Сустрэча была кароткая... Эканамічны агляд за тыдзень

Трэці тыдзень сакавіка пачаўся са стандартнай рэакцыі Беларусі на няўдачу ў «інтэграцыі» (атрыманне бонусаў ад РФ у абмен на прыгожыя абяцанні).



Было абвешчана, што з-за нявыгаднасці часова не будзе пастаўляцца беларускі бензін на расійскі рынак. У чарговы раз кіраўніцтва Беларусі аб'явіла аб адмове прадаваць МЗКЦ (ледзьве не адзінае прадпрыемства машынабудавання, якое яшчэ цікавіць РФ). Але гэта не перашкодзіла Беларусі прапанаваць расійскаму "Сбербанку" і іншым камбанкам крэдытаваць беларускую эканоміку.

Складана сказаць, дапамаглі гэтыя крокі ці не, але да вечара панядзелка галоўнае пытанне для кіраўніцтва Беларусі было вырашана — была названая новая дата сустрэчы мытнай тройкі. Дадатковымі бонусамі стала адмова РФ ад сустрэчнага зніжэння аб'ёмаў пастаўкі нафты і падпісанне балансу паставак беларускіх прадуктаў харчавання ў РФ.

Гэтыя навіны крыху змякчылі дрэнныя навіны з унутранага беларускага рынку. ВУП працягнуў сваё скарачэнне, прамвытворчасць скарацілася яшчэ больш, пагоршылася сітуацыя з занятасцю людзей. Лакаматыў росту эканомікі — аптовы і рознічны гандаль — хоць і выраслі трохі, але гэты рост у разы меншы за леташні, да таго ж абароты лютага выявіліся меншымі за студзеньскія.

Складскія запасы за 2 месяцы выраслі на 20%, і гэты рост яшчэ не поўны, бо знешняя дэбіторка (гэта значыць склады ў РФ) вырасла яшчэ на 18%. Усё гэта проста "крычыць" пра павышаны курс беларускага рубля, асабліва да расійскага рубля. І досыць дзіўным у цяперашняй сітуацыі выглядае ўтрыманне кошыка валют у канцы тыдня не за кошт паслаблення беларускага рубля да расійскага рубля, а за кошт умацавання беларускага рубля да долара.

У выніку на фоне агульнага негатыву новае кіраўніцтва Белстата заявіла, што не можа не заўважаць складанасцяў у эканоміцы (не хоча адказваць за папярэднія ацэнкі).

На тыдні праяснілася сітуацыя з ІП. Пасля асабістага разгляду гэтай праблемы кіраўніцтвам Беларусі іпэшнікам працягнулі дазвол гандляваць без сертыфікацыі тавараў. Узамен на павелічэнне ў разы падаткаў і збораў і лаяльнасць на выбарах. Новым дэдлайнам абвешчаная дата 1.01.2016.

Працягнулася планавая праца дзяржорганаў па «прасвятленні» грашовых патокаў. Цяпер купіць электронныя грошы праз аддзяленні сувязі можна будзе толькі па пашпарце, а інтэрнэт-крамы абавяжуць мець аплатныя тэрміналы.

МПЗ нарэшце падпісала пагадненне з ЗША аб падатковым кантролі рахункаў. Пасля чаго аб'явіла, што хоча вярнуць ранейшыя правілы пакарання за парушэнні, гэта значыць на парадак падняць памеры штрафаў за нявыплату падаткаў.

Да лагічнага фіналу падышла эпапея з Дэльта-банкам. Нацбанк адклікаў у яго ліцэнзію. Пытанне было толькі ў спосабе, з дапамогай якога будуць вяртаць укладчыкам іх грошы: ранейшы, праз прызначэнне адказнага камбанка або праз Агенцтва па гарантаванай кампенсацыі банкаўскіх укладаў (дэпазітаў) фізічных асоб. Гэта значыць, перакладзе Нацбанк праблему на чые-небудзь плечы або пачне «трэніраваць» пад сваім наглядам спецыяльна створаны для гэтага орган. На выхадзе абышліся кампрамісам — займацца вяртаннем будзе даччыная структура Нацбанка банк Масква-Мінск.

У канцы тыдня стала вядома, што МТБ нарэшце змяніў уладальніка, чарговы беларускі бізнесмен купіў чарговы беларускі камбанк. У Беларусі нарэшце прызналі зніжэнне коштаў на нафту — "Белнафтахім" абвясціў аб адмове прывязкі цэны на бензін да курсу долара і выказаў здагадку, што аб'ём экспартных нафтапошлінаў будзе прыкметна ніжэйшы за запланаваныя мільярды долараў.

Праясніліся дэталі аб кантракце "Беларуськалія" з Кітаем. Цана вырасла на 10 долараў, хоць канкурэнты "Беларуськалія" ("Уралкалій" і Canpotex) разлічвалі на рост цаны на 20–30 долараў. Стала ясна, што тэрміновая патрэба Беларусі ў валюце прымусіла "Беларуськалій" ісці на саступкі.

Завяршыўся тыдзень доўгачаканай сустрэчай у Астане, але, як і меркавалася, сустрэча была нядоўгай. Асноўнае пытанне — валютны саюз — пакуль не сустрэла разумення ў Беларусі і Казахстана. А астатняе ўжо не цікава РФ. Таму размову адклалі да 8 траўня. Пакуль. Відаць, бакі чакаюць, калі ў каго-небудзь здадуць нервы або скончацца грошы.

Уладзімір Арцюгін, галоўны рэдактар часопіса "ЗЭД і валютнае рэгуляванне", спецыяльна для Telegraf.by