Хронікі рэпрэсій. Хапун у Гродзенскім інстытуце раслінаводства

З дапамогай інфармацыі праваабаронцаў і незалежных медыя сабралі звесткі пра палітычны пераслед у Беларусі за 26 кастрычніка.

Суд Шклоўскага раёна 26 кастрычніка вынес прысуд палітвязню Дзянісу Хахлову, якога абвінавацілі ў арганізацыі і падрыхтоўцы дзеянняў, якія груба парушаюць грамадскі парадак, альбо актыўным удзеле ў іх (ч. 1 арт. 342 КК). Справу разглядаў суддзя Аляксандр Тараканаў.

Дзяніс жыў у Расіі з лютага 2023 года, туды ён з'ехаў, бо баяўся пераследу ў Беларусі. З Расіі ён збіраўся з'ехаць у Грузію, але 11 чэрвеня быў затрыманы ў Кабардзіна-Балкарыі праз тое, што знаходзіўся ў міждзяржаўным вышуку на запыт Беларусі. Хахлоў — айчым ужо асуджанага за ўдзел у пратэстах на два гады «хатняй хіміі» Уладзіслава Лагуценкі.

Суд прызначыў Дзянісу пазбаўленне волі на тэрмін адзін год і шэсць месяцаў калоніі ва ўмовах агульнага рэжыму.

У судзе Заводскага раёну Мінск асудзілі Кірыла Ахрэмчыка паводле ч. 1 арт. 342 КК («Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх»). Суддзя Алена Капцэвіч прызначыла Кірылу два гады і шэсць месяцаў абмежавання волі без накіравання ў папраўчую ўстанову адкрытага тыпу («хатняй хіміі»).

Кірыла абвінавацілі ва ўдзеле ў акцыях пратэсту ў Мінску ў 2020 годзе, выхадзе на праезную частку і перакрыцці руху грамадскага транспарту.

Таксама мужчыну паставілі ў віну знаходжанне ў счэпцы ў першых шэрагах пратэстоўцаў на вуліцы Максіма Багдановіча ў Мінску. Фотаздымкі з гэтым эпізодам сілавікі знайшлі ў адным з тэлеграм-каналаў.

Андрэй Пачобут — па-ранейшаму ў ізаляцыі і без лекаў

З'явілася інфармацыя аб затрыманнях у Гродзенскім занальным інстытуце раслінаводства НАН Беларусі. Пра гэта паведаміў адзін са шчучынскіх прапагандысцкіх тэлеграм-каналаў — менавіта ў гэтым горадзе размяшчаецца ўстанова.

Калі прайшоў рэйд і колькі чалавек было затрымана — не паведамляецца. Вядома толькі, што некаторых супрацоўнікаў установы прыцягнулі да адказнасці за «распаўсюд экстрэмісцкіх матэрыялаў».

Затрыманы чарговы айцішнік. На відэа ён кажа, што ўдзельнічаў у акцыях пратэсту, а таксама перапісваўся з ініцыятывай «КіберПартызаны» — яму нібыта далі тэставае заданне, якое ён не змог зрабіць.

«Увесь гэты час нас шукалі». Першы допіс Аліны Нагорнай пасля эвакуацыі з Беларусі

За каментары ў інтэрнеце затрыманы мужчына. Паведамляецца, што ён ў 2020-м і 2021-м гадах пакідаў абразлівыя каментары ў дачыненні да Лукашэнкі, вайскоўцаў, афіцэраў і суддзяў.

Апошнім часам у Беларусі былі затрыманыя 25 грамадзян Латвіі. Міністр замежных спраў Латвіі Крыш'яніс Карыньш адзначыў, што большасць з гэтых спраў, калі не ўсе, палітычна матываваныя. Ён заклікаў грамадзян Латвіі не ехаць у Беларусь, бо «там няма справядлівасці», і ў выпадку непрыемнасцяў латвійскія дыпламатычныя прадстаўнікі не змогуць дапамагчы суайчыннікам.