Мара прапагандыста. Што не так з жоўтымі ботамі ад БелАЗа
Беларускі піяр — бессэнсоўны і бязлітасны. Толькі-толькі мы выцерлі нос Mcdonald's, як на чарзе замаячыў чарговы амерыканскі гігант — Timberland. Аказваецца, знакамітыя жоўтыя боты цяпер робяцца пад маркай «БелАЗ», і яны нарасхват! Танныя і выдатныя, як трынаццатая зарплата або раптоўны выйгрыш у латарэю.
Боты ал БелАЗа. Фота Мінская праўда
Дэфіцытны тавар
Прапагандысты ў захапленні, адзначае Plan B.
БелАЗ вырашыў замовіць свой мерч — працоўныя боты пад назвай БЕЛАЗ BL7. Боты, усім вядомыя пад амерыканскім брэндам Timberland і ў выглядзе мора падробак рознага ўзроўню цаны і якасці.
Замовіў і выдатна, скажаце вы. Але прапаганда не можа ўпусціць такую падставу для піяру перавагі айчыннага прадукту перад усімі астатнімі. Зрэшты, боты заказвалі ў Кітаі, але гэта не перашкаджае захапленням.
Вось і карэспандэнт сумнавядомай «Мінскай праўды» выправілася шукаць дэфіцытныя боты. І знайшла, пра што напісала цэлы рэпартаж. І нездарма. Ён атрымаўся вельмі смешным. «Яны сталі такія папулярныя, што іх расхопліваюць за лічаныя хвіліны. А прадаюцца яны ў фірмовай краме БелАЗ недалёка ад самой вытворчасці самазвалаў», — захапляецца аўтар.
Дзеля справядлівасці, папулярнымі яны сталі задоўга да траплення на прылавак пад брэндам беларускага вытворцы кар'ернай тэхнікі. Гісторыя ботаў пачалася ў 60-ыя гады мінулага стагоддзя, калі сын адэскіх эмігрантаў Натан Шварц запатэнтаваў тэхналогію бясшвоўнага ліцця. Непрамакальныя боты для лесарубаў зрабілі жоўтымі, каб іх уладальнік быў больш прыкметным у палявых умовах. А яшчэ гэта аказалася выдатным маркетынгавым ходам — маркія боты было лёгка пэцкаць, а потым адмываць, даказваючы іх незабіваемасць і непрамакальнасць ва ўмовах працы ў лясах, балотах і да т. п.
Брэнд Timberland з'явіўся ў 1973 годзе, у 2011 годзе кампанію за 2,2 млрд долараў купіла амерыканская VF Corporation. Выручка гіганта за мінулы год перавысіла 10 млрд долараў.
Глядзіце таксама
З выгляду — адзін у адзін
Маштабы беларусаў пакуль больш сціплыя, але пафасу не менш. Аказалася, што боты прадаюцца ў краме-кулінарыі. Да абеду тут прадалі 70 пар (катлет — больш, прызналіся прадаўшчыцы), а на складах іх аж 500 штук. Так што экспансія працягваецца.
У выніку, праўда, высветлілася, што дэфіцытныя боты былі ўсяго ў чатырох памерах, прычым самы вялікі, 44-ты ўжо разабралі. Затое кошт — агонь, усяго 120,93 рублёў.
А далей усё як мы любім: чарга, напружанне і захапленне ад валодання моднай купляй. Бралі, пішуць, аж па дзве-тры пары. Апыталі і шчаслівага пакупніка. «Абутак мне спадабаўся, — кажа Аляксандр. — Вось на беларускім сайце Lamoda абутак Timberland каштуе 1124,10 рублёў, а аналаг ад БелАЗа з цісненнем самазвала — 120,93 рубля. Розніца ў кошце самі бачыце якая, а з выгляду амаль адзін у адзін».
Не хочам засмучаць уладальніка, але такія кошты — гэта выключна беларускі перакос. Арыгінальныя Timberland без зніжак каштуюць каля 200 долараў. Так што на Lamoda проста адкрыта дорага. Шматлікія «аналагі» стартуюць ад 20 долараў. Далей — пытанне балансу кошту і якасці. Ёсць шанцы, што «БелАЗы» будуць цалкам прыстойна насіцца. Але ні да гонару, ні да патрыятызму, ні да поспехаў айчыннай прамысловасці гэта адносінаў не мае.
Але вельмі ўжо ўладам падабаецца такі падыход, які апрабавалі на Mcdonald's. Бярэм супервядомы і суперпаспяховы праект, касплеім ў меру сіл, але задачы ставім прапагандысцкія, а не камерцыйныя. Так што наша булка з каўбасой не горш за буржуйскую (толькі мы ў іх ідэю запазычылі, і грошай зарабіць не выходзіць — а так адзін у адзін). І боты нашы — нарасхват (але замовілі мы з не ў сваіх вытворцаў, а ў Кітаі, дызайн пазычылі ў амерыканцаў і не вельмі танна выйшла).
Але сыдзе за доказ перавагі айчыннай эканамічнай і грамадскай мадэлі.
А што боты прадаюцца ў кулінарыі, дык гэта нават неяк па-хатняму.