Як удараць па Беларусі амерыканскія санкцыі супраць Крамля

Ізаляцыя Расіі нарастае. І гэта патрабуе ад Мінска інвестыцый у альтэрнатыўныя адносіны.

Расійская прэса вельмі раўніва ўспрыняла візіт Аляксандра Лукашэнкі ў Кіеў.
«Хоць на ўзроўні афіцыйных выказванняў кіраўніцтва Расіі міратворчая місія Беларусі ўхваляецца і заахвочваецца, на ўзроўні прапаганды гэтая місія інтэрпрэтуецца як калабарацыянізм — супрацоўніцтва з «фашысцкім» рэжымам ва Ўкраіне», — адзначаецца ў аглядзе «Беларусь у фокусе».
Прапаганда уздзейнічае і на кіруючы клас Расіі — расце недавер да бліжэйшага саюзніка, адзначаюць эксперты.
Недавер выяўляецца, напрыклад, у гандлі: расійскія лабісты часцяком праштурхоўваюць розныя загараджальныя меры ў дачыненні да беларускіх тавараў, спасылаючыся на беларуска-ўкраінскае гандлёвае ўзаемадзеянне (гэта значыць на тое, што Беларусь частка тавараў правозіць у Расію кантрабандай).
«Хутчэй за ўсё, шматбаковыя перамовы з Кіевам аб гандлёвым і прамысловым супрацоўніцтве, узмоцняць аргументы расійскіх лабістаў для ўстанаўлення дадатковых бар'ераў супраць тавараў з Беларусі», — прагназуюць эксперты.
Па іх ацэнцы, супрацоўніцтва з Украінай мае каштоўнасць у частцы росту паставак туды беларускай прадукцыі і ў плане ўмацавання перагаворных пазіцый з Расіяй — менавіта праз Украіну ўжо ўдавалася наладзіць альтэрнатыўныя пастаўкі нафты ў мінулым, і на мінулым тыдні абмяркоўваліся планы аб аднаўленні такіх паставак.
Як адзначаюць эксперты, перспектыва ўвядзення санкцый ЗША супраць Расіі запатрабуе ад беларускіх уладаў яшчэ большай асцярожнасці ў знешнепалітычным балансаванні. Прыняцце законапраекта аб амерыканскіх санкцыях для Мінска азначае, што ізаляцыя Расіі мае доўгачасовы характар ​​і надоўга аслабляе Расею як палітычнага і эканамічнага саюзніка.
«Гэта азначае, што надзеі беларускага ўраду на аднаўленне расійскага эканамічнага росту нягеглыя, што патрабуе працягу дыверсіфікацыі знешняга і эканамічнай палітыкі — паколькі ў сваім цяперашнім выглядзе беларуская эканоміка можа расці толькі ў выпадку росту расійскай», — падкрэсліваецца ў аглядзе.
З іншага боку, некаторыя пункты законапраекта (калі яны будуць рэалізаваны) ўмацуюць перамоўныя пазіцыі Беларусі ў спрэчках з Расіяй. У прыватнасці гэта датычыцца пагаршэння перспектыў абыходных транзітных газаправодаў, што патэнцыйна замацоўвае долю Беларусі ў агульным аб'ёме расійскага газавага экспарту ў ЕС. Але пра канкрэтныя эфектах прымянення законапраекта пакуль казаць рана, адзначаюць эксперты «Беларусь у фокусе».
Паводле «Заўтра тваёй краіны»