ФПБ — працоўнаму класу: цярпіце і працуйце!
У апошні час беларускія працоўныя ўсё часцей сутыкаюцца з рознымі цяжкасцямі. Гаворка ідзе пра затрыманне заробкаў, няпоўнай занятасці, скарачэннях і іншых праблемах. Што ж у сітуацыі, якая склалася, прапануе галоўны абаронца правоў працоўных — Федэрацыя прафсаюзаў Беларусі? Калі коратка, то нічога.
Крызіс б'е па працоўным класе
Крызісныя з'явы ў эканоміцы адбіваюцца на дабрабыце беларускіх працоўных. З лета мінулага года заробкі фактычна перасталі расці, а ў доларавым выражэнні пасля снежаньскай дэвальвацыі
рубля яны значна аселі — з 629 долараў у ліпені 2014 да 435
долараў у сакавіку 2015-га. Чыноўнікі нават і не заікаюцца пра абяцаныя перад мінулымі прэзідэнцкімі выбарамі тысячы долараў сярэдняй зарплаты, мэта — вярнуцца да ўзроўню «усім па пяцьсот».
Акрамя таго, для вялікай колькасці рабочых надзённай праблемай з'яўляецца своечасовая выплата зарплаты. Паводле афіцыйных дадзеных, калі на 1 студзеня гэтага года пратэрмінаваная
запазычанасць па зарплаце мелася ў 20 арганізацыях перад 3 тыс. работнікаў, то на 1 мая — у 327 арганізацыях перад 56,3 тыс. работнікаў. З пачатку года сума
пратэрмінаванай запазычанасці вырасла з 22,1 млрд. рублёў да 206,6 млрд. ублёў.
Яшчэ адной бядой беларускіх працоўных з'яўляюцца прастоі і вымушаныя адпачынкі. Так, у сакавіку гэтага года ў рэжыме вымушанай няпоўнай занятасці працавала больш за 73 тысяч чалавек. Гэта
на 15,8% больш, чым у лютым 2015 года, і ў 5,5 разоў больш, чым у сакавіку 2014 года.
Больш за ўсё гэтая праблема закранула работнікаў прамысловых прадпрыемстваў. Да прыкладу, у сакавіку Мінскі аўтамабільны завод на дзесяць дзён спыняў канвеер па вытворчасці грузавікоў. За
прастой працоўным выплацілі дзве траціны ад заробку. Некаторыя прадпрыемствы на час прастою наогул адпраўляюць рабочых у адпачынак за свой кошт.
Акрамя гэтага, з-за крызісу многія прадпрыемствы ідуць на такую непапулярную меру як скарачэнне персаналу. Калі ў снежні 2014 колькасць звольненых была амаль на 11 тысяч чалавек больш, чым
колькасць прынятых работнікаў, то да сакавіку 2015 года розніца перавысіла 13,5 тыс. чалавек.
Прафсаюзы заклікаюць падтрымаць дзяржаву
Гэтыя праблемныя пытанні, так ці інакш, агучваліся на VII з'ездзе ФПБ, які праходзіў 22 мая ў Мінску.
Старшыня ФПБ Міхаіл Орда заклікаў наймальнікаў захоўваць працоўныя месцы і поўны працоўны дзень для работнікаў. Важна, сказаў ён, каб «людзей не адпраўлялі ў вымушаныя адпачынкі за свой
кошт».
Прафсаюзны лідэр ўвязвае праблемы на беларускіх прадпрыемствах з вонкавымі фактарамі.
«Ва Украіне — вайна, у
Казахстане — дэвальвацыя, у Расіі — санкцыі. Праблема не ў нас. Мы як выраблялі, так і
вырабляем», — кажа Міхаіл Орда.
Тым не менш, лічыць ён, зараз неабходна заваёўваць новыя рынкі і «падцягваць пытанні маркетынгу, але гэта таксама за адзін дзень не робіцца».
У сітуацыі, якая склалася, ФПБ заклікае працоўных зразумець і падтрымаць дзяржаву.
«Калі ў дзяржавы было дастаткова грошай, яно іх ніколі не шкадавала, але, бывае, надыходзяць такія моманты, калі трэба разумець, што мы ўсе знаходзімся ў адной лодцы, што трэба таксама
падтрымаць дзяржаву. Калі пачаць хадзіць і крычаць, то толку не будзе ніякага. Працаваць трэба ўсім сёння, напружвацца», — кажа Міхаіл Орда.
На сённяшнім з'ездзе ад прафсаюзных лідэраў дакладных адказаў на пытанні, як у гэтай складанай сітуацыі будзе дзейнічаць Федэрацыя прафсаюзаў, якія варыянты яна гатовая прапанаваць
дзяржаве і ці будзе наогул ўступаць у якой-небудзь дыялог з урадам, атрымана так і не было.
Адзіны рэцэпт ад ФПБ, які пачуў сёння працоўны клас, — цярпіце
і працуйце!