Развал Расіі запушчаны? Прадстаўнікі пяці рэгіёнаў заявілі пра рэферэндумы аб незалежнасці

Аб тэрытарыяльным, палітычным і эканамічным аддзяленні ад Масквы заявілі прадстаўнікі Кёнігсберга (Калінінградская вобласць), Інгрыі (Санкт-Пецярбург), Урала (Екацярынбург), Сібіры (Новасібірск) і Кубані (Краснадарскі край).

Адна з карт будучага падзелу Расіі 

Адна з карт будучага падзелу Расіі 


Ініцыятары правядзення рэферэндумаў аб суверэнітэце гэтых суб'ектаў падкрэсліваюць, што абвяшчэнне незалежнасці дазволіць жыхарам згаданых рэгіёнаў дасягнуць эканамічнага росквіту, пазбавіўшыся ад рабавання Масквой, захаваць сваю культуру, а таксама перастаць быць гарматным мясам для Крамля ў шматлікіх узброеных канфліктах, у прыватнасці — у вайне супраць Украіны. Пра гэта прадстаўнікі ініцыятыўных груп заявілі падчас «Форуму ПостРасіі», які праходзіў у памяшканні Еўрапарламента ўвечары 30 студзеня.

«Мы, прадстаўнікі эканамічна развітых і свабодных рэгіёнаў так званай Расіі, заяўляем, што жыць у імперыі хопіць, хопіць ісці на повадзе ў сілы, якая ператварае нашых дзяцей у забойцаў і гарматнае мяса, а таксама рабуе нашы землі. Час заявіць правы на незалежнасць, таму што мы маем права жыць у вольным свеце і карыстацца ўсімі выгодамі, якімі карыстаюцца ўсе нармальныя краіны. Мы аб'яўляем аб пачатку працэсу аддзялення і аддалення ад Масквы і аб першых рэферэндумах свабодных людзей, якія насяляюць Кёнігсберг, Інгрыю, Кубань, Сібір і Урал», — адзначыў адзін з удзельнікаў форуму, які прадстаўляе будучую незалежную Кубань.

Цяпер завяршаецца падрыхтоўка да старту анлайн-рэферэндумаў, на якіх жыхары гэтых рэгіёнаў могуць заявіць аб сваёй падтрымцы аддзялення ад РФ і абвяшчэння ўласнай незалежнасці. Да 16 лютага будзе запушчана спецыяльная пляцоўка і сайт для галасавання, дзе можна будзе ажыццявіць волевыяўленне.

Ініцыятары аддзялення ад Масквы прывялі прыклады эканамічных пераваг кожнага рэгіёна пры тэрытарыяльным і палітычным адмежаванні ад Расійскай Федэрацыі.

Пазбавіўшыся ад вяршэнства Масквы, якая вядзе ў дачыненні да рэгіёнаў РФ каланізатарскую імперскую палітыку, насельніцтва новых незалежных дзяржаў зможа нарэшце выкарыстоўваць уласныя багацці і прыродныя рэсурсы на карысць сабе, а не абмежаванаму колу асоб у Крамлі.

«Асноўныя прычыны заключаюцца ў тым, што цяпер Масква рабуе, як бандыт, злачынна рабуе тэрыторыю так званай РФ. Усе сродкі, якія здабываюцца на тэрыторыі РФ, пачынаючы ад фінансаў і заканчваючы сродкамі, што паступаюць ад здабычы рэсурсаў, ідуць у Маскву. Там яны марнуюцца на задавальненне невялікай групы людзей, на тое, што абсалютна нецікава для жыхароў так званай Расійскай Федэрацыі. Грашовыя сродкі трацяцца, у дадзеным выпадку, на вайну, на агрэсіўны напад на суверэнную незалежную Украіну, на знішчэнне мірных людзей, на знішчэнне інфраструктуры, на забойствы дзяцей», — адзначыў прадстаўнік будучай незалежнай Сібіры.

«Жыхары тых рэгіёнаў адпраўляюцца (на вайну — Рэд.) у прымусовым парадку, як гарматнае мяса. У многіх галава забіта паршывай прапагандай, якую сее Масква на тэрыторыі ўсёй так званай РФ. І таму народы Расіі павінны вызваліцца ад гэтай акупацыі. Народы Расіі гатовы заявіць аб сваёй незалежнасці. Для таго, каб гэта зрабіць афіцыйна, распрацавана пляцоўка, якая будзе запушчана і будзе працаваць у бліжэйшы час», — сцвярджаюць прадстаўнікі ідэі нацыянальных суверэнітэтаў суб'ектаў цяперашняй РФ.

Асноўнымі лозунгамі рэферэндумаў абвешчаны наступныя: «Хопіць карміць Маскву!», «Хопіць паміраць за Крэмль!», «Галасуй за незалежнасць сваёй рэспублікі! Выбірай шчаслівую будучыню для сябе і сваіх дзяцей!».


Мэтамі «Форуму свабодных народаў Расіі» абвешчана змена адміністрацыйнай і тэрытарыяльнай структуры РФ і з'яўленне на яе тэрыторыі шэрагу свабодных, незалежных і дэмакратычных дзяржаў, якія змогуць забяспечыць сваім народам годны ўзровень жыцця, камфорт, правы, дабрабыт і развіццё, а таксама мір на кантыненце.

Удзельнікі адстойваюць прынцыпы дэкаланізацыі і дэімперыялізацыі, ажыццяўленне якіх дазволіць розным народам Расіі здабыць палітычную, эканамічную і культурную незалежнасць.

На думку ініцыятараў Форуму, нельга абысціся таксама і без дэнацыфікацыі: усе злачынствы пуцінскага рэжыму як па-за межамі РФ, так і ў дачыненні да ўласных грамадзян павінны быць расследаваны, а іх арганізатары і ідэолагі павінны паўстаць перад трыбуналам. Кожны ўдзельнік гэтых злачынстваў павінен прайсці праз люстрацыю.

У той жа час тэрыторыя РФ павінна зазнаць працэсы дэмілітарызацыі і дэнуклеарызацыі: гэта дазволіць звесці да мінімуму ахвяры пры падзенні дыктатарскага рэжыму і ліквідаваць рызыкі, звязаныя з магчымасцю прымянення рэшткаў ядзернага арсенала РФ у рэгіянальных канфліктах, пры спробах міжнароднага тэрарызму і іншых пагрозах калектыўнай бяспецы.

І, нарэшце, запланаваныя ўдзельнікамі форуму эканоміка-сацыяльныя змены павінны папярэдзіць калапс прававых і эканамічных інстытутаў у пераходны перыяд, не дапусціць спусташэння грамадзян і гарантаваць устойлівасць супрацоўніцтва новых палітыка-эканамічных суб'ектаў. Рэспублікі, саюзы, федэрацыі, канфедэрацыі — грамадзяне кожнага рэгіёна знойдуць тую форму ўладкавання для сваёй зямлі, якая ім больш за ўсё падыдзе.

Пачатак правядзення анлайн-рэферэндумаў запланаваны на 16 лютага. Назву платформы, на якой яны будуць праходзіць, арганізатары абяцаюць паведаміць загадзя.