Польшча мае намер адгарадзіцца ад Беларусі сцяной да сярэдзіны 2022 года

Польшча да канца першай паловы будучага года мае намер значна ўмацаваць мяжу з Беларуссю, паведаміў кіраўнік польскага МУС Марыюш Камінскі.

«Мы хочам, каб загарода была ўсталяваная да канца першага паўгоддзя 2022 года, гэта будзе збудаванне даўжынёй 180 км, вышынёй 5,5 м, там будуць выкарыстаны самыя сучасныя рашэнні», — цытуе міністра Interfax.by.

«Уздоўж ракі Буг мы выкарыстоўваем сістэмы бяспекі іншага тыпу», — дадаў ён.

Па словах міністра, цяпер мяжу з Беларуссю ахоўваюць 13 тысяч вайскоўцаў, 4,5 тысяч памежнікаў і 2 тысячы паліцэйскіх. «Нас пастаянна правакуюць, але нашы службы падрыхтаваныя добра», — адзначыў Камінскі.

Ён таксама паведаміў, што «лагер (мігрантаў) ля мяжы разрастаецца і знаходзіцца пад кантролем беларускіх службаў, якія дастаўляюць патрэбныя матэрыялы».

Сітуацыя на мяжы Польшчы і Беларусі ўскладнілася ў мінулы панядзелак, калі да мяжы з Польшчай з беларускага боку падышлі некалькі тысяч мігрантаў з краін Блізкага Усходу, якія жадаюць перабрацца ў ЕС. Польскія афіцыйныя асобы назвалі тое, што адбываецца, самым складаным момантам з пачатку крызісу на мяжы.

Польшча, Літва і Латвія ў апошнія месяцы фіксуюць узмоцненую плынь мігрантаў, якія спрабуюць праз Беларусь трапіць на тэрыторыю ЕС. У Еўрасаюзе вінавацяць Беларусь у тым, што менавіта яна стварыла хаос блізу межаў ЕС, паколькі не пускае назад нелегальных мігрантаў з краін Блізкага Усходу і Афрыкі, якія спрабуюць трапіць у Еўрасаюз, але атрымліваюць адмову.

Краіны Балтыі абвінавачваюць улады Беларусі ў арганізацыі плыняў мігрантаў і называюць гэта «гібрыднай агрэсіяй». Той жа пазіцыі прытрымліваецца і Еўракамісія.