Пратэстоўцы ў Балівіі захапілі рэдакцыі буйных СМІ

Пратэстоўцы супраць перавыбрання прэзідэнта Эва Маралеса захапілі рэдакцыі тэлеканала Bolivia TV і радыёстанцыі Red Patria Nueva, цалкам перапыніўшы іх працу.

Фота Reuters

Фота Reuters

У Балівіі прыхільнікі апазіцыі ўварваліся ў будынак, дзе размешчаны рэдакцыі дзяржаўнай радыёстанцыі Red Patria Nueva (RPN) і нацыянальнага тэлеканала Bolivia TV (BTV), і захапілі кантроль над гэтымі СМІ. Пра гэта ў Twitter паведаміў прэзідэнт краіны Эва Маралес.
«Дзяржаўныя СМІ BTV і RPN былі захопленыя арганізаванымі групамі, якія метадамі пагроз і запалохвання вымусілі журналістаў спыніць сваю працу», — напісаў ён.
Як адзначыў кіраўнік дзяржавы, апазіцыя заяўляе пра тое, што яна абараняе дэмакратыю, аднак, на яго думку, пратэстоўцы дзейнічаюць з пазіцыі дыктатуры.
Міністэрства сувязі Балівіі асудзіла тое, што адбылося. «Мы асуджаем пагрозы, запалохванне і псіхалагічныя ўздзеянні на глебе палітычнай сітуацыі супраць журналістаў, якія павінны інфармаваць насельніцтва», — гаворыцца ў паведамленні.
Дырэктар Bolivia TV Мігель Тарыха распавёў, што пратэстоўцы цалкам заблакавалі будынак тэлеканала і вымусілі супрацоўнікаў пакінуць яго.
Кіраўнік RPN Іван Мальданада паведаміў «РІА Навіны», што пратэстоўцы ўтрымлівалі супрацоўнікаў радыёстанцыі каля двух гадзін, пагражаючы знішчыць абсталяванне, калі журналісты не спыняць сваю працу.
Пратэсты ў Балівіі пачаліся на фоне мінулых прэзідэнцкіх выбараў. Вышэйшы выбарчы суд Балівіі, які выконвае функцыі выбарчай камісіі, абвясціў, што пасля падліку 99,9% галасоў Эва Маралес перамагае ў першым туры прэзідэнцкіх выбараў. У Еўрасаюзе заявілі аб неабходнасці правесці другі тур, каб аднавіць давер і забяспечыць выкананне дэмакратычнага выбару. З заклікамі правесці другі тур таксама выступілі ЗША і краіны Лацінскай Амерыкі.
Маралес, каментуючы тое, што адбываецца ў краіне, заявіў, што за пратэстамі стаяць «незадаволеныя правыя сілы», якія карыстаюцца міжнароднай падтрымкай. У пятніцу, 8 лістапада, да пратэстаў далучыліся паліцыянты ў некалькіх гарадах краіны. Да цяперашняга моманту ахвярамі сутыкненняў і беспарадкаў сталі сама меней тры чалавекі, пацярпелі амаль 400 чалавек.
rbc.ru