Венгрыя спрасціла ўмовы ўезду для расіян і беларусаў
Пасля візіту Віктара Орбана ў Маскву Будапешт уключыў грамадзян РФ і Беларусі ў праграму так званай «нацыянальнай карты» — яна выдаецца для ахвотных працаваць у Венгрыі на два гады з магчымасцю падаўжэння. Уладальнікаў венгерскіх «нацыянальных карт» не правяраюць на ўзроўні ЕС, таму рашэнне Будапешта ўжо выклікала занепакоенасць у суседніх краінах.
Прэм'ер-міністр Венгрыі Віктар Орбан (злева) сустрэўся з прэзідэнтам Расіі Уладзімірам Пуціным у Крамлі 5 ліпеня 2024 года. Фота AFP
Улады Венгрыі «без лішняга шуму» спрасцілі ўмовы ўезду на тэрыторыю краіны для расіян і беларусаў.
Цяпер грамадзяне Расіі і Беларусі ўключаны ў праграму так званай «нацыянальнай карты» (адзін з тыпаў віду на жыхарства ў Венгрыі), якая дазваляе ўладкавацца на працу ў любых галінах і перавезці з сабой сям'ю, піша Deutsche Welle.
Рашэнне было прынята ўрадам Венгрыі яшчэ ў пачатку ліпеня. Раней дзеянне праграмы распаўсюджвалася толькі на грамадзян Сербіі і Украіны. З 9 ліпеня «нацыянальнай картай» могуць карыстацца грамадзяне Расіі, Беларусі, Босніі і Герцагавіны, Малдовы, Паўночнай Македоніі, Чарнагорыі.
«Нацыянальная карта» выдаецца на два гады і можа працягвацца неабмежаваную колькасць разоў. Праз тры гады пражывання ўладальнік карты можа запытаць пастаянны від на жыхарства ў Венгрыі.
Акрамя таго, суіскальнікі карты не здаюць тэст на культурныя веды і не праходзяць праверку бяспекі на еўрапейскім узроўні.
Як адзначае выданне RND, гэта выклікае занепакоенасць у суседзяў Венгрыі, што такім чынам у Еўрасаюз могуць пранікнуць шпіёны або тэрарысты.
Дэпутат Еўрапарламента Сяргей Лагадзінскі ў гутарцы з RND заявіў, што прэм'ер-міністр Венгрыі Віктар Орбан «падрывае еўрапейскую міграцыйную сістэму і ў той жа час робіць сябе служкай Крамля». Пры гэтым ён адзначыў, што лічыць няправільным «таўраваць усіх расійскіх грамадзян».
Нагадаем, з пачаткам поўнамаштабнага расійскага ўварвання ва Украіну шэраг краін Еўрасаюза (напрыклад, Латвія, Эстонія, Літва, Польшча, Чэхія, Фінляндыя) закрылі ўезд і перасталі выдаваць грамадзянам РФ нават кароткатэрміновыя турыстычныя візы.
Глядзіце таксама
Прэм'ер-міністр Венгрыі Віктар Орбан лічыцца адным з апошніх саюзнікаў Уладзіміра Пуціна ў Еўропе. Ён неаднаразова выступаў за працяг супрацоўніцтва Еўрасаюза з Расіяй і крытыкаваў ды зацягваў вылучэнне вайсковай дапамогі Украіне.
У ліпені 2024 года Орбан адправіўся з «міратворчай місіяй» у Кіеў, Маскву і Пекін. Так, 2 ліпеня Орбан знаходзіўся з «мірнай місіяй» у Кіеве, дзе сустрэўся з прэзідэнтам Украіны Уладзімірам Зяленскім, а 5 ліпеня ў Маскве правёў перамовы з прэзідэнтам Расіі Уладзімірам Пуціным.
Орбан прапанаваў Зяленскаму спыніць агонь, і толькі потым пачаць перамовы з Расіяй, ад чаго ўкраінскі бок, зразумела, адмовіўся.
Пасля сустрэчы з Пуціным Орбан заявіў, што пазіцыі Украіны і Расіі вельмі далёкія адна ад адной, але праца павінна працягвацца.
Пасля візітаў у Кіеў і Маскву Орбан сустрэўся з лідарам Кітая Сі Цзіньпінам у Пекіне з «мірнай місіяй» і з былым прэзідэнтам ЗША і кандыдатам у прэзідэнты Дональдам Трампам у Фларыдзе.
Пасля гэтага «нібыта мірныя намаганні» Орбана раскрытыкавалі ў Еўрапарламенце. А з-за перамоваў Орбана ў Маскве і Пекіне Еўрасаюз байкатаваў сустрэчы высокага ўзроўню, якія павінны былі адбыцца ў Венгрыі як краіне, якая цяпер старшынюе ў ЕС (нагадаем, Венгрыя з 1 ліпеня старшынстваваць у Еўрасаюзе паўгода).
Глядзіце таксама
Паводле Deutsche Welle, meduza.io, www.radiotavisupleba.ge