Хронікі рэпрэсій за 13 лютага
Беларускіх палітыкаў, праваабаронцаў і журналістаў дадалі ў базу вышуку ў Расіі, ціск на палітвязняў у зняволенні не спыняецца, былы палітзняволены блогер Сяргей Пятрухін з'ехаў з Беларусі паведамляюць праваабаронцы.
- Ціск на палітвязняў у зняволенні не спыняецца:
- Палітвязнямі за мінулыя два тыдні былі прызнаныя 27 чалавек.
- Цалкам адбылі тэрміны і выйшлі на волю 17 палітвязняў.
- Чатырох палітвязняў асудзілі па крымінальных артыкулах, двух з іх — да калоніі.
- Тром палітвязням пагражае дадатковы тэрмін паводле арт. 411 Крымінальнага кодэкса.
- Двух палітзняволеных могуць перавесці на турэмны рэжым.
- Больш за год няма сувязі з палітзняволеным Міколам Статкевічам.
- У Лунінцы затрыманы былы актывіст БСДП (Грамада)
Анатоля Прышчыка затрымлівалі ў Мікашэвічах надвячоркам 12 лютага.
«А 17 гадзін прыехаў вялізны чорны бус, з яго выпрыгнулі 15 амбалаў са зброяй. І кінулі 74-х гадовага дзядульку тварам аб зямлю», – паведамляюць у сацсетках сваякі затрыманага.
Паведамляецца, што затрыманне адбылося па адміністрацыйнай справе паводле ч. 2 арт. 19.11 КаАП (Выраб, распаўсюд ці захаванне экстрэмісцкіх матэрыялаў). Верагодна сёння ў Лунінцы адбудзецца суд над Анатолем.
Вядома, што Прышчык неаднаразова з'яўляўся назіральнікам падчас выбараў.
- Затрыманні за лайкі і пасты
Жыхар Баранавіч паставіў адзнаку «клас» у «Аднакласніках» — і гэтым абразіў Лукашэнку. Так, судом Баранавіцкага раёна і Баранавіч вынесены прысуд Яўгену Кладову, абвінавачанаму ў абразе Лукашэнкі паводле ч. 1 арт. 368 Крымінальнага кодэкса. Справу разглядала суддзя Сафія Хвалько.
Па матэрыялах абвінавачання, Яўген у сацыяльнай сетцы «Аднакласнікі» «наўмысна размясціў выяву, якая супярэчыць агульначалавечай маралі і нормам паводзін, прынятым у грамадстве, тым самым публічна наўмысна прынізіў гонар і годнасць асобы Лукашэнкі ў сувязі з ажыццяўленнем ім сваіх паўнамоцтваў, выказанае ў непрыстойнай форме».
Суд, які праходзіў 23-24 лістапада 2023 года, прызнаў яго вінаватым і прызначыў яму пакаранне ў выглядзе пазбаўлення волі тэрмінам на адзін год з адбываннем пакарання ў папраўчай калоніі ва ўмовах агульнага рэжыму.
Затрымалі жыхара Віцебска, які ў «Аднакласніках» лайкнуў пост пра смерць начальніка Аршанскага РУУС
Раней за негатыўны каментар на адрас памерлага начальніка аршанскіх міліцыянтаў затрымалі жыхара Полацка.
- За «экстрэмізм» затрымалі траіх супрацоўнікаў «Газпром трансгаз Беларусь»
Сцвярджаецца, што паскрадзіўся на людзей сілавікам іх калега.
Сярод затрыманых аказаліся інжынер і вядучы інжынер прадпрыемства. Сілавікі прымусілі іх сказаць, што яны «падтрымлівалі пратэсныя настроі», захоўвалі «пратэсную» сімволіку, рабілі рэпосты з «экстрэмісцкіх» тэлеграм-каналаў і удзельнічалі ў акцыях.
- Сілавікі затрымалі гродзенскага айцішніка
Яго абвінавачваюць ва ўдзеле ў акцыях пратэсту і напісанні абразлівых каментароў. Таксама сцвярджаецца, што ў офісе, дзе працаваў мужчына, вісеў БЧБ-сцяг і налепкі з «Пагоняй» — праўладныя тэлеграм-каналы пагражаюць кампаніі «зачысткай».
Глядзіце таксама
- Беларускіх праваабаронцаў дадалі ў базу вышуку ў Расіі
Пра гэта паведамляе @mediazona_by са спасылкай на базу вышуку МУС Расіі.
Так, у спіс трапіла праваабаронца «Вясны» Наталля Сацункевіч, былыя палітзняволеныя Леанід Судаленка і Марыя Тарасенка, праваабаронцы Уладзімір Хільмановіч і Ігар Казмерчак, а таксама асуджаны да 8 гадоў калоніі завочна Зміцер Салаўёў.
- Сілавікі адсправаздачыліся аб затрыманні траіх жыхароў Баранавічаў
Сцвярджаецца, што жыхароў Баранавічаў нібыта ўдзельнічалі ў паслявыбарчай акцыі пратэсту 9 жніўня 2020-га года.
- Былы палітзняволены блогер Сяргей Пятрухін з'ехаў з Беларусі
Нагадаем, у красавіку 2021 году блогераў Пятрухіна і Кабанава асудзілі да 3 гадоў калоніі за «арганізацыю групавых дзеянняў, якія груба парушылі грамадскі парадак» і абразы прадстаўнікоў улады і суддзі. Яны цалкам адбылі тэрмін і напрыканцы 2022-га году выйшлі на волю. Аляксандр з'ехаў з краіны, а Сяргей заставаўся на радзіме.
-
Праваабаронцы ў сумеснай заяве патрабуюць паказаць грамадству затрыманага ў РФ беларуса
Сяргей Ерамееў — беларус, якога ў РФ абвінавачваюць у падрыве двух цягнікоў на БАМ у Бураціі. У Беларусі 2020-ым годзе мужчына страціў работу праз палітыку — ён удзельнічаў у стачцы на «Нафтане».
Вось ужо больш за 1,5 месяца праваабаронцы спрабуюць звязацца з Сяргеем і даведацца пра ягоны лёс, але пакуль выніку няма:
12 студзеня ў СІЗА Омска прыехаў адвакат, якому заявілі, што Ерамеева перавялі ў Іркуцк.
29 студзеня ў СІЗА Іркуцка іншаму ўжо адвакату заявілі, што Ерамеева этапавалі ў Маскву.
Днямі ў Маскве ў адпаведным СІЗА ўжо трэці адвакат атрымаў адказ, што «Еремеева тут нет и не было».
Праваабаронцы заклікаюць дапусціць да Сяргея незалежнага адваката, каб пераканацца, што беларус жывы і здаровы, а таксама забяспечыць справядлівы судовы працэс, бо гэта права кожнага чалавека, незалежна ад характару абвінавачання.
Глядзіце таксама
- Студэнтку Сафію Кажамякіну асудзілі на 2,5 гады «хатняй хіміі» за ўдзел у Маршах
У судзе Фрунзенскага раёна Мінска 26 студзеня асудзілі Сафію Кажамякіну паводле ч. 1 арт. 342 КК (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).
Суддзя Юлія Блізнюк прызначыла Сафіі два гады і шэсць месяцаў абмежавання волі без накіравання ў папраўчую ўстанову адкрытага тыпу («хатняй хіміі»).
Дзяўчыну апазналі па пратэсных відэа, знойдзеных у ейным тэлефоне падчас агляду. Да суда Сафія знаходзілася пад закладам памерам 18500 рублёў.