У студзені беларуская эканоміка страціла амаль 17 тысяч працаўнікоў

Эканоміка

Белстат паведамляе, што ў студзені адток кадраў у беларускай эканоміцы склаў 16,7 тыс чалавек. Гэта самы вялікі паказчык за папярэднія сем месяцаў — у траўні 2022 года адток склаў 19,2 тыс і далей быў значна ніжэйшы, піша тэлеграм-канал «Нашы грошы».

_upraulenne___administracyja____praca__fota_dzmitryeu_dzmitryj_novy_czas___1__logo_1.jpg

Нагадаем, што 2022 год эканоміка Беларусь таксама пачала з рэзкага росту перавышэння колькасці звольненых над колькасцю прынятых на працу. У студзені 2022 года адток складаў 18,7 тыс чалавек. На працягу ўсяго папярэдняга года толькі тройчы фіксавалася перавышэнне прыёму на працу над звальненнямі — у лютым (+1,7 тыс.), жніўні (+4,4 тыс) і кастрычніку (+1,2 тыс).

Зніжэнне занятасці з'яўляецца вынікам адразу некалькіх неспрыяльных для Беларусі тэндэнцый.

Па-першае, гэта дэмаграфічныя праблемы. Насельніцтва старэе, а на змену больш шматлікім пакаленням, якія выходзяць на пенсію, на рынак працы прыходзіць менш шматлікае маладое.

Па-другое, эканоміка знаходзіцца пад санкцыйным ціскам, губляе традыцыйныя рынкі збыту. Як следства, падае аб'ём вытворчасці і попыт на рынку працы слабее.

Па-трэцяе, рост эміграцыі. Асобныя спецыялісты і цэлыя бізнесы працягваюць пакідаць Беларусь і асядаць у іншых краінах. У выніку там фіксуецца часам выбухны рост эканомікі.

Увогуле дэфіцыт кадраў у краіне апошнім часам набывае пагрозлівыя маштабы. 

Так, у адным толькі Мінску на пачатак сакавіка наймальнікі мелі патрэбу ў 26,8 тыс. работніках.

Сярод працоўных на той момант у Мінску больш за ўсё не хапала кухараў (706 вакансій), кіроўцаў аўтамабіляў (608), прадаўцоў (541), слесараў механазборачных работ (489), электраманцёраў па рамонце і абслугоўванні электраабсталявання (476), слесараў-рамонтнікаў (455), кантралёраў-касіраў (437), токараў (396), рабочых па комплексным абслугоўванні і рамонце будынкаў і збудаванняў (373), маляроў (268).

Асабліва цяжкая сітуацыя з медыкамі. На 1 сакавіка наймальнікі мелі патрэбу ў 1746 медсёстрах і 1518 лекарах-спецыялістах. Да прыкладу, на 1 верасня мінулага года не хапала 1335 медсясцёр (месяцам раней — 1270) і 1136 лекараў-спецыялістаў (у жніўні — 1098).

Са спецыялістаў у сталіцы таксама запатрабаваныя інжынеры (927 вакансій на пачатак сакавіка), фельчары (378), выхавальнікі (197), памочнікі ўрачоў (102), педагогі дадатковай адукацыі (87), эканамісты (84), інжынеры-праграмісты і менеджары (па 81).

Агульны дэфіцыт работнікаў у Беларусі на пачатак сакавіка перавысіў 104 тыс. чалавек. Столькі прапаноў ад наймальнікаў на той перыяд было размешчана ў агульнарэспубліканскім банку вакансій. Пры гэтым па 61 тыс. вакансій прапануюць заробак да 800 рублёў. Як правіла, наймальнікі паказваюць у аб'явах сумы да выплаты падаткаў, гэта значыць на рукі выйдзе больш сціплая сума.

Сітуацыя пагаршаецца з кожным годам. Напрыклад, у 2021 годзе кадравы дэфіцыт складаў прыкладна 96 тысяч работнікаў па ўсёй Беларусі. Якія лічбы будуць на канец 2023-га, можна здагадвацца. Асабліва калі ўлічыць, што атток спецыялістаў у розных сферах, асабліва запатрабаваных грамадствам, працягваецца.