СААЗ заявіла пра «навуковы прарыў» у лячэнні каронавіруса

«Навуковым прарывам, што ратуе жыцці» назваў вынікі брытанскага даследавання па лячэнні COVID-19 карцікастэроідам дэксаметазонам кіраўнік Сусветнай арганізацыі аховы здароўя.

Выступаючы ў Жэневе ў ноч на сераду, 17 чэрвеня, ён павіншаваў урад Вялікабрытаніі і Оксфардскі ўніверсітэт з «выбітнымі навінамі».
Па словах кіраўніка СААЗ, дэксаметазон стаў першым прэпаратам, які паказаў «зніжэнне смяротнасці сярод пацыентаў з COVID-19, якія маюць патрэбу ў кіслародзе або апараце штучнай вентыляцыі лёгкіх». Для пацыентаў, падлучаных да апаратаў ШВЛ, лячэнне дэксаметазонам паказала зніжэнне смяротнасці на адну траціну, для пацыентаў, якія маюць патрэбу толькі ў кіслародзе — на адну пятую, удакладняецца на сайце СААЗ.
Пры гэтым перавага назіралася толькі ў тых пацыентаў, хто пакутаваў ад атыповай пнеўманіі ў цяжкай форме, дзеянне дэксаметазона на пацыентаў з больш лёгкай формай захворвання не было такім эфектыўным.

Даследаванне Оксфардскага ўніверсітэта

Да даследавання Оксфардскага ўніверсітэта прыцягнулі 2104 пацыента. Яшчэ 4000 чалавек удзельнічалі ў кантрольным даследаванні, не атрымліваючы прэпарата. Навукоўцы мяркуюць, што дэксаметазон можа аказацца «на здзіўленне танным» сродкам барацьбы з пандэміяй каронавіруса і здольны прадухіліць кожную восьмую смерць у цяжкіх пацыентаў пры штодзённым прыёме. Поўныя вынікі даследавання яшчэ не апублікаваныя.
Сінтэтычны карцікастэроід дэксаметазон прымяняецца з 1960-х гадоў, валодае супрацьзапаленчым і імунадэпрэсіўным дзеяннем, выкарыстоўваецца, сярод іншага, пры лячэнні рака, алергіі, артрыту і астмы. У 2017 годзе дэксаметазон згадваў кіраўнік незалежнай камісіі Сусветнага антыдопінгавага агенцтва (WADA) Рычард Макларэн, распавядаючы пра сістэму ўтойвання допінгу ў расійскім футболе.
dw.com