«Bloomberg»: на Астравецкай АЭС была выяўлена праблема бяспекі. Мінэнерга: гэта інтрыгі ворагаў
На рэактары Астравецкай атамнай электрастанцыі, якую будавала Расія, у пачатку яго запуску была выяўлена прыхаваная праблема бяспекі. У лютым 2022 года інжынеры карпарацыі «Расатам», якія рыхтавалі новы 1200-мегаватны рэактар, які яшчэ не быў падлучаны да электрасеткі, да выпрацоўкі электраэнергіі на Астравецкай АЭС, выявілі загадкавую і вельмі рэдкую праблему.
Выданне «Bloomberg» атрымала ў сваё распараджэнне ўнутраныя дакументы расійскай дзяржаўнай атамнай карпарацыі «Расатам», якая займалася будаўніцтвам Астравецкай АЭС. Паводле гэтых дакументаў, іонаабменная смала прасочвалася ў першы контур другога энергаблока, пагражаючы заклініць крытычна важныя кампаненты. Гэта магло прывесці да пашкоджання або паломкі стрыжняў кіравання і цеплавыдзяляльных зборак. У горшым выпадку, са слоў экспертаў «Bloomberg», знаёмых з праблемай, магло адбывацца назапашванне іонаабменнай смалы, якая рэгулюе чысціню вады, што прапампоўваецца па трубах падчас працы рэактара — гэта багата не толькі перашкодамі працы рэактара, але і павышэннем рызыкі расплаўлення.
Таму «Расатам» нават часова адклаў запуск другога энергаблока.
Прычына забруджвання контуру смалой застаецца невядомай, пра гэта не былі апавешчаны міжнародныя органы, якія кантралююць бяспеку ядзернай энергетыкі, напрыклад, МАГАТЭ. Са слоў трох інжынераў-ядзершчыкаў, якія добра ведаюць канструкцыі расійскіх рэактараў (папрасілі не называць іх імя), важна высветліць, ці звязана праблема з эксплуатацыйнай памылкай або з канструкцыяй сістэмы, каб яна не паўтарылася ў іншых месцах, дзе будуюцца ВВЭР-1200, піша выданне.
Інцыдэнт з забруджваннем вады быў адзначаны літоўскай выведкай, калі ў лютым 2022 года былі выяўлены змены ў хімічным саставе вады ў першым контуры рэактара: яна была забруджана смалой. Патрабавалася механічная прачыстка труб контуру з выгрузкай ядзернага паліва. Цеплавыдзяляльныя зборкі былі выгружаны і ачышчаны. Частка з іх была заменена новымі.
Пры гэтым «Расатам» сцвярджае, што ўсе яго рэактары адпавядаюць самым высокім стандартам бяспекі.
«Блок у Беларусі ўжо працуе і быў уведзены ў эксплуатацыю ў мінулым месяцы. Але праблемы, якія ўзніклі раней на Астравецкай АЭС, размешчанай усяго за 50 км ад сталіцы Літвы Вільні, асабліва актуальныя, бо Беларусь была замежным выпрабавальным палігонам для новай канструкцыі рэактара, якую «Расатам» экспартуе ва ўсім свеце. Падобныя так званыя блокі ВВЭР-1200 павінны быць уведзены ў эксплуатацыю ў Бангладэш і Турцыі ў бліжэйшыя 12 месяцаў», — удакладняе выданне.
У дакументах, якія ёсць у распараджэнні агенцтва, таксама гаворыцца пра тое, што пры будаўніцтве БелАЭС «Расатам» сутыкнуўся з недахопам працоўнай сілы і праблемамі ў ланцужку паставак, што, на думку еўрапейскіх чыноўнікаў, можа паўплываць на ядзерную бяспеку.
Глядзіце таксама
У адказ на гэтую публікацыю намеснік міністра энергетыкі Міхаіл Міхадзюк назваў публікацыю агенцтва «Bloomberg» аб магчымай няштатнай сітуацыі на БелАЭС у 2022 годзе «спробай дыскрэдытаваць адносіны з Расіяй».
«Чарговая спроба дыскрэдытаваць праз гэты праект нашы добрыя адносіны з нашым старэйшым братам у Расійскай Федэрацыі, таму што тое становішча, якое склалася вакол нашых краін, паказала, што наша канструктыўнае ўзаемадзеянне толькі, так бы мовіць, нарошчвае мускулы нашай эканомікі і павышае ўзровень жыцця нашых людзей», — заявіў Міхадзюк.
Ён адзначыў, што спробы дыскрэдытаваць БелАЭС рабіліся са старту будаўніцтва, прытым што беларускі бок прад'яўляў завышаныя патрабаванні да бяспекі станцыі, а ў МАГАТЭ нібыта няма прэтэнзій.
«Таму вось гэты выпад, які сёння з'явіўся ў СМІ — гэта чарговая спроба дыскрэдытаваць, наогул ачарніць наш сумесны з Расійскай Федэрацыяй праект і праз гэта — БелАЭС. Час пакажа, і ён ужо паказвае: станцыя працуе надзейна і ўпэўнена», — падсумаваў намеснік міністра.
Глядзіце таксама
Раней публікацыю «Bloomberg »пракаментаваў прэс-сакратар расійскага прэзідэнта Дзмітрый Пяскоў, сказаўшы, што сітуацыю нельга разглядаць як няштатную.
«Гэта нельга назваць няштатнай сітуацыяй, таму што гаворка ідзе пра пуска-наладачныя работы, гэты нюанс — самы важны. Гэта не няштатная сітуацыя падчас працы станцыі, там праводзяцца пуска-наладачныя работы», — цытуе Пяскова ТАСС.
Нарэшце, наяўнасць праблем на другім энергаблоку БелАЭС прызнаваў і Аляксандр Лукашэнка.
«Мы нічога не хавалі і хаваць не маем намеру, што былі пэўныя недахопы ў будаўніцтве атамнай станцыі, якія вельмі аператыўна выпраўляліся нашымі і расійскімі будаўнікамі. Зацягванне тэрмінаў звязана з тым, што мы сапраўды прад'яўляем вельмі высокія патрабаванні да бяспекі. Лепш на паўгода — год пазней, чым дзесьці чагосьці недапрацаваць», — сказаў ён у сакавіку гэтага года. А ў кастрычніку Лукашэнка запатрабаваў ад Расіі нават кампенсацыю за зрыў тэрмінаў будаўніцтва атамнай электрастанцыі.
Паводле «Белнавіны»