«Вялікае перасяленне»: Пасля 21 верасня Расію пакінулі ад 700 тысяч да мільёна грамадзян
Амаль за два тыдні пасля абвяшчэння частковай мабілізацыі Расію пакінулі прыкладна 700 тысяч чалавек, 200 тысяч з іх з'ехалі ў Казахстан. Колькі з тых, хто выехаў за межы за гэты час, турысты і ці плануюць яны вярнуцца назад — невядома
Аўтамабільны пункт пропуску «Марыінскі» ў Чалябінскай вобласці на мяжы Расіі і Казахстана (фота AP/ТАСС)
З пачатку мабілізацыі з Расіі з'ехалі амаль 1 млн чалавек, сказаў Forbes суразмоўца, знаёмы з крамлёўскімі ацэнкамі. Іншы суразмоўца ў Адміністрацыі прэзідэнта Расіі ўдакладніў, што гаворка ідзе пра 600 — 700 тысяч расійцаў. Пры гэтым падлічыць, якая колькасць тых, хто з'ехаў, пакідае краіну з турыстычнымі мэтамі, не ўяўляецца цяпер магчымым, падкрэслівае ён.
Адразу пасля аб'явы аб мабілізацыі 21 верасня на прапускных пунктах расійскіх меж утварыліся чэргі. Самая вядомая — на прапускным пункце Верхні Ларс на расійска-грузінскай мяжы, дзе людзі стаялі ў чарзе па 4-5 дзён, часта без ежы і вады. 3 кастрычніка блогер Мікалай Леўшыц паведаміў, што затор на мяжы рассмактаўся, машыны праязджаюць свабодна. Таксама чэргі ўтварыліся на памежных пераходах на расійска-казахстанскай мяжы.
Да гэтага часу ў СМІ з'яўляліся разрозненыя ацэнкі колькасці тых, хто выехаў, якія агучвалі розныя краіны ўезду расіян. Так, 4 кастрычніка кіраўнік МУС Казахстана Марат Ахметжанаў паведаміў, што з 21 верасня ў краіну заехалі 200 тысяч грамадзян Расіі, выехалі з краіны за гэты перыяд 147 тысяч расійцаў.
Розныя СМІ прыводзілі лічбу ў 194 тысячы расійцаў, якія з'ехалі за тыдзень пасля абвяшчэння аб мабілізацыі ў Грузію, Казахстан і Фінляндыю. З іх 98 тысяч з'ехалі ў Казахстан. МУС Грузіі паведамляла, што за тыдзень у краіну прыехалі 53 тысячы расійцаў, а штодня мяжу пераходзяць 10 тысяч чалавек, што на 40-45% больш, чым да 21 верасня. За гэты ж тыдзень у ЕС заехалі 66 тысяч расійцаў, што на 30% больш, чым тыднем раней, падлічыла пагранічнае агенцтва Еўрасаюза «Frontex». Агенцтва паведаміла, што большасць заехалі праз фінскія і эстонскія КПП, прычым колькасць жадаючых уехаць у Фінляндыю значна павялічылася пасля абвяшчэння аб мабілізацыі.
30 верасня пасол Расіі ў Хельсінкі Павел Кузняцоў казаў, што пасля 21 верасня ў Фінляндыю заехалі каля 60 тысяч расійцаў, 80% з якіх ідуць транзітам у іншыя краіны Еўропы. Кузняцоў падкрэсліваў, што невядома, колькі менавіта прыезджых называюць прычынай частковую мабілізацыю, аднак, па даных міграцыйнай службы, каля 100 чалавек звярнуліся з заявай аб прадастаўленні прытулку.
У пачатку верасня, яшчэ да абвяшчэння частковай мабілізацыі, Расстат паведамляў, што з пачатку года з Расіі выехалі 419 тысяч чалавек, што ўдвая больш, чым за аналагічны перыяд мінулага года. Міграцыйны адток склаў 96 тысяч супраць прыросту на 114 тысяч у 2021-м.
Частковая мабілізацыя ў Расіі была аб'яўлена 21 верасня. Згодна з афіцыйнымі заявамі, пад яе падпадаюць у першую чаргу вайскоўцы запасу, якія маюць баявы вопыт і ваенна-ўліковую спецыяльнасць. Па даных Мінабароны, павінны быць прызваны 300 тысяч чалавек. Амаль адразу пасля пачатку мабілізацыі дзяржаўныя СМІ пачалі паведамляць аб парушэннях падчас прызыву. 29 верасня Пуцін даручыў ліквідаваць памылкі, дапушчаныя пры частковай мабілізацыі.