Анісім хоча стаць старшынёй ТБМ, каб пашыраць беларускамоўную прастору
Алена Анісім мае намер узначаліць Таварыства беларускай мовы. І распавядае, як плануе спалучаць дзейнасць на пасадзе старшыні ТБМ з дэпутацкай дзейнасцю.
Алена Анісім
Дэпутатка Палаты прадстаўнікоў Алена Анісім заявіла “Радыё
Свабодзе” пра намер узначаліць Таварыства беларускай мовы.
Цяперашні старшыня Таварыства беларускай мовы Алег Трусаў, які ўзначальвае арганізацыю з 1999 году, пакідае сваю пасаду. Пра гэта ён паведаміў у інтэрв’ю «Беларускаму партызану».
Новае кіраўніцтва ТБМ выберуць 29 кастрычніка на ХІІІ з’ездзе грамадскай арганізацыі. Паводле Алега Трусава, «асноўнай кандыдатурай» на пасаду новага старшыні ТБМ з’яўляецца Алена Анісім.
Алена Анісім у інтэрв’ю “Свабодзе” пацвердзіла гэтую інфармацыю.
— Ці сапраўды вы будзеце вылучаць сваю кандыдатуру на пасаду новага старшыні ТБМ?
— Безумоўна. Маё прозвішча было названае на адной з радаў, і сакратарыят таксама падтрымлівае, і многія рэгіянальныя арганізацыі выступаюць за тое, каб вылучыць маю кандыдатуру на пасаду старшыні ТБМ. Паколькі я працую ўжо даўно і не адзін перыяд працую першым намеснікам, то мушу разумець сваю адказнасць за лёс арганізацыі. Вядома, я буду выстаўляць сваю кандыдатуру.
— Як вы плануеце спалучаць дзейнасць на пасадзе старшыні ТБМ з дэпутацкай дзейнасцю?
— Многія спалучаюць сваю дзейнасць на розных пасадах. Напрыклад, спадарыня Шчоткіна яшчэ ўзначальвае Саюз жанчын, і гэта не замінае ёй працаваць у Савеце Рэспублікі, так што я думаю, што і мне ўдасца спалучаць такія рэчы, тым больш што на працягу свайго жыцця мне ўвесь час даводзілася выконваць не адзін, а некалькі абавязкаў — асноўныя, прафесійныя, плюс яшчэ грамадскія.
— Што вы плануеце зрабіць на пасадзе старшыні, якая ваша праграма?
— Я проста буду працягваць тую дзейнасць, якую вяду і ў Палаце прадстаўнікоў, і ў грамадстве. Мая задача дамагчыся, па-першае, каб заканадаўства прымалася па-беларуску, па-другое, каб быў створаны ўніверсітэт з беларускай мовай навучання сучаснага еўрапейскага кшталту і, адпаведна сучасным выклікам, арыентаваны на фармаванне будучай інтэлектуальнай эліты, кіроўнай эліты.
І па-трэцяе — стварэнне паўнавартаснай інфармацыйнай прасторы на беларускай мове. У гэтым кірунку таксама вядзецца праца.
Так што шмат што ўжо запачаткавана, шмат ёсць людзей, якія гуртуюцца вакол гэтых ідэяў, таму я думаю, калі мы будзем разам, камандай працаваць па ўсіх нашых структурах, у нас шмат што атрымаецца.
— А якой вам бачыцца роля ТБМ у грамадстве на сённяшні дзень?
— Перш за ўсё я бачу гэтую ролю ў актыўнасці грамадзян, вядома, і сяброў ТБМ. Пытанне ў тым, каб мы ставілі стратэгічныя задачы і распрацоўвалі тактычны план дзеянняў і працавалі. Працавалі з грамадствам, працавалі з уладамі, працавалі з іншымі сябрамі грамадзянскай супольнасці. Нам урэшце трэба зразумець, што мы ў Беларусі адказныя за ўсё, што адбываецца ў нашай краіне. У тым ліку за лёс мовы.