Генпракуратура Беларусі накіравала дакументы «аб генацыдзе» ажно ў 17 краін
Пра гэта ў эфіры СТВ распавёў кіраўнік следчай групы па крымінальнай справе «аб генацыдзе» Генпракуратуры Беларусі Валерый Талкачоў.
Ілюстрацыйнае фота Аляксандра Лібертада
Па яго словах, па справе было дапытана больш за 12,5 тысячы сведкаў.
«Палова з іх — гэта вязні канцлагераў, лагераў смерці, ветэраны Вялікай Айчыннай вайны. У мінулым годзе намі праведзена 12 раскопак, пошукавых работ. Напрыклад, у кастрычніку-лістападзе праведзены раскопкі ў чанкаўскім лесе Гомельскага раёна. Па мінімальных падліках, у паказаным месцы карнікі расстралялі не менш за 4 000 жыхароў горада Гомеля, бліжэйшых гарадоў. У кастрычніку мінулага года таксама праведзены раскопкі ва ўрочышчы Уручча на тэрыторыі Мінскага раёна. Паводле папярэдніх звестак, там расстраляна не менш як 38 тысяч мірных грамадзян і ваеннапалонных», — сказаў Талкачоў.
Па словах прадстаўніка Генпракуратуры, міжнародныя даручэнні па аказанні прававой дапамогі былі накіраваныя ў 17 дзяржаў. Але адгукнуліся на іх далёка не ўсе.
«У якасці прыкладу, на жаль, прывяду нашых суседзяў, гэта Літоўская Рэспубліка, Латвійская Рэспубліка, якія адмовілі нам у прававой дапамозе па крымінальнай справе аб генацыдзе, матываваўшы гэта тым, што гэта можа паўплываць на пытанні нацыянальнай бяспекі гэтых дзяржаў. Але фактычна мы бачым, што яны не жадаюць аказаць дапамогу ў расследаванні крымінальнай справы супраць чалавецтва, масавага забойства мірнага насельніцтва і аднавіць, дапамагчы нам аднавіць гістарычную справядлівасць, паказаць сапраўдны аб'ём усяго маштабу трагедыі беларускага народа. Яны нам афіцыйна адмовілі», — канстатаваў Валерый Талкачоў.