Хронікі рэпрэсій. Затрымалі Кацярыну Шуст, у СІЗА за «дзяржздраду» трымаюць вайскоўца

З дапамогай інфармацыі праваабаронцаў і незалежных медыя сабралі звесткі пра палітычны пераслед у Беларусі 16 сакавіка.

Пасля ўчорашняга ператрусу ў рэдакцыі незалежнага слуцкага медыя «Інфа-Кур'ер» галоўны рэдактар і ўладальнік газеты Сяргей Станкевіч, а таксама яго намеснік Алег Рубчэня накіраваны ў мясцовы ІЧУ. Падчас ператрусу з рэдакцыі вынеслі ўсю асноўную тэхніку.

У Гарадку быў затрыманы сябра ЦРК БСДП Лявон Гаравы. Да суда ён змешчаны ў ізалятар. Вядома, што дома ў яго адбыўся ператрус. Вінавацяць мужчыну ў «распаўсюджанні экстрэмісцкіх матэрыялаў».

Праваабаронцам стала вядома, што з пачатку лютага гэтага года ў СІЗА-1 утрымліваецца намеснік камандзіра 310-й групы артылерыі па ідэалагічнай рабоце 120-й асобнай гвардзейскай механізаванай брыгады гвардыі падпалкоўнік Антон Чарамных. Па папярэдняй інфармацыі, яго, сярод іншага, абвінавачваюць у «здрадзе дзяржаве». Абставіны справы невядомыя.

Яшчэ год таму дзяржаўная газета «Звязда» рабіла рэпартаж са 120-й механізаванай брыгады, што дыслакуецца ў мінскім Уруччы, дзе журналісты апытвалі і Антона.

У Глыбокім затрыманы вядомы бодзібілдар Аляксандр Шарабайка. Падчас суда паводле адміністрацыйнага абвінавачання яго арыштавалі на 10 сутак. У мужчыны і ягонай жонкі Алены сілавікі забралі тэлефоны.

Пасля выбараў Шарабайку некалькі разоў саджалі на суткі за ўдзел у пратэстах і за бел-чырвона-белы сцяг на доме. У ліпені 2021-га яго затрымлівалі на трое сутак «па падазрэнні ў злачынстве».

У Магілёве затрымлівалі кандыдатку біялагічных навук, выкладчыцу мясцовага дзяржуніверсітэта Наталлю Мартусевіч. Жанчыне 47 гадоў, яна з Магілёва. З 2004 года Наталля працуе дацэнтам у ВНУ. Папярэдне затрыманне было звязана з каментарамі ў чатах. Пазней стала вядома, што Наталлю вызвалілі. Але ці прад'яўлена ёй абвінавачанне, невядома.

КДБ абнавіў спіс «асоб, якія маюць дачыненне да тэрарыстычнай дзейнасці» — там з'явіліся прозвішчы яшчэ адзінаццаці чалавек. Сярод іх палітзняволеная праваабаронца Мафра Рабкова, а таксама Дзмітрый Слук, Аляксандр Мілашэўскі, Вадзім Васільеў, Мікалай Бібліс, Аляксандр Сідарэнка, Аляксандр Францкевіч, Акіхіра Гаеўскі-Ханада, Андрэй Чапюк, Віталь Енаровіч, Аляксандр Сумар.

Цяпер у «тэрарыстычным спісе» 1037 чалавек, з іх 289 — беларусы.

Праваабаронцам паведамляюць пра затрыманні ў Іванаве. У гэты панядзелак, 13 сакавіка, у горадзе адбываліся масавыя арышты. Затрымана як мінімум 4 чалавекі. Хто быў затрыманы і за што — невядома.

Разгромлена кватэра валанцёра Іллі Міронава, забралі маці, але яна паспела пакінуць запіску (фота, абноўлена)

Беларускія памежнікі паведамілі былому журналісту інтэрнэт-выдання «Першы рэгіён» Сяргею Гардзіевічу, што яму забаронены выезд за мяжу, і паставілі ў пашпарт адпаведны штамп. Сёлета Сяргей Гардзіевіч атрымаў візу і ў сакавіку вырашыў з'ездзіць у Літву, аднак паездка атрымалася няўдалай.

«Я адчуў нешта нядобрае, калі памежніца вельмі доўга разглядала мой пашпарт. У выніку яна патэлефанавала, і прыйшоў яе начальнік», — распавёў Сяргей Гардзіевіч.

Памочнік Мясніковіча Дзмітрый Шадко знаходзіцца ў СІЗА КДБ. Нагадаем, 13 сакавіка СМІ паведамлялі, што Дзмітрый знік у Маскве і яго не могуць знайсці тры дні. Выявілася, што мужчына быў затрыманы на працы ў Маскве. Як сцвярджаюць крыніцы, мужчына доўгі час быў звязаны з «ралевікамі» і час ад часу, па магчымасці, прымаў удзел у іх мерапрыемствах — ён асабіста ведаў некаторых людзей, што былі затрыманы па справе дыверсіі ў Мачулішчах.

Шадко займаў пасаду памочніка Міхаіла Мясніковіча, старшыні Калегіі Еўразійскай эканамічнай камісіі. Да траўня 2019 года ён быў намеснікам Міністра сувязі і інфарматызацыі Беларусі.

Былога палітвязня Аляксея Раманава затрымалі ў Калінкавіцкім раёне. Ён абвясціў галадоўку. Паводле крыніцы, «міліцыянты загадалі яму ўзяць з сабой тэлефон, бо будуць правяраць яго сувязі з забароненымі ў Беларусі арганізацыямі».

Аляксей Раманаў раней адбыў тэрмін зняволення за «абразу Лукашэнкі». Пасля вызвалення ў яго забралі другую групу інваліднасці, хоць ён мае анкалагічнае захворванне. Аляксей не мог афіцыйна ўладкавацца на працу, яму ўсюды адмаўлялі.

У Гродне затрымалі прадпрымальніцу Кацярыну Шуст. На зманціраваным сілавікамі відэа дзяўчына «прызнаецца» ў тым, што ў сваіх сацсетках распаўсюджвала «экстрэмісцкія» матэрыялы, а таксама нібыта прайшла рэгістрацыю ў чат-боце плана «Перамога». Адзначым, што на відэа дзяўчына размаўляе на беларускай мове. Раней былыя вязні распавядалі, што сілавікі не дазвалялі запісваць відэа па-беларуску.

Кацярына Шуст — колішняя актывістка партыі БНФ. У 2016-м у Слуцку яна балаціравалася ў дэпутаты. Таксама яна доўгі час працавала прадавачкай беларускай сімволікі.

ГУБАЗіК затрымаў знаёмых Яўгеніі Тачыцкай, якая нібыта датычная да дыверсіі ў Мачулішчах. На відэа Кірыл і Ганна Маліноўскія кажуць амаль слова ў слова адзін і той жа завучаны тэкст пра ўдзел у акцыях пратэсту ў 2020 годзе — нібыта з-за «такіх дэструктыўных элементаў, як Ціханоўская, Латушка, Калеснікава і Яўгенія Тачыцкая».

Вядома, што Ганна працуе перакладчыкам у «Беларускай калійнай кампаніі».

Падчасу ператрусу ў Маліноўскіх сілавікі забралі БЧБ-сцягі і БЧБ-майкі, страйкбольную і пнеўматычную стрэльбу, газавы пісталет, цвёрдыя дыскі.

Затрымалі хлопца, якому закідаюць адміністраванне чата «97% Серабранка». Яго завуць Арцём Караткевіч, яму 26 гадоў. Родам з Рагачова, вучыўся ў Гомельскім дзяржаўным тэхнічным універсітэце імя Сухога на спецыяльнасці «аўтаматызацыя тэхналагічных працэсаў і вытворчасцей». Некалькі гадоў таму хлопец пераехаў у Мінск, жыў на вуліцы Малініна. Апошнім часам працаваў афіцыянтам.

Крыж, які Алесь Пушкін выразаў лязом на сваім целе падчас суда, — прысуд цэлай эпосе

Затрымалі супрацоўніцу ІТ-кампаніі «Гейм Стрым» Ксенію Алькенаву. Нібыта яна ахвяравала 425 долараў праз фонды салідарнасці. У Ксеніі канфіскавалі ўсе заробленыя супольна з мужам, таксама айцішнікам, грошы і тэхніку.

36-гадовая Ксенія Алькенава (у дзявоцтве — Шчурэвіч) доўгі час жыла ў Маскве, там яна пазнаёмілася са сваім мужам Вадзімам Алькенавым. Ксенія працуе ў кампаніі «Гейм Стрым», былым беларускім офісе «Варгеймінга».

Жанчыне закідаюць крымінальны артыкул «фінансаванне экстрэмісцкай дзейнасці», па якім ёй пагражае да пяці гадоў турмы. Сцвярджаецца, што яна ахвяравала праз Facebook 9 разоў на агульную суму 425 долараў.

У Бярэзіно ўчора быў затрыманы Алег Бандарчык. Цяпер ён знаходзіцца ў мясцовым ІЧУ. Учора раніцай у яго дом уварваліся некалькі амапаўцаў пры поўнай экіпіроўцы і са зброяй. Дома знаходзіўся сам затрыманы і два яго сыны. Сілавікі патлумачылі, што ёсць інфармацыя пра тое, што Алег перадаваў камусьці звесткі аб перамяшчэнні расійскай вайсковай тэхнікі.

Сёння яму прызначылі 15 сутак. У ІЧУ Бярэзінскага РАУС адмаўляюцца даваць родным інфармацыю, па якім артыкуле Бандарчык быў затрыманы і асуджаны.