўствам тэрміны".

Данчане падазраюць самае горшае — кватэры, уладальнікі якіх былі вымушаныя іх пакінуць і выехаць у іншыя гарады, ратуючыся ад абстрэлаў, стануць "уласнасцю рэспублікі".

"Паглядзяць, што квартплата і камуналка не паступаюць на рахункі іх банка — і прызнаюць кватэру безгаспадарчай. А мы плацім своечасова, праз інтэрнэт у Ашчадным банку, — падзялілася перасяленка Алёна Кароціч. — Тое, што ў Данецку робіцца бязмежжа, мы ведалі, але што такога маштабу — нават не ўяўлялі!" — рэзюмуе данчанка.